ನಡೆ ಕನ್ನಡ, ನುಡಿ ಕನ್ನಡ: ಆಗಲಿ ಕೀಬೋರ್ಡ್ ಕೂಡ ಕನ್ನಡ!

0
310

Kannada Keyboards in PlayStoreಮಾಹಿತಿ ಮತ್ತು ತಂತ್ರಜ್ಞಾನದ ಕ್ಷೇತ್ರ ಕ್ಷಣ ಕ್ಷಣಕ್ಕೂ ಬದಲಾಗುತ್ತಿರುವ ಕೌತುಕಗಳಲ್ಲೊಂದು. ಕೆಲವೇ ವರ್ಷಗಳ ಹಿಂದೆ ಅಂತರ್ಜಾಲದಲ್ಲಿ, ಸ್ಮಾರ್ಟ್ ಫೋನ್‌ಗಳಲ್ಲಿ ಕನ್ನಡ ಬರೆಯಲು ತ್ರಾಸ ಪಡುತ್ತಿರುವವರೆಲ್ಲರೂ ಇದೀಗ ಹುಡುಕಿ ಹುಡುಕಿ ಕನ್ನಡ ಟೈಪಿಂಗ್ ಟೂಲ್‌ಗಳನ್ನು, ಆ್ಯಪ್‌ಗಳನ್ನು ಬಳಸುತ್ತಿದ್ದಾರೆ ಮತ್ತು ಆನ್‌ಲೈನ್ ಕನ್ನಡ ಲೋಕದಲ್ಲಿಯೂ ಕನ್ನಡ ಅಕ್ಷರಗಳ ತೋರಣವನ್ನು ಕಟ್ಟುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ, ”ದಯವಿಟ್ಟು ಕಂಗ್ಲಿಷ್ (ಇಂಗ್ಲಿಷ್ ಅಕ್ಷರಗಳಲ್ಲಿ ಕನ್ನಡ ವಾಕ್ಯಗಳನ್ನು ಬರೆಯುವುದು) ನಿಲ್ಲಿಸಿ” ಅನ್ನುವ ಕನ್ನಡ ಕಟ್ಟಾಳುಗಳ, ಕನ್ನಡ ಮನಸ್ಸುಗಳ ಕೋರಿಕೆಗಳ, ಸಲಹೆಗಳ, ಸೂಚನೆಗಳ, ಆದೇಶಗಳ ಪ್ರಮಾಣದಲ್ಲಿ ಕುಸಿತ ಕಂಡಿದೆ. ತಪ್ಪಾದರೂ ಪರವಾಗಿಲ್ಲ, ಕನ್ನಡದಲ್ಲೇ ಟೈಪ್ ಮಾಡುತ್ತೇನೆ ಎಂದು ಪಣ ತೊಡುತ್ತಲೇ, ಕೈಯೊಳಗಿರುವ ಮೊಬೈಲ್ ಫೋನ್ ಮೂಲಕವೇ ಪುಟಗಟ್ಟಲೆ ಲೇಖನಗಳನ್ನು ಟೈಪ್ ಮಾಡುವವರಿದ್ದಾರೆ. ಇಂಥ ಚಟುವಟಿಕೆಗಳು ಮುಖ್ಯವಾಗಿ ನಮಗೆ ಕಾಣಸಿಗುವುದು ವಾಟ್ಸಪ್ ಗ್ರೂಪುಗಳಲ್ಲಿ. ಅಲ್ಲದೆ ಈಗೀಗ, ಫೇಸ್‌ಬುಕ್ ಬಳಕೆದಾರರು ಕೂಡ ಮೊಬೈಲ್‌ನಲ್ಲೇ ಕನ್ನಡ ಟೈಪಿಂಗ್‌ಗೆ ಒಗ್ಗಿಕೊಂಡಿದ್ದಾರೆ. ಇದರರ್ಥ, ಕಂಪ್ಯೂಟರಿನಲ್ಲಿ, ಸ್ಮಾರ್ಟ್ ಫೋನ್‌ಗಳಲ್ಲಿ ಕನ್ನಡ ಬಳಸುವುದು ಹಿಂದಿನಷ್ಟು ಕಷ್ಟವಿಲ್ಲ, ಈಗ ಪರಿಸ್ಥಿತಿ ಬದಲಾಗಿದೆ, ಪ್ರಯೋಗದ ವ್ಯವಸ್ಥೆ ಇನ್ನಷ್ಟು ಸರಳವಾಗಿದೆ. ಇದು ಗಮನಕ್ಕೆ ಬಾರದವರು ಇನ್ನಾದರೂ ಎಚ್ಚೆತ್ತುಕೊಂಡು ನಡೆ ಕನ್ನಡ, ನುಡಿ ಕನ್ನಡ ಮಾತ್ರವಷ್ಟೇ ಅಲ್ಲ, ಬೆರಳ್ ಕನ್ನಡವೂ ಆಗುವಂತೆ ಮಾಡುವುದಕ್ಕೆ ಇದು ಸಕಾಲ.

ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಯುಳ್ಳ ಮೊಬೈಲ್ ಫೋನ್ ಒಡೆಯರಿಗೆ ಈಗಂತೂ ಕನ್ನಡ ಕೀಬೋರ್ಡ್‌ಗಳ ಸುಗ್ಗಿ. ಈಗಾಗಲೇ ಕೆಲವು ಸಾಮಾಜಿಕ ಜಾಲತಾಣಗಳ ಆ್ಯಪ್‌ಗಳಲ್ಲಿಯೂ ಕನ್ನಡ ಟೈಪಿಸುವ ಅವಕಾಶ ನೀಡುತ್ತಿದೆ. ಆಯಾ ಆ್ಯಪ್‌ಗಳಿಗಷ್ಟೇ ಸೀಮಿತವಾಗಿ ಅದರಲ್ಲಿ ಕನ್ನಡ ನುಡಿಯ ಪಡಿ ಮೂಡಿಸಬಹುದು. ಆದರೆ, ಪ್ರತ್ಯೇಕ ಆ್ಯಪ್ ಅಳವಡಿಸಿಕೊಂಡರಂತೂ ನಮಗೆ ಬೇಕುಬೇಕಾದ ಎಲ್ಲ ಆ್ಯಪ್‌ಗಳಲ್ಲಿಯೂ, ವೆಬ್ ತಾಣಗಳಲ್ಲಿಯೂ ಕನ್ನಡದಲ್ಲಿಯೇ ಟೈಪ್ ಮಾಡಬಹುದಾಗಿದೆ. ಇಷ್ಟಲ್ಲದೆ, ಕನ್ನಡದ ಜಾಣ ಜಾಣೆಯರ ಅಂತರ್ಜಾಲ ಪ್ರೇಮವನ್ನು ಸರಿಯಾಗಿಯೇ ಅರ್ಥೈಸಿಕೊಂಡಿರುವ ಜಗತ್ತಿನ ಪ್ರಮುಖ ಸ್ಮಾರ್ಟ್ ಫೋನ್ ಕಂಪನಿಗಳು, ಕನ್ನಡ ಕೀಬೋರ್ಡನ್ನು ತನ್ನದೇ ‘ಲ್ಯಾಂಗ್ವೇಜ್ ಆ್ಯಂಡ್ ಕೀಬೋರ್ಡ್’ ಸೆಟ್ಟಿಂಗ್ಸ್‌ನಲ್ಲೇ ಅಳವಡಿಸಲಾರಂಭಿಸಿವೆ. ಇವೆಲ್ಲ ಲಾಭಗಳೊಂದಿಗೆ, ವೈವಿಧ್ಯಮಯ ಆ್ಯಪ್‌ಗಳ ಭಂಡಾರವಾಗಿರುವ ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಹೋಗಿ, ಸರ್ಚ್ ಬಟನ್‌ನಲ್ಲಿ Kannada+Keyboard ಅಂತ ಬರೆದು ಸರ್ಚ್ ಮಾಡಿದರೆ, ನಿಮಗೇ ಅಚ್ಚರಿಯಾಗುವಷ್ಟು ಕನ್ನಡ ಕೀಬೋರ್ಡ್ ಆ್ಯಪ್‌ಗಳು ಧುತ್ತನೇ ನಿಮ್ಮ ಕಣ್ಮುಂದೆ ಗೋಚರಿಸುತ್ತದೆ. ಅವುಗಳಲ್ಲಿ ಪ್ರಮುಖವಾದವು ಇಲ್ಲಿವೆ:

ಜಸ್ಟ್ ಕನ್ನಡ: ಕನ್ನಡ ಕೀಬೋರ್ಡ್‌ಗಳನ್ನು ಹುಡುಕಿದಾಗ ಕಂಡುಬರುವ ಫಲಿತಾಂಶಗಳಲ್ಲಿ ನಂ.1 ಸ್ಥಾನದಲ್ಲಿರುವುದು ಜಸ್ಟ್ ಕನ್ನಡ ಎಂಬ ಆ್ಯಪ್. ಅದನ್ನು ಅಳವಡಿಸಿಕೊಂಡವರು ಆ್ಯಪ್ ಸೃಷ್ಟಿಕರ್ತರಿಗೆ ಧನ್ಯವಾದ ಹೇಳುತ್ತಲೇ ಇದ್ದಾರೆ. ಆರಂಭದಿಂದಲೂ ಕಾಲ ಕಾಲಕ್ಕೆ ಪರಿಷ್ಕರಣೆಗೊಳ್ಳುತ್ತಲೇ ಬಂದಿರುವ ಈ ಕೀಬೋರ್ಡ್ ಆ್ಯಪ್‌ನಲ್ಲಿ ಹಳೆಗನ್ನಡದ ‘ಳ’ ಅಕ್ಷರ, ಕನ್ನಡದ್ದೇ ಅಂಕಿಗಳನ್ನು ಕೂಡ ಪಡಿಮೂಡಿಸಬಹುದು. ಹೊಸ ಬೆಳವಣಿಗೆ ಎಂದರೆ, ಇದರಲ್ಲಿ ಗೆಸ್ಚರ್ ಇನ್‌ಪುಟ್ ವ್ಯವಸ್ಥೆ ಇದೆ. ಅಂದರೆ, ಆನ್‌ಲೈನ್ ಕೀಬೋರ್ಡ್ ಮೇಲೆ ಕೈಬೆರಳಾಡಿಸುತ್ತಲೇ (ಒಂದು ಪದದ ಮುಂದಿನ ಅಕ್ಷರಗಳನ್ನು ಜೋಡಿಸಲು) ನಾವು ಟೈಪ್ ಮಾಡಬಹುದು.ಈ ಆ್ಯಪ್‌ನ ಅಳವಡಿಕೆಯ ಪ್ರಮಾಣ 10 ರಿಂದ 50 ಲಕ್ಷದಷ್ಟು. ಅಂದರೆ, ಅಷ್ಟು ಮಂದಿ ಈ ಆ್ಯಪ್ ಅಳವಡಿಸಿಕೊಂಡಿದ್ದಾರೆ.

Kannada keyboards Articleಗೂಗಲ್ ಇಂಡಿಕ್ ಕೀಬೋರ್ಡ್: ಕೆಲವು ಪ್ರಮುಖ ಸ್ಮಾರ್ಟ್‌ಫೋನ್ ತಯಾರಿಕಾ ಕಂಪನಿಗಳು ಗೂಗಲ್ ಕಂಪನಿಯೇ ಅಭಿವೃದ್ಧಿಪಡಿಸಿರುವ ಗೂಗಲ್ ಇಂಡಿಕ್ ಕೀಬೋರ್ಡನ್ನು ಫೋನ್‌ಗಳಲ್ಲಿ ಅಳವಡಿಸಿ ನೀಡುತ್ತವೆ. ಅದರಲ್ಲಿ ನಾವು ಕನ್ನಡ ಕೀಬೋರ್ಡ್ ಎನೇಬಲ್ ಮಾಡಬೇಕಷ್ಟೇ. ಇದರಲ್ಲಿನ ವಿಶೇಷತೆಯೆಂದರೆ, ಕೈಬೆರಳಲ್ಲಿ ಫೋನ್ ಸ್ಕ್ರೀನ್ ಮೇಲೆ ಬರೆಯುತ್ತಿರುವಂತೆಯೇ ಕನ್ನಡ ಅಕ್ಷರಗಳು ಮೂಡುತ್ತವೆ. ಅಂದರೆ, ಹ್ಯಾಂಡ್‌ರೈಟಿಂಗ್ ತಂತ್ರಜ್ಞಾನವನ್ನು ಇದು ಬೆಂಬಲಿಸುತ್ತದೆ. ಇದರಲ್ಲಿ ಭಾರತೀಯ ಇತರ ಭಾಷೆಗಳ ಕೀಬೋರ್ಡ್‌ಗಳೂ ಅಡಕವಾಗಿವೆ.

ಲಿಪಿಕಾರ್: ಕನ್ನಡ ಕೀಬೋರ್ಡ್ ಲೋಕದಲ್ಲಿ ಇತ್ತೀಚೆಗೆ ಅಕ್ಷರಶಃ ಸದ್ದು ಮಾಡಿರುವುದು ಲಿಪಿಕಾರ್ ಕೀಬೋರ್ಡ್. ಇದನ್ನು ಅಳವಡಿಸಿಕೊಂಡರೆ ಕನ್ನಡದಲ್ಲಿ ಟೈಪ್ ಮಾಡುವುದಷ್ಟೇ ಅಲ್ಲದೆ, ನಾವು ಕನ್ನಡದಲ್ಲಿ ಹೇಳಿದ್ದನ್ನೂ ಅಕ್ಷರವಾಗಿ ಮೂಡಿಸಿ ತೋರಿಸುತ್ತದೆ. ಇದಕ್ಕೆ ‘ಸ್ಪೀಚ್ ಟು ಟೆಕ್ಸ್ಟ್’ (ಧ್ವನಿಯಿಂದ ಪಠ್ಯ) ತಂತ್ರಜ್ಞಾನ ಅನ್ನುತ್ತಾರೆ. ಇದು ಈಗಷ್ಟೇ ಪ್ರವರ್ಧಮಾನಕ್ಕೆ ಬರುತ್ತಿರುವ ವಿನೂತನ ತಂತ್ರಜ್ಞಾನವಾಗಿದ್ದು, ಕನ್ನಡದ ನಿಖರತೆಗೆ ತೀರಾ ಹತ್ತಿರವಾಗಿದೆ.

ಸ್ವರಚಕ್ರ: ಇದು ಹೊಸದಾಗಿ ಕನ್ನಡ ಟೈಪಿಂಗ್ ಕಲಿಯುವವರಿಗೆ ಸೂಕ್ತವಾಗಬಹುದಾದ ಆ್ಯಪ್. ಅಳವಡಿಸಿಕೊಂಡ ಬಳಿಕ, ಯಾವುದೇ ಪಠ್ಯವನ್ನು ಟೈಪ್ ಮಾಡಬೇಕಿದ್ದರೆ ಕಾಣಿಸಿಕೊಳ್ಳುವ ಆನ್‌ಸ್ಕ್ರೀನ್ ಕೀಬೋರ್ಡ್‌ನಲ್ಲಿ, ನಿರ್ದಿಷ್ಟ ಅಕ್ಷರದ ಮೇಲೆ ಒತ್ತಿದರೆ, ಆ ವ್ಯಂಜನಕ್ಕೆ ಸಂಬಂಧಿಸಿದ ಸ್ವರಾಕ್ಷರಗಳ ಸಂಯೋಗ ಸರಣಿಯ ಅಕ್ಷರಗಳನ್ನು ತೋರಿಸುತ್ತದೆ. ಹಲವು ಭಾಷೆಗಳಲ್ಲಿ ಲಭ್ಯವಿದೆ.

ಇಷ್ಟೇ ಅಲ್ಲದೆ, ಪದ ಕನ್ನಡ, ಸ್ಪರ್ಶ ಕನ್ನಡ, ಕನ್ನಡ ಕೀಬೋರ್ಡ್ (ಈ ಹೆಸರಿನಲ್ಲೇ ಹತ್ತಕ್ಕೂ ಹೆಚ್ಚು ಕನ್ನಡ ಕೀಲಿಮಣೆ ಆ್ಯಪ್‌ಗಳಿವೆ), ಕನ್ನಡ ಈಝೀ ಪ್ಯಾಡ್, ಪಾಣಿನಿ ಕೀಬೋರ್ಡ್, ಕನ್ನಡ ಕೀ, ಅಕ್ಷರ ಕನ್ನಡ, ಎನಿಸಾಫ್ಟ್ ಕನ್ನಡ, ಜಿಬೋರ್ಡ್ (ಗೂಗಲ್‌ನ ಮತ್ತೊಂದು ಕೀಬೋರ್ಡ್ ಗುಚ್ಛ), ಟೈಪ್ ಇನ್ ಕನ್ನಡ, ಕನ್ನಡ ನೋಟ್‌ಪ್ಯಾಡ್, ಕನ್ನಡ ಎಡಿಟರ್ ಮುಂತಾದ ನೂರಾರು ಕನ್ನಡ ಕೀಬೋರ್ಡ್ ಆ್ಯಪ್‌ಗಳಿವೆ.

ಇನ್ನೇಕೆ ತಡ? ಕಂಗ್ಲಿಷ್ ಬಿಡಿರಿ, ಕನ್ನಡ ಹಿಡಿಯಿರಿ!

ಕನ್ನಡ ಕೀಲಿಮಣೆ ಅಳವಡಿಸಿಕೊಳ್ಳುವುದು ಹೇಗೆ?:
ಆಂಡ್ರಾಯ್ಡ್ ಇತ್ತೀಚಿನ ಆವೃತ್ತಿಯ ಫೋನ್‌ಗಳಲ್ಲಿ ಎರಡು ಹಂತಗಳನ್ನು ಅನುಸರಿಸುವ ಮೂಲಕ ಕನ್ನಡ ಕೀಬೋರ್ಡ್ ಅಳವಡಿಸಿಕೊಳ್ಳಬಹುದು. ನಂತರ ಅದನ್ನು ಎನೇಬಲ್ ಮಾಡಿಕೊಳ್ಳಬೇಕಾಗುತ್ತದೆ.

ಹಂತ 1: ಕೀಬೋರ್ಡ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡು ಅಳವಡಿಸಿಕೊಳ್ಳಿ. ಆ್ಯಪ್ ಕ್ಲಿಕ್ ಮಾಡಿದರೆ, ಮುಂದೇನು ಮಾಡಬೇಕೆಂದು ಅದುವೇ ನಿಮ್ಮನ್ನು ಕರೆದೊಯ್ಯುತ್ತದೆ. ಓದಿ ನೋಡಿ, ಕ್ಲಿಕ್ ಮಾಡುತ್ತಾ ಮುಂದುವರಿಯಿರಿ. ಅಥವಾ ಸೆಟ್ಟಿಂಗ್ಸ್‌ನಲ್ಲಿ, ಲ್ಯಾಂಗ್ವೇಜ್ ಆ್ಯಂಡ್ ಇನ್‌ಪುಟ್ ಎಂಬ ವಿಭಾಗಕ್ಕೆ ಹೋಗಿ, ಡೀಫಾಲ್ಟ್ ಕೀಬೋರ್ಡ್ ಎಂಬಲ್ಲಿ ಹೋದರೆ, ಪಟ್ಟಿಯಲ್ಲಿ ನೀವು ಅಳವಡಿಸಿಕೊಂಡ ಕೀಬೋರ್ಡ್ ಆ್ಯಪ್‌ಗಳು ಕಾಣಿಸುತ್ತವೆ. ನಿಮಗೆ ಬೇಕಾಗಿರುವುದನ್ನು ಡೀಫಾಲ್ಟ್ ಕೀಬೋರ್ಡ್ ಆಗಿ ಆಯ್ಕೆ ಮಾಡಿಕೊಳ್ಳಿ.

ಹಂತ 2: Settings > Language & Input ತೆರೆಯಿರಿ. “KEYBOARD & INPUT METHODS” ವಿಭಾಗ ನೋಡಿ, ನಂತರ Current Keyboard > Choose Keyboards ಎಂಬಲ್ಲಿ ನೀವು ಅಳವಡಿಸಿಕೊಂಡ ಕೀಬೋರ್ಡ್ ಹೆಸರು ಕಾಣಿಸುತ್ತದೆ. ಅದನ್ನು ಆಯ್ಕೆ ಮಾಡಿಕೊಂಡರಾಯಿತು.

ವಿಜಯ ಕರ್ನಾಟಕದಲ್ಲಿ ಮಾಹಿತಿ@ತಂತ್ರಜ್ಞಾನ ಅಂಕಣ: ಅವಿನಾಶ್ ಬಿ., 31 ಅಕ್ಟೋಬರ್ 2017, ಮಂಗಳವಾರ

LEAVE A REPLY

Please enter your comment!
Please enter your name here