ಆ್ಯಪ್ ಜತೆಗೆ ಒಂದು ದಿನ

ಕಾಮಿಸಿದ್ದನ್ನು ನೀಡುವ ಕಾಮಧೇನುವಾಗಿ, ಕಲ್ಪಿಸಿದ್ದನ್ನು ಧುತ್ತನೇ ಮುಂದಿಡುವ ಕಲ್ಪವೃಕ್ಷವಾಗಿ, ಚಿಂತಿಸಿದ್ದನ್ನು ಕೊಡುವ ಚಿಂತಾಮಣಿಯಾಗಿ ಅಭೀಪ್ಸಿತಾರ್ಥ ಸಿದ್ಧಿದಾಯಕವಾಗಿ, ಮನೋವೇಗದಿಂದ ಕೆಲಸ ಈಡೇರಿಸಬಲ್ಲ ಸಾಮರ್ಥ್ಯ ತಂತ್ರಜ್ಞಾನಕ್ಕಿದೆ. ಆ್ಯಪ್ ಅಂತ ಸ್ವೀಟಾಗಿ, ಕ್ಯೂಟಾಗಿ ಎಲ್ಲರ ನಾಲಿಗೆಯಲ್ಲಿ ಕುಣಿದಾಡುತ್ತಿರುವ ಈ ಅಪ್ಲಿಕೇಶನ್‌ಗಳೆಂಬ ಭ್ರಾಮಕ ಜಗತ್ತಿನಲ್ಲಿ ಏನಿದೆ, ಏನಿಲ್ಲ? ನಮ್ಮೊಂದು ದಿನದ ಬದುಕಿನ ಬಹುತೇಕ ಎಲ್ಲ ಕ್ಷಣಗಳನ್ನೂ ಈ ಆ್ಯಪ್‌ಗಳೇ ನಿಭಾಯಿಸಬಹುದು. ನಾವು ನೀವು ಸಾಮಾನ್ಯವಾಗಿ ಬಳಸುವ ಫೇಸ್‌ಬುಕ್, ವಾಟ್ಸಾಪ್, ಹ್ಯಾಂಗೌಟ್ಸ್ ಮುಂತಾದವನ್ನು ಹೊರಗಿಟ್ಟು ಇನ್ನೂ ಕೆಲವು ಆ್ಯಪ್‌ಗಳು ನಮ್ಮನ್ನು ಹೇಗೆ ಮುನ್ನಡೆಸುತ್ತವೆ? ಹೀಗೆ ಬನ್ನಿ ತಿಳಿದುಕೊಳ್ಳೋಣ.

ಇದು ಕಿರಿದರಲ್ಲಿ ಪಿರಿದರ್ಥವನು ಆಕಾಂಕ್ಷಿಸುವ, ತುಡಿಯುವ ಯುಗ. ತಂತ್ರಜ್ಞಾನದ ವೈಶಾಲ್ಯದಿಂದಾಗಿ ಜಗತ್ತೇನೋ ಸಂಕುಚಿತವಾಗುತ್ತಿದೆ, ಹಾಗೆಯೇ ಮನಸುಗಳು ಕೂಡ. ಬೆರಳ ತುದಿಯಲ್ಲೇ ಜಗತ್ತು ಎಂಬ ಕ್ಲೀಷೆ ಪದಕ್ಕೆ ಅರ್ಥ ಬರುವ ಸಮಯ. ಮನೋವೇಗದಲ್ಲಿ ಎಲ್ಲವನ್ನೂ ನಿಭಾಯಿಸುವ ತವಕ. ಒಂದು ಪುಟ್ಟ ತಂತ್ರಾಂಶವು ನಮ್ಮ ಜೀವನವನ್ನೇ ನಿಯಂತ್ರಿಸಬಲ್ಲುದು, ರಿಮೋಟ್ ಕಂಟ್ರೋಲರ್‌ನಂತೆ. ತಂತ್ರಜ್ಞಾನವೂ ಅಷ್ಟೆ, ಚಂಚಲ ಮನಸ್ಸಿನಂತೆ. ಸಕಾರಾತ್ಮಕವಾಗಿ ಬಳಸಿದರೆ, ಸದಾ ಸದುಪಯೋಗ, ತಾಳ ತಪ್ಪಿದರೆ ಸಮಯ, ದುಡ್ಡು, ದುಡಿಮೆ ಎಲ್ಲವೂ ವ್ಯರ್ಥ ವ್ಯರ್ಥ. ಸ್ಮಾರ್ಟ್‌ಫೋನ್ ಮತ್ತು ಅದರೊಳಗೆ ಅಂತರ್ವಿಲೀನಗೊಂಡಿರುವ ಆ್ಯಪ್‌ಗಳೆಂಬ ಕಿರು ತಂತ್ರಾಂಶಗಳನ್ನು ಸಮರ್ಥವಾಗಿ ಬಳಸಿದರೆ, ದೈನಿಕ ಬದುಕು ನಿರಾಳ, ಸುಲಲಿತ.

ಒಂದು ಪುಟ್ಟ ಆ್ಯಪ್ ವ್ಯಕ್ತಿಯೊಬ್ಬನ ನಿರ್ದಯ ಹತ್ಯೆಗೂ ಕಾರಣವಾಗಬಹುದು ಎಂದು ತೋರಿಸಿಕೊಟ್ಟದ್ದು, ಇತ್ತೀಚೆಗೆ ಫೇಸ್‌ಬುಕ್‌ನಲ್ಲಿ ತನ್ನ ಗೆಳತಿಗೆ ‘ಪೋಕ್’ ಮಾಡಿದ ತನ್ನ ಗೆಳೆಯನನ್ನೇ ವ್ಯಕ್ತಿಯೊಬ್ಬ ಕೊಂದ ಕಥೆ ಕೇಳಿದಾಗ. ಆ ಒಂದು ಪುಟ್ಟ ಆ್ಯಪ್‌ನಿಂದ ದೊಡ್ಡ ಕ್ರಾಂತಿಯೇ ಆಗಬಹುದು ಎಂಬುದಕ್ಕೆ ಉದಾಹರಣೆ, ಟ್ಯಾಕ್ಸಿ ಸೇವೆ ನೀಡುವ ಉಬರ್ ಆ್ಯಪ್ ವಿರುದ್ಧ ಯೂರೋಪ್‌ನಲ್ಲಿ ಖಾಸಗಿ ಟ್ಯಾಕ್ಸಿ ಮಾಲೀಕರು ದೊಡ್ಡ ಪ್ರತಿಭಟನೆಯನ್ನೇ ನಡೆಸಿದಾಗ ಮತ್ತು ಭಾರತದಲ್ಲಿಯೂ ಇತ್ತೀಚೆಗೆ ಆ್ಯಪ್ ಆಧಾರಿತ ಟ್ಯಾಕ್ಸಿ ಸೇವೆಗಳಿಗೆ ಕಡಿವಾಣ ಹಾಕಿದಾಗ. ಕೇವಲ ಒಂದು ಮೆಸೆಂಜರ್ ಆ್ಯಪ್ ಮೂಲಕ ಒಂದು ಸಂಬಂಧವೇರ್ಪಟ್ಟು, ಮದುವೆಯಾದ, ವಿವಾಹ ಮಂಟಪದಿಂದಲೇ ಮದುವೆ ಮುರಿದ ಘಟನೆಗಳನ್ನೂ ಕೇಳಿದ್ದೇವೆ; ನಾಪತ್ತೆಯಾದವರನ್ನು ಹುಡುಕಿದ್ದೇವೆ; ಸಹಾಯ ಯಾಚಿಸಿದವರಿಗೆ ವಿಶ್ವಾದ್ಯಂತ ನೆರವು ಹರಿದು ಬಂದಿದೆ. ಸಂಕಷ್ಟದಲ್ಲಿದ್ದವರು ಎದ್ದು ಬಂದಿದ್ದಾರೆ, ಆದರೂ ಇದು ಮಿಥ್ಯಾ ವಾಸ್ತವದ ಲೋಕ. ವರ್ಚುವಲ್ ರಿಯಾಲಿಟಿ.

***

ನಸುಕಿನ ಜಾವ 5 ಗಂಟೆ
ಅಲಾರಂ
Alarm Clock Free
ಬೆಳಗ್ಗೆ ಐದು ಗಂಟೆಗೇ ನಿಮ್ಮ ದಿನಚರಿ ಆರಂಭವಾಗುವುದೇ ಈ ಅಲಾರಂ ಆ್ಯಪ್ ಮೂಲಕ. ಕಾಂಕ್ರೀಟು ಕಾಡಿನ ನಾಡಿನಲ್ಲಿ ಹಕ್ಕಿಗಳ ಚಿಲಿಪಿಲಿ ಕೇಳುತ್ತಲೇ ಹಾಸಿಗೆಯಿಂದೇಳುವ ಅವಕಾಶ ಒದಗಿಸುತ್ತದೆ. ಈ ಆ್ಯಪ್‌ನಲ್ಲಿ ಕೋಗಿಲೆಯ ಧ್ವನಿ, ಹಕ್ಕಿಗಳ ಕಲರವ, ಕೋಳಿಯ ಕೂಗು, ಶಾಲೆಯ ಗಂಟೆ, ಡಿಜಿಟಲ್ ಧ್ವನಿ… ಹೀಗೆ ನಿಮಗೆ ಬೇಕಾದ ಧ್ವನಿಯನ್ನು ಹೊಂದಿಸಿಕೊಳ್ಳಬಹುದು. Alarm ಅಂತ ಯಾವುದೇ ಆ್ಯಪಲ್, ಆಂಡ್ರಾಯ್ಡ್, ವಿಂಡೋಸ್ ಫೋನ್‌ಗಳ ಆ್ಯಪ್ ಸ್ಟೋರ್‌ಗಳಲ್ಲಿ ಹುಡುಕಿದರೆ ನೂರಾರು ಆ್ಯಪ್‌ಗಳು ದೊರೆಯುತ್ತವೆ.

ವ್ಯಾಯಾಮ
ಎದ್ದು ಮುಖ ಮಾರ್ಜನವಾದ ಬಳಿಕ ದೇಹಕ್ಕೆ ವ್ಯಾಯಾಮ ಬೇಕಾಗುತ್ತದೆ. ಕನಿಷ್ಠ ಮುಕ್ಕಾಲು ಗಂಟೆ ದೇಹವನ್ನು ದಣಿಸಿದರೆ, ಬೆವರು ಸುರಿಸಿದರೆ ಇಡೀ ದಿನ ತಾಜಾತನ ಇರುತ್ತದೆ ಮಾತ್ರವಲ್ಲದೆ, ದೇಹಕ್ಕೆ ದಷ್ಟ ಪುಷ್ಟವಾದ, ಕಟ್ಟು ಮಸ್ತಾದ ಆಕಾರವನ್ನೂ ನೀಡಬಹುದು. ಯೋಗ ಅಥವಾ ಬೇರೆ ಫಿಟ್ನೆಸ್ ಆ್ಯಪ್‌ಗಳನ್ನು ನೀವು ಆಯ್ಕೆ ಮಾಡಿಕೊಳ್ಳಬಹುದು.

Daily Yoga – Fitness On-the-Go
ಯೋಗ ಮಾಡುವವರಾದರೆ ನಿಮಗಿದು ಉಪಯುಕ್ತ. 50ಕ್ಕೂ ಹೆಚ್ಚು ಯೋಗ ತರಗತಿಗಳು ಇದರಲ್ಲಿವೆ. ಹಂತ ಹಂತದ ಸೂಚನೆಗಳು ಗಮನ ಸೆಳೆಯುತ್ತವೆ. ಆರಂಭಿಕರಿಗೆ, ಫಿಟ್ನೆಸ್‌ಗಾಗಿ, ಬಲ ವರ್ಧನೆಗೆ, ತೂಕ ಇಳಿಸಲು, ದೇಹದ ಬಾಗು-ಬಳುಕುತನ ಕಾಯ್ದುಕೊಳ್ಳಲು, ದೇಹದ ಆರಾಮಕ್ಕೆ, ಸಮತೋಲನಕ್ಕೆ ಹಾಗೂ ಋತುಚಕ್ರದ ಸಮಯದ ಯೋಗ… ಹೀಗೆ ವೈವಿಧ್ಯಮಯ ಆಯ್ಕೆಗಳಿಲ್ಲಿವೆ.

Workout Trainer
ಕಟ್ಟು ಮಸ್ತಾದ ಮೈಕಟ್ಟು ಜತೆಗೆ macho ಮೈಮಾಟ ನಿಮ್ಮದಾಗಬೇಕೆ? ಇದಕ್ಕೆ ನೆರವಾಗುವ ಆ್ಯಪ್ ಇದು. ಹೇಗೆ ಮಾಡಬೇಕೆಂಬ ಆಡಿಯೋ, ಫೋಟೋ, ವೀಡಿಯೋ ಸೂಚನೆಗಳು ಕೂಡ ಇದರಲ್ಲಿವೆ. ನೀವು ದೇಹಾಭ್ಯಾಸದಲ್ಲಿ ನಿರತರಾದಾಗ ಇಷ್ಟದ ಹಾಡುಗಳನ್ನು ಪ್ಲೇ ಮಾಡುವ ಅವಕಾಶವೂ ಇದರಲ್ಲಿದೆ. ಫಿಟ್ನೆಸ್ ಗುರಿ ನಿರ್ಧರಿಸಿಕೊಂಡು, ವ್ಯಾಯಾಮ ಶುರುಹಚ್ಚಿಕೊಳ್ಳಬಹುದು.

BMI Calculator – Weight Loss
ನಮ್ಮ ವಯಸ್ಸು ಹಾಗೂ ಉದ್ದಕ್ಕೆ ತಕ್ಕಂತೆ ದೇಹ ತೂಕವೆಷ್ಟಿರಬೇಕು, ಅದನ್ನು ಸುಧಾರಿಸಲು ಏನೆಲ್ಲಾ ಬೇಕು ಎಂದು ತಿಳಿಸಿಕೊಡುವ ಆ್ಯಪ್ ಇದು. ಬಿಎಂಐ ಅಂದರೆ ಬಾಡಿ ಮಾಸ್ ಇಂಡೆಕ್ಸ್ (ದೇಹ ಸಾಂದ್ರತೆಯ ಸೂಚಿ)ಯ ಮೂಲಕ ದೇಹತೂಕ ಇಳಿಸಿಕೊಳ್ಳುವ ವ್ಯಾಯಾಮ ಮತ್ತಿತರ ದೇಹಾಭ್ಯಾಸ ಮಾಡುವಾಗ, ನಿರ್ದಿಷ್ಟ ಗುರಿ ಇರಿಸಿಕೊಳ್ಳಲು ಇದು ಅನುಕೂಲ.

***

ಬೆಳಗ್ಗೆ 7.00
ಬೆಳಗಿನ ಹೊತ್ತು ಸ್ನಾನ ಮುಗಿಸಿ ಆಹ್ಲಾದಕರವಾದ ಒಂದಷ್ಟು ಹಾಡು, ಸಂಗೀತ ಕೇಳಿದರೆ ದಿನವಿಡೀ ಉಲ್ಲಾಸದಿಂದಿರಬಹುದು. ಜತೆಗೇ ಪತ್ರಿಕೆಗಳ ಮೇಲೆ ಕುಳಿತಲ್ಲೇ ಕಣ್ಣಾಡಿಸಿದರೆ, ಜಗತ್ತಿನ ಆಗುಹೋಗು ತಿಳಿದುಕೊಳ್ಳಬಹುದು.

ಆನ್‌ಲೈನ್ ಸಂಗೀತ ಕೇಳಲು
Saavn
ಇಂಟರ್ನೆಟ್ ಮೂಲಕ ಒಳ್ಳೆಯ ಸಂಗೀತ, ಸಿನಿಮಾ ಹಾಡುಗಳು, ಶಾಸ್ತ್ರೀಯ ಸಂಗೀತ… ಮುಂತಾದವನ್ನು ಕೇಳುತ್ತಾ ಮನ ತಣಿಸಿಕೊಳ್ಳಿ. ಜತೆಗೆ, Gaana, Raaga, Hungama ಮುಂತಾದ ಆ್ಯಪ್‌ಗಳೂ ಇವೆ. Radio India ಎಂಬ ಆ್ಯಪ್ ಭಾರತೀಯರಿಗೆ ಇಷ್ಟವಾಗುವ ಎಲ್ಲ ವಿಧದ ಹಾಡುಗಳನ್ನು, ರೇಡಿಯೋ ಚಾನೆಲ್‌ಗಳನ್ನು ಒದಗಿಸುತ್ತದೆ. ಸಂಗೀತ ಕೇಳುತ್ತಲೇ ಸುದ್ದಿಯ ಮೇಲೂ ಕಣ್ಣು ಹಾಯಿಸಬೇಕಲ್ಲವೇ?

Vijay Karnataka
ನಿಮ್ಮ ನೆಚ್ಚಿನ ವಿಜಯ ಕರ್ನಾಟಕವನ್ನು ಸ್ಮಾರ್ಟ್‌ಫೋನ್‌ನಲ್ಲಿ ನೋಡಬಹುದು. ಅದರದ್ದೇ ಆ್ಯಪ್ ಇದೆ. ಜತೆಗೆ, ಬೇರೆ ಬೇರೆ ಭಾಷೆಗಳ ಪತ್ರಿಕೆಗಳ ಸುದ್ದಿಯನ್ನು ಓದಲು, ಆಯಾ ತಾಣಗಳ ಲಿಂಕ್ ನೀಡುವ ಆ್ಯಪ್‌ಗಳೂ ಇವೆ. Kannada News ಮತ್ತು News Hunt ಎಂಬ ಸುದ್ದಿಯ ಅಗ್ರಿಗೇಟರ್ ಬಳಸಬಹುದು. ಟೈಮ್ಸ್ ಆಫ್ ಇಂಡಿಯಾ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡರೆ, ಇಂಗ್ಲಿಷ್ ಸುದ್ದಿ ಮಾತ್ರವಲ್ಲದೆ, ಟೈಮ್ಸ್ ನೌ ಚಾನೆಲ್ ಲೈವ್ ಆಗಿ ನೋಡಬಹುದಾಗಿದೆ. Feedly ಎಂಬ ಆ್ಯಪ್ ಬಳಸಿದರೆ, ನಮಗೆ ಬೇಕಾದ ಪತ್ರಿಕೆಯ ಸುದ್ದಿಯ ಫೀಡ್ ಅನ್ನು ನಾವೇ ತರಿಸಿಕೊಳ್ಳಬಹುದು.

CricBuzz
ಆಸ್ಟ್ರೇಲಿಯಾದಲ್ಲಿ ಭಾರತ ಕ್ರಿಕೆಟ್ ತಂಡವು ಪ್ರವಾಸದಲ್ಲಿದೆ. ಅದರ ಸ್ಕೋರ್ ಏನಾಯಿತು, ಯಾರು ಆಡುತ್ತಿದ್ದಾರೆ? ಕ್ಷಣ ಕ್ಷಣದ ಮಾಹಿತಿ ತಿಳಿದುಕೊಳ್ಳಬೇಕಲ್ಲಾ… CricBuzz, Go Cricket ಮುಂತಾದ ಆ್ಯಪ್‌ಗಳಿವೆ.

ದೂರದಲ್ಲಿರುವ ಪ್ರೀತಿಪಾತ್ರರೊಂದಿಗೆ ವೀಡಿಯೋ ಸಂಭಾಷಣೆಗೆ Skype
ವಿದೇಶ ಅಥವಾ ಬೇರೆ ಊರಿನಲ್ಲಿರುವ ನಿಮ್ಮ ಪ್ರೀತಿಪಾತ್ರರು, ಮಕ್ಕಳು, ಬಂಧುಗಳು ಅಥವಾ ಕಚೇರಿ ಸಹೋದ್ಯೋಗಿಗಳೊಂದಿಗೆ ಕಾನ್ಫರೆನ್ಸ್ ಕರೆಯಲ್ಲಿ ಪಾಲ್ಗೊಳ್ಳಲು ಈ ಆ್ಯಪ್ ಉಪಯುಕ್ತ. ಇಂಟರ್ನೆಟ್ ಸಂಪರ್ಕವಿದ್ದರೆ, ಮೊಬೈಲ್ ಮೂಲಕ ಉಚಿತವಾಗಿ ವೀಡಿಯೋ ಸಂಭಾಷಣೆ ನಡೆಸಬಹುದು. ವೈಬರ್, ನಾನು, ಗೂಗಲ್ ಹ್ಯಾಂಗೌಟ್ಸ್ ಎಂಬ ಇತರ ಆ್ಯಪ್‌ಗಳೂ ಇದೇ ಸೇವೆ ನೀಡುತ್ತವೆ. ಕರೆಯಲ್ಲಿ ಭಾಗವಹಿಸುವವರೆಲ್ಲರೂ ಒಂದೇ ಆ್ಯಪ್ ಹೊಂದಿರಬೇಕಾದುದು ಅವಶ್ಯ.

***

ಬೆಳಗ್ಗೆ 8.00
ಅಮೆರಿಕದಲ್ಲಿರೋ ಮಗನ ಜತೆ ವೈಬರ್‌ನಲ್ಲಿ ಮಾತನಾಡಿದ್ದಾಯಿತು. ನಂತರ ತಿಂಡಿ ತಿನ್ನುತ್ತಲೇ, ಆ ದಿನ ಮಾಡಬೇಕಾದ ಕೆಲಸಗಳನ್ನು ಪಟ್ಟಿ ಮಾಡಬೇಕಲ್ಲಾ? ಯಾವ ಕೆಲಸವೂ ಬಾಕಿ ಇರಿಸದಿದ್ದರೆ, ನಿಮ್ಮ ಮನಸ್ಸಿಗೂ ನೆಮ್ಮದಿ ಇರುತ್ತದೆ. ಕೆಲಸದ ಒತ್ತಡ ನಡುವೆ, ಇದನ್ನು ಪದೇ ಪದೇ ಜ್ಞಾಪಿಸುವವರು ಯಾರು? ಸಂಜೆ ಬರುವಾಗ ಮನೆಗೆ ಬೇಕಾದ ಸಾಮಾನು ತರಬೇಕಾಗುತ್ತದೆ. ಅದನ್ನೂ ಪಟ್ಟಿ ಮಾಡಿಕೊಳ್ಳಬೇಕು. ಕಾಗದ, ಪೆನ್ನು ಹುಡುಕುವುದೆಲ್ಲಿ? ಇದೆಯಲ್ಲ ಸ್ಮಾರ್ಟ್‌ಫೋನ್… ಕೈಗೆತ್ತಿಕೊಳ್ಳಿ.

Google Keep
ಮಾಡಬೇಕಾದ ಕೆಲಸ ಕಾರ್ಯಗಳನ್ನು, ಅಥವಾ ವಿರಾಮದ ವೇಳೆಯಲ್ಲಿ ನಿರ್ದಿಷ್ಟ ವಿಷಯದ ಕುರಿತು ಲೇಖನ ಬರೆಯಬೇಕೆಂದಾದರೆ, ಟಿಪ್ಪಣಿ ಮಾಡಿಕೊಳ್ಳಲು ಅನುಕೂಲ ಮಾಡಿಕೊಡುತ್ತದೆ ಗೂಗಲ್‌ನ ಕೀಪ್ ಎಂಬ ಈ ಆ್ಯಪ್. ಧ್ವನಿ ಮೂಲಕ ನೀವು ಆದೇಶಿಸಿದರೂ ಅದು ತಾನಾಗಿ ಬರೆದುಕೊಳ್ಳುತ್ತದೆ. ಆಯಾ ಕೆಲಸಗಳಿಗೆ ನಿರ್ದಿಷ್ಟ ಸಮಯ ನಿಗದಿಪಡಿಸಿಟ್ಟರೆ, ಆ ಸಮಯಕ್ಕೆ ನಿಮ್ಮನ್ನು ಟ್ರಿಣ್ ಅಂತ ಎಚ್ಚರಿಸುತ್ತದೆ.

ದಂತ ವೈದ್ಯರ ಅಪಾಯಿಂಟ್‌ಮೆಂಟ್‌ಗೆ
Colgate Oral Care Center
ಓಹ್, ಪತ್ನಿಗೆ ಹಲ್ಲು ನೋವೆಂದು ಹೇಳಿದ್ದಳಲ್ಲ ನಿನ್ನೆ ರಾತ್ರಿ? ಇವತ್ತು ಡಾಕ್ಟರ್ ಅಪಾಯಿಂಟ್‌ಮೆಂಟ್ ತಗೊಳ್ಳಲೇಬೇಕು. ಈಗ ಡಾಕ್ಟರನ್ನು ಹುಡುಕಿ, ಅಲ್ಲಿ ಹೋಗಿ ಭೇಟಿಗೆ ಕಾಯುವಷ್ಟು ಸಮಯವಿಲ್ಲ. ಮೊಬೈಲಲ್ಲೇ ಈ ಆ್ಯಪ್ ತೆರೆದು ನೋಡಿದರೆ, ನಿಮ್ಮ ಮನೆಯ ಸಮೀಪದಲ್ಲೇ ಯಾರು ದಂತ ವೈದ್ಯರಿದ್ದಾರೆ ಎಂದು ತಿಳಿದುಕೊಂಡು, ಅವರ ಸಲಹೆ ಪಡೆಯಲು ಅವರ ಭೇಟಿಗೆ ಅಪಾಯಿಂಟ್‌ಮೆಂಟ್ ತೆಗೆದುಕೊಳ್ಳಬಹುದು. ಹಲವು ದಂತ ವೈದ್ಯರೂ ಇದರಲ್ಲಿ ನೋಂದಾಯಿಸಿಕೊಂಡಿರುವುದರಿಂದ ಮತ್ತು ಕೆಲವರು ಉಚಿತ ದಂತ ತಪಾಸಣೆಯನ್ನೂ ನಡೆಸುತ್ತಾರೆ.

***

ಬೆಳಗ್ಗೆ 9.00
ಮನೆಯಲ್ಲಿರೋ ಹಿರಿಯರಿಗೆ ಸಕ್ಕರೆ ಕಾಯಿಲೆಯಿದೆ. ಜೀವನಶೈಲಿಯಲ್ಲಿ ಭಾರಿ ಬದಲಾವಣೆಯಾಗಿರುವುದರಿಂದ ಈಗಂತೂ ಮಧುಮೇಹ ಇಲ್ಲದ ಮನೆಗಳು ತುಂಬಾ ಕಡಿಮೆ. ಅಂತೆಯೇ ಪತ್ನಿಗೆ ದೇಹ ತೂಕ ಇಳಿಸಬೇಕೆಂಬ ಆಕಾಂಕ್ಷೆ ಇದೆ. ನಿಮಗೂ ಸ್ವಲ್ಪ ದೇಹತೂಕ ಏರಿದೆ ಅಂತ ಅನ್ನಿಸುತ್ತಿದೆ. ದೇಹ ತೂಕ ಹೆಚ್ಚಾದರೆ, ಆರೋಗ್ಯ ಸಮಸ್ಯೆಗಳು ಒಂದೊಂದಾಗಿ ಕಾಡಲಾರಂಭಿಸುತ್ತವೆ. ಹೆಚ್ಚು ಶ್ರಮವಿಲ್ಲದೆ ಏನಾದರೂ ಮಾಡಬೇಕಲ್ಲ. ಏನನ್ನು ತಿನ್ನಬಾರದು, ಯಾವುದನ್ನು ಸೇವಿಸಿದರೆ ಒಳಿತು, ಏನು ಮಾಡಬೇಕು ಅಂತೆಲ್ಲಾ ತಿಳಿದುಕೊಂಡು ಹೇಳಬೇಕಲ್ಲ? ಅದನ್ನು ಹೇಳಿಕೊಡಲು ಇದೆ ನೋಡಿ ಆ್ಯಪ್.

Blood Sugar Test
ರಕ್ತದಲ್ಲಿನ ಗ್ಲುಕೋಸ್ ಪ್ರಮಾಣವನ್ನು ಹಿಡಿತದಲ್ಲಿಟ್ಟುಕೊಂಡರೆ ಬದುಕು ಸುಲಲಿತ. ರಕ್ತದ ಸಕ್ಕರೆ ಪ್ರಮಾಣ ತಗ್ಗಿಸಲು ಹಾಗೂ ಮನೋದ್ವೇಗ ಶಮನ ಮಾಡಿಕೊಳ್ಳಲು ಟಿಪ್ಸ್ ಈ ಆ್ಯಪ್‌ನಲ್ಲಿದೆ. ತೂಕ ಕಳೆದುಕೊಳ್ಳುವುದಕ್ಕೆ ಸಲಹೆಯಿದೆ. ಹಾಗಂತ ಇದು, ಟೆಸ್ಟ್ ಮಾಡುವ ಆ್ಯಪ್ ಅಲ್ಲ. ಸಕ್ಕರೆ ನಿಯಂತ್ರಣ ಹೇಗೆ ಎಂಬ ಬಗ್ಗೆ ಪೂರ್ಣ ಮಾಹಿತಿ ಇರುವ ಇ-ಬುಕ್. ಇದನ್ನು ಓದಿಕೊಂಡರೆ ಸಾಕಷ್ಟು ಸಲಹೆಗಳು ದೊರೆಯುತ್ತವೆ. ಓದಿ ಅವರಿಗೂ ಹೇಳಿಬಿಡಿ. ಇದು ವೈದ್ಯರಿಗೆ ಪರ್ಯಾಯವಲ್ಲ ಎಂಬುದನ್ನು ಗಮನಿಸಿ.

Diet Plan – Weight Loss 7 Days
ಬೊಜ್ಜು ಸರ್ವೇ ಸಾಮಾನ್ಯ. ನಿಯಂತ್ರಣವೇ ಏಕೈಕ ಮಾರ್ಗ. ಹೇಗೆ, ಏನು ಎತ್ತ ಎಂಬ ಮಾಹಿತಿಯನ್ನು ನಿಮಗೆ ತಿಳಿಸಿಕೊಡುತ್ತದೆ ಈ ಆ್ಯಪ್. ರುಚಿಕರವಾದ ಆದರೆ ಕಡಿಮೆ ಕ್ಯಾಲೊರಿ ಇರುವ ಆಹಾರ ಯಾವುದು, ಅದನ್ನು ಸೇವಿಸಿದರೆ ಒಂದು ವಾರದಲ್ಲಿ ಇಂತಿಷ್ಟು ಕಿಲೋ ದೇಹತೂಕ ಇಳಿಸಬಹುದು ಎಂದೂ ಹೇಳುತ್ತದೆ ಇದು. ನಿಮ್ಮ ದಿನದ ಡಯಟ್ ಪ್ಲ್ಯಾನ್ ಮಾಡಲು ಸೂಕ್ತ. ಇಂಥ ಹಲವು ಆ್ಯಪ್‌ಗಳಿವೆ. Weight Loss ಅಂತ ಸರ್ಚ್ ಮಾಡಿದರೆ, ಸಾಕಷ್ಟು ಲಭ್ಯ.

***

ಬೆಳಗ್ಗೆ 10.00
ಆಫೀಸಿಗೆ ಹೊರಡಬೇಕು. ಅದಕ್ಕೆ ಮೊದಲು, ಡಯಾಬಿಟಿಸ್ ಮತ್ತು ದೇಹತೂಕಕ್ಕೆ ಕಡಿವಾಣ ಹಾಕುವ ಆಹಾರವೇ ಇದ್ದರೆ ಒಳ್ಳೆಯದು. ಹೀಗಾಗಿ, ಆ ದಿನ ಏನು ಅಡುಗೆ ಮಾಡಬೇಕು? ಯಾವ ಆಹಾರ ತಿಂದರೆ ಎಷ್ಟು ಕ್ಯಾಲೊರಿ ಸೇವಿಸಿದಂತಾಗುತ್ತದೆ ಅಂತೆಲ್ಲಾ ನಿಮ್ಮ ಮನೆಯ ಅಡುಗೆಯವಳಿಗೂ ತಿಳಿಹೇಳಬೇಕಲ್ಲ.

Calorie Counter – MyFitnessPal
ಈ ಆ್ಯಪ್ ಅಳವಡಿಸಿಕೊಳ್ಳಿ. ಯಾವ ಆಹಾರದಲ್ಲಿ ಎಷ್ಟು ಕ್ಯಾಲೊರಿ ಇದೆ, ಆಯಾ ದಿನ ಸೇವಿಸಿದ ಒಟ್ಟು ಕ್ಯಾಲೊರಿ ಪ್ರಮಾಣ ಎಷ್ಟು ಎಂದೆಲ್ಲಾ ತಿಳಿಸುತ್ತದೆ ಈ ಆ್ಯಪ್. 30 ಲಕ್ಷಕ್ಕೂ ಹೆಚ್ಚು ವ್ಯಂಜನಗಳು, 350ಕ್ಕೂ ಹೆಚ್ಚು ವ್ಯಾಯಾಮದ ಮಾಹಿತಿ ಇದರಲ್ಲಿದೆ. ನಾವೇನು ತಿನ್ನುತ್ತಿದ್ದೇವೆ ಎಂದು ತಿಳಿದುಕೊಂಡು ತೂಕ ಇಳಿಸಿಕೊಳ್ಳಲು ಇದು ನೆರವಾಗುತ್ತದೆ.

ಭಾರತೀಯ ಆಹಾರದ ಕ್ಯಾಲೊರಿ ತಿಳಿಯಲು Desi Calorie Meter
ಈ ಆ್ಯಪ್, ವಿಶೇಷವಾಗಿ ಭಾರತೀಯ ಆಹಾರದಲ್ಲಿರುವ ಕ್ಯಾಲೊರಿ ಕುರಿತ ಮಾಹಿತಿ ನೀಡುತ್ತದೆ. ಕ್ಯಾಲೊರಿ ಚೆಕ್ ಮಾಡುವುದಷ್ಟೇ ಅಲ್ಲದೆ, ನೀವು ಎಷ್ಟು ವ್ಯಾಯಾಮ ಮಾಡಿದರೆ ಎಷ್ಟು ಕ್ಯಾಲೊರಿ ಬರ್ನ್ ಆಗುತ್ತದೆ, ಯಾವ ಆಹಾರದಲ್ಲಿ ಎಷ್ಟು ಪೋಷಕಾಂಶ ಇದೆ ಎಂಬ ಮಾಹಿತಿಯನ್ನೂ ನೀಡುತ್ತದೆ.

***

ಬೆಳಗ್ಗೆ 10.30
ಕಚೇರಿಗೆ ಹೊರಡುವ ಸಮಯವಾಯಿತಲ್ಲ? ಹೋಗಲು ತಕ್ಷಣವೇ ಒಂದು ಟ್ಯಾಕ್ಸಿ ಬುಕ್ ಮಾಡಬೇಕಿದೆ. ಆಟೋದವರು ಅಲ್ಲಿ ಬರಲ್ಲ, ಇಲ್ಲಿ ಬರಲ್ಲ ಅನ್ನುತ್ತಾರೆ. ತುರ್ತಾಗಿ ವಾಹನ ಬೇಕು, ಬೆಳಗ್ಗೆ ಹೊತ್ತು ಬಾಡಿಗೆಗಾಗಿ ತಕರಾರು ಮಾಡಿ ಮನಸ್ಸು ಹಾಳು ಮಾಡಿಕೊಳ್ಳುವುದಕ್ಕೆ ನಿಮಗೂ ಮನಸ್ಸಿರುವುದಿಲ್ಲ. ಟ್ಯಾಕ್ಸಿ ಆ್ಯಪ್‌ಗಳಿವೆಯಲ್ಲ.

Ola Cabs
ರಜೆಯಿದ್ದರೆ ನಗರದಲ್ಲೇ ಸುತ್ತಾಡಲು ಏನೋ ಪ್ಲಾನ್ ಮಾಡಿರುತ್ತೀರಿ ಅಥವಾ ಕಚೇರಿ ಕಾರ್ಯ ನಿಮಿತ್ತವೋ, ಏರ್‌ಪೋರ್ಟ್ ಅಥವಾ ಬಸ್ಸು, ರೈಲು ನಿಲ್ದಾಣಕ್ಕೋ ತುರ್ತಾಗಿ ಹೋಗಬೇಕಿರುತ್ತದೆ. ಇದಕ್ಕೂ ಕೂಡ ತಕ್ಷಣದ ಸೇವೆ ಒದಗಿಸಲು ಓಲಾ ಕ್ಯಾಬ್ಸ್, ಮೇರು ಕ್ಯಾಬ್ಸ್, ಟ್ಯಾಕ್ಸಿ ಫಾರ್ ಶ್ಯೂರ್, ಉಬೆರ್ ಮುಂತಾದ ಸಾಕಷ್ಟು ಆ್ಯಪ್‌ಗಳಿವೆ.

ಬಿಲ್ ಕಟ್ಟಬೇಕಿತ್ತಲ್ಲಾ Mobile One ಇದೆ
ಟ್ಯಾಕ್ಸಿಯಲ್ಲಿ ಕುಳಿತಿದ್ದೀರಿ… ಕಚೇರಿ ತಲುಪುವುದು ಅರ್ಧ ಗಂಟೆ ಆಗುತ್ತದೆ. ಸಮಯ ಸದುಪಯೋಗ ಮಾಡಿಕೊಳ್ಳಿ. ಮನೆಯ ಎಲೆಕ್ಟ್ರಿಸಿಟಿ ಬಿಲ್ ಹಾಗೂ ನೀರಿನ ಬಿಲ್ ಕಟ್ಟಬೇಕು. ನಿಮ್ಮ ಮತ್ತು ನಿಮ್ಮ ಪತ್ನಿಯ ಮೊಬೈಲ್‌ಗೆ ಕರೆನ್ಸಿ ಹಾಕಿಸಿಕೊಳ್ಳಬೇಕು ಅಂತ ನೆನಪಾಯಿತಲ್ಲಾ? ಇದರಲ್ಲೇ ಕಟ್ಟಿಬಿಡಿ. ಮನೆಯಲ್ಲಿರೋ ವಾಹನದ ರಿಜಿಸ್ಟ್ರೇಶನ್ ಸರ್ಟಿಫಿಕೇಟ್ (ಆರ್‌ಸಿ) ಬುಕ್ ಎಲ್ಲೋ ಮಿಸ್ ಆಗಿದೆ, ಅದರ ನಕಲು ಪ್ರತಿಯನ್ನು ಆರ್‌ಟಿಒದಿಂದ ತರಿಸಿಕೊಳ್ಳಬೇಕಲ್ಲ. ಹಲವು ಸೇವೆಗಳು ಇದರಲ್ಲಿವೆ.

Recharge Plans, Packs, Offers
Paytm, FreeCharge ಮುಂತಾದವುಗಳಂತೆಯೇ ಮೊಬೈಲ್ ಕರೆನ್ಸಿ ಹಾಕಿಸಿಕೊಳ್ಳಲು, ಈ ಆ್ಯಪ್ ಕೂಡ ವೈವಿಧ್ಯಮಯ ಆಫರ್‌ಗಳನ್ನು ತಿಳಿದುಕೊಳ್ಳಲು ಉಪಯುಕ್ತ. ಕ್ರೆಡಿಟ್ ಕಾರ್ಡ್ ಅಥವಾ ಇಂಟರ್ನೆಟ್ ಬ್ಯಾಂಕಿಂಗ್ ವ್ಯವಸ್ಥೆ ಇದ್ದರೆ ಸಾಕು. ಕುಳಿತಲ್ಲೇ ಎಲ್ಲವನ್ನೂ ನಿಭಾಯಿಸಬಹುದು.

Google Now: ಇಮೇಲ್ ‘ಹೇಳಿದರೆ’ ಸಾಕು, ಟೈಪ್ ಕೂಡ ಮಾಡಬೇಕಿಲ್ಲ
ಇನ್ನೂ ಕಾಲು ಗಂಟೆಯಿದೆ. ಇದು ನೀವು ಹೇಳಿದ್ದನ್ನು ಕೇಳುವ, ಆಪ್ತ ಸಹಾಯಕ ಆ್ಯಪ್. ಆ್ಯಪಲ್‌ನ ಸಿರಿ ಹಾಗೂ ವಿಂಡೋಸ್‌ನಲ್ಲಿ Cortana ಇದ್ದರೆ, ಆಂಡ್ರಾಯ್ಡ್‌ನಲ್ಲಿ ಗೂಗಲ್ ನೌ ಇದೆ. ಸಮೀಪ ಒಳ್ಳೆಯ ವೆಜ್ ಹೋಟೆಲ್ ಎಲ್ಲಿದೆ, ಸಿನಿಮಾ ಥಿಯೇಟರ್ ಎಲ್ಲಿದೆ, ವಿಕ ಕಚೇರಿಗೆ ಹೋಗುವ ದಾರಿ ಯಾವುದು ಅಂತ ಕೇಳಿದರೆ ತಕ್ಷಣವೇ ಅದು ಮ್ಯಾಪ್ ಸಮೇತ ನಿಮಗೆ ಮಾಹಿತಿ ಒದಗಿಸುತ್ತದೆ. ಸೆಂಡ್ ಇಮೇಲ್ ಟು ಅವಿನಾಶ್ ಅಂತ ಹೇಳಿದರೆ, ಇಮೇಲ್ ಆ್ಯಪ್ ತೆರೆದು, ‘ಏನು ಸಂದೇಶ’ ಅಂತ ಕೇಳುತ್ತದೆ. ನೀವು ಹೇಳಿದ್ದನ್ನು (ಇಂಗ್ಲಿಷ್) ನೀಟಾಗಿ ಟೈಪ್ ಮಾಡಿ, ‘ಸೆಂಡ್’ ಹೇಳಿದ ತಕ್ಷಣ ಕಳುಹಿಸುತ್ತದೆ. ಟೈಪ್ ಮಾಡುವ ತ್ರಾಸವೂ ಇಲ್ಲ.

ನೀರು ಕುಡಿಯಲು ನೆನಪಿಸಲು Water Your Body
ಕಚೇರಿ ತಲುಪಲು ಇನ್ನೂ ಐದು ನಿಮಿಷವಿದೆ. ದಿನಕ್ಕೆ ಐದಾರು ಲೀಟರ್ ನೀರು ಕುಡಿಯಬೇಕು, ದೇಹಕ್ಕೆ ಒಳ್ಳೆಯದು ಎಂದು ವೈದ್ಯರು ಹೇಳಿದ್ದು ನೆನಪಾಯಿತಲ್ಲ ನಿಮಗೆ? ಆದರೆ ಕಚೇರಿಗೆ ಹೋದ ಬಳಿಕವಂತೂ ಸಮಯ ಸಮಯಕ್ಕೆ ನೀರು ಕುಡಿಯಲು ನೆನಪಾಗುವುದಿಲ್ಲ. ಹೊತ್ತು ಹೊತ್ತಿಗೆ ನೀರು ಕುಡಿಯಿರಿ ಅಂತ ನೀರಿನ ಸದ್ದಿನೊಂದಿಗೆ ನಿಮಗೆ ನೆನಪಿಸಲೆಂದೇ ಇದೆ ಈ ಆ್ಯಪ್. ಒಮ್ಮೆ ಸೆಟ್ ಮಾಡಿಟ್ಟುಕೊಳ್ಳಿ, ನಂತರ ಅದುವೇ ನೆನಪಿಸುತ್ತದೆ.

***

ಬೆಳಗ್ಗೆ 11ರಿಂದ 12.30 ಗಂಟೆ
ಕಚೇರಿಗೆ ಬಂದ ತಕ್ಷಣ ಮೊಬೈಲ್‌ನಲ್ಲೇ ಇಮೇಲ್ ಚೆಕ್ ಮಾಡಿದಿರಿ, ಕೆಲವಕ್ಕೆ ‘ಗೂಗಲ್ ನೌ’ ಮೂಲಕ ಉತ್ತರವನ್ನೂ ಬರೆದಿರಿ. ಇನ್ನೀಗ 12.00 ಗಂಟೆಗೆ ಹೆಡ್ ಆಫೀಸ್‌ನಲ್ಲಿರುವ ಮೇಲಧಿಕಾರಿಗಳೊಂದಿಗೆ ಹಾಗೂ ಬೇರೆ ಶಾಖಾ ಕಚೇರಿಗಳಲ್ಲಿರುವ ಸಹೋದ್ಯೋಗಿಗಳೊಂದಿಗೆ ಸಭೆ ನಡೆಸಬೇಕೆಂಬ ಇಮೇಲ್ ಕೂಡ ಇತ್ತಲ್ಲ? ಅದಕ್ಕೆ ಮೊದಲು ಸಿದ್ಧತೆ ನಡೆಸಬೇಕಲ್ಲ.

***

ಕಚೇರಿ ಕೆಲಸ ನಿಭಾಯಿಸಲು

Microsoft Office Mobile
ವರ್ಡ್, ಎಕ್ಸೆಲ್ ಮುಂತಾದ ಪದ ಸಂಸ್ಕರಣಾ ಫೈಲುಗಳಲ್ಲಿ ಕೆಲಸ ಮಾಡಲು, ಕಚೇರಿಗೆ ಸಂಬಂಧಿಸಿದ ಯಾವುದೇ ಕೆಲಸ ನಿಭಾಯಿಸಲು, ಪ್ರೆಸೆಂಟೇಶನ್‌ಗಾಗಿ ಪವರ್ ಪಾಯಿಂಟ್ ಸಿದ್ಧಪಡಿಸಲು ಮೈಕ್ರೋಸಾಫ್ಟ್‌ನ ಈ ಆ್ಯಪ್ ಅನುಕೂಲ ಒದಗಿಸುತ್ತದೆ.

ಫೈಲ್ ಶೇರ್ ಮಾಡಿಕೊಳ್ಳಲು Dropbox
ನಿಮ್ಮ ಕಂಪನಿಯ ಬೇರೆ ಶಾಖಾ ಕಚೇರಿಯಲ್ಲಿ ಕುಳಿತಿರುವ ನಿಮ್ಮ ಸಹೋದ್ಯೋಗಿಗಳೊಂದಿಗೆ ಸೇರಿಕೊಂಡು ಕಚೇರಿಗೆ ಸಂಬಂಧಪಟ್ಟ ಫೈಲ್ ಒಂದನ್ನು ರೂಪಿಸಬೇಕಾದಾಗ, ತಿದ್ದಬೇಕಾದಾಗ, ಅವುಗಳನ್ನು ಅವರೊಂದಿಗೆ ಹಂಚಿಕೊಳ್ಳಲು ಅನುಕೂಲ ಮಾಡಿಕೊಡುತ್ತದೆ Dropbox ಎಂಬ ಕ್ಲೌಡ್ ಸ್ಟೋರೇಜ್ ಆ್ಯಪ್. ಮಾತ್ರವಲ್ಲ, ನಮ್ಮ ಫೋನ್‌ನ ಫೋಟೋ, ವೀಡಿಯೋಗಳನ್ನು ಕೂಡ ಇದಕ್ಕೆ ಅಪ್‌ಲೋಡ್ ಮಾಡಿಟ್ಟುಕೊಳ್ಳಬಹುದು. OneDrive, Google Drive ಕೂಡ ಇದೇ ಕೆಲಸ ಮಾಡುತ್ತದೆ. ಕೆಲವಂತೂ 15 ಜಿಬಿವರೆಗೂ ಉಚಿತ ಸ್ಟೋರೇಜ್ ನೀಡುತ್ತವೆ.

ಕನ್ನಡದಲ್ಲಿ ಟೈಪ್ ಮಾಡಲು Just Kannada
ಕನ್ನಡದಲ್ಲೇ ಫೈಲ್ ಮಾಡಿ ಅಂತ ನಿಮಗೆ ಸೂಚನೆ ಬಂತಲ್ಲಾ? ಯೋಚಿಸಬೇಡಿ, ಮೊಬೈಲ್ ಅಥವಾ ಟ್ಯಾಬ್ಲೆಟ್, ಫ್ಯಾಬ್ಲೆಟ್‌ಗಳಲ್ಲಿ ಕನ್ನಡದಲ್ಲಿ ಬರೆಯಲು ಸಾಕಷ್ಟು ಆ್ಯಪ್‌ಗಳಿವೆ. ಅವುಗಳಲ್ಲಿ ಬಳಕೆಗೆ ಸರಳವಾಗಿರುವುದು Just Kannada ಎಂಬ ಆ್ಯಪ್. Pada Kannada, ಸರಕಾರದ Kannada Key, Panini Keypad, Lipikaar Kannada ಮುಂತಾದ ಬೇರೆ ಆ್ಯಪ್‌ಗಳೂ ಇವೆ.

ಕಾಲ್ ರೆಕಾರ್ಡ್ ಮಾಡಿಕೊಳ್ಳಲು Call recorder
ಕಚೇರಿಯಲ್ಲಿ ಕಾನ್ಫರೆನ್ಸ್ ಕಾಲ್ ನಡೆಯುತ್ತಿರುವಾಗಲೇ ಅದರಲ್ಲಿ ಏನು ಮಾತುಕತೆ ನಡೆಯಿತು ಎಂದು ಮತ್ತೊಮ್ಮೆ ಕೇಳಿಸಿಕೊಳ್ಳಲು, ಅಥವಾ ಬೇರೆ ಯಾರದ್ದಾದರೂ ಕರೆ ಬಂದರೆ ಆ ಕರೆಗಳನ್ನು ಸ್ವಯಂಚಾಲಿತವಾಗಿ ರೆಕಾರ್ಡ್ ಮಾಡಿಕೊಳ್ಳಲು ಅನುಕೂಲ ಮಾಡಿಕೊಡುವ ಆ್ಯಪ್ ಇದು. ಧ್ವನಿ ಫೈಲ್‌ಗಳ ರೂಪದಲ್ಲಿ ಸೇವ್ ಆಗುವ ಈ ಕರೆಗಳನ್ನು ಬೇಕಾದಾಗ ಮರಳಿ ಆಲಿಸಬಹುದು.

***

ಮಧ್ಯಾಹ್ನ 1.00
ಊಟದ ವಿರಾಮ. ಮನೆಯಿಂದ ಹೊರಡುವಾಗ ತಡವಾಗಿತ್ತು, ಮಧ್ಯಾಹ್ನದ ಲಂಚ್ ಬಾಕ್ಸ್ ತರಲೂ ಮರೆತು ಹೋಯಿತು. ಪರವಾಗಿಲ್ಲ, ಆಫೀಸಿಗೆ ಕುಳಿತಲ್ಲೇ ಊಟ ತರಿಸಿಕೊಳ್ಳಬಹುದು. ಅಥವಾ ನಿಮ್ಮ ಕಚೇರಿ ಇರುವಲ್ಲೇ ಒಳ್ಳೆಯ ಹೋಟೆಲ್ ಇದೆಯೇ ಅಂತ ತಿಳಿದುಕೊಂಡು, ನೀವೇ ಅಲ್ಲಿಗೆ ಹೋಗಬಹುದು.

ಊಟ ತರಿಸಿಕೊಳ್ಳಲು Food Panda
ನಿಮಗೆ ಬೇಕಾದ ಆಹಾರವನ್ನು ಆ್ಯಪ್ ಮೂಲಕವೇ ಆರ್ಡರ್ ಮಾಡಬಹುದು. ಮೆನು ಕೂಡ ಲಭ್ಯವಿರುತ್ತದೆ. ಫುಡ್ ಪಾಂಡಾ ಎಂಬ ಈ ಆ್ಯಪ್‌ನ ಸೇವೆಯು ಪ್ರಮುಖ ನಗರಗಳಲ್ಲಿ ಲಭ್ಯವಿದೆ. ನಗರದಲ್ಲಿ ಆರ್ಡರ್ ಮಾಡಿದ ಗಂಟೆಯೊಳಗೆ ನಿಮ್ಮ ಕಚೇರಿಗೆ ಆಹಾರ ತಲುಪಿರುತ್ತದೆ.

ಒಳ್ಳೆ ಹೋಟೆಲ್ ಹುಡುಕಲು Zomato
ಕಚೇರಿ ಇರುವ ಸುತ್ತ ಮುತ್ತ ಅಥವಾ ಹೊಸ ಊರಿಗೆ ಹೋದರೆ, ಯಾವುದು ಒಳ್ಳೆಯ ಹೋಟೆಲ್ ಎಂದು ತಿಳಿದಿರುವುದಿಲ್ಲ. ಇದಕ್ಕೆ ನೆರವಾಗುತ್ತದೆ ಈ ಆ್ಯಪ್. ಸಮೀಪದಲ್ಲೇ ಹೋಟೆಲ್ ಯಾವುದಿದೆ, ಅದರಲ್ಲಿರುವ ಮೆನು ಏನು, ಹೋದವರು ಏನನ್ನುತ್ತಾರೆ ಎಂದೆಲ್ಲಾ ತಿಳಿಯಲು ಈ ಆ್ಯಪ್. ಹೋಗಿ ಬಂದವರು ಆ್ಯಪ್‌ನಲ್ಲೇ ರೇಟಿಂಗ್ ನೀಡಿರುತ್ತಾರೆ. ಹೀಗಾಗಿ ನಿರ್ಧಾರ ತೆಗೆದುಕೊಳ್ಳುವುದು ಸುಲಭ. ಆಯಾ ಹೋಟೆಲಿಗೆ ಹೋಗಲು ಮ್ಯಾಪ್ ಕೂಡ ಅದರಲ್ಲೇ ಇದೆ.

ಹೋಟೆಲ್‌ಗೆ ಹೋಗಲು ದಾರಿ ಗೊತ್ತಿಲ್ಲವೇ? Here Maps
ಕಚೇರಿ ಮೀಟಿಂಗನ್ನು ಬೇರೆ ಯಾವುದೋ ಹೋಟೆಲಲ್ಲಿ ನಿಗದಿಪಡಿದ್ದಾರೆ ಅಥವಾ ಬೇರೆಡೆ ಕಾರ್ಯಕ್ರಮ ಏರ್ಪಡಿಸಿದ್ದಾರೆ. ಹೋಗಲು ದಾರಿ ತಿಳಿದಿಲ್ಲವೇ? ಇಂಟರ್ನೆಟ್ ಸಂಪರ್ಕವಿಲ್ಲದೆಯೇ ಮಾರ್ಗದ ಮಾಹಿತಿ ತಿಳಿಯಲು ನೋಕಿಯಾ ಅಭಿವೃದ್ಧಿ ಪಡಿಸಿದ ಹಿಯರ್ ಮ್ಯಾಪ್ಸ್ ಈಗ ಆಂಡ್ರಾಯ್ಡ್ ಸಾಧನಗಳಿಗೂ ಲಭ್ಯವಿದೆ. ತಿರುವು ತಿರುವಿಗೂ ಧ್ವನಿ ಮಾರ್ಗದರ್ಶನವಿದೆ.

***

ಅಪರಾಹ್ನ 3.00
ಮುಂದಿನ ವಾರ ಚೆನ್ನೈಯಲ್ಲಿ ನಿಮ್ಮ ಸಂಸ್ಥೆಯ ಕಚೇರಿಗೆ ಭೇಟಿ ನೀಡಿ, ಅಲ್ಲಿನ ಕೆಲವರಿಗೆ ತರಬೇತಿ ನೀಡಬೇಕಿದೆ, ಹೋಗಿ ಬಾ ಅಂತ ಬಾಸ್ ಆದೇಶಿಸಿದ್ದಾರೆ. ಇದಕ್ಕಾಗಿ ಈಗಲೇ ಟಿಕೆಟ್ ಬುಕ್ ಮಾಡಬೇಕು, ಹೊಸ ಊರು ಆಗಿರುವುದರಿಂದ ಹೋಟೆಲ್ ಕೂಡ ಬುಕ್ ಮಾಡಬೇಕಿದೆ. ಚಿಂತಿಸಬೇಡಿ. ಆ್ಯಪ್ ಇದೆ.

ಪ್ರಯಾಣ ಟಿಕೆಟ್ ಬುಕ್ ಮಾಡಲು Ticket Booking and Recharge
ರೈಲು ಟಿಕೆಟ್ ಬುಕ್ ಮಾಡಲು IRCTC, ಬಸ್ ಟಿಕೆಟ್ ಬುಕ್ ಮಾಡಲು KSRTC, redbus, travelyaari ಇತ್ಯಾದಿ ಇವೆ. ಇವುಗಳೊಂದಿಗೆ ವಿಮಾನ, ಟ್ಯಾಕ್ಸಿ ಬುಕ್ ಮಾಡಲು Ticket Booking and Recharge ಎಂಬ ಆ್ಯಪ್ ಹೆಚ್ಚಿನ ಅನುಕೂಲ ಕಲ್ಪಿಸುತ್ತದೆ.

ಹೋಟೆಲ್ ಬುಕ್ ಮಾಡಲು
MakeMytrip, Goibibo ಮುಂತಾದ ಹಲವು ಆ್ಯಪ್‌ಗಳು ರೈಲು ಮತ್ತು ವಿಮಾನ ಪ್ರಯಾಣಕ್ಕೂ, ಜತೆಗೆ ಹೋಟೆಲ್ ಕೊಠಡಿ ಕಾಯ್ದಿರಿಸುವುದಕ್ಕೂ ಉಪಯುಕ್ತ. ನಿಮ್ಮ ಬಜೆಟ್‌ಗೆ ತಕ್ಕಂತೆ ಹೋಟೆಲ್‌ಗಳನ್ನು ಹುಡುಕಿ, ಆಯ್ದುಕೊಳ್ಳಬಹುದು.

ಹವಾಮಾನ ತಿಳಿಯಲು AccuWeather
ಹೊಸ ಊರಿಗೆ ಹೋಗುತ್ತೀರಿ. ಅಲ್ಲಿನ ಹವಾಮಾನ ಹೇಗಿರುತ್ತದೆ ಅಂತ ಮೊದಲೇ ತಿಳಿದುಕೊಂಡರೆ, ಅದಕ್ಕೆ ತಕ್ಕಂತೆ ಉಡುಗೆ ಹೊಂದಿಸಬಹುದಲ್ಲವೇ? AccuWeather ನಂತಹಾ ಆ್ಯಪ್‌ಗಳು ಹವಾಮಾನ ಮುನ್ಸೂಚನೆ ನೀಡುತ್ತವೆ. ಇದರಿಂದ ನೀವು ಹೋಗುವೆಡೆ ಮಳೆಯೋ, ಚಳಿಯೋ ಇರುತ್ತದೆ ಎಂದಾದರೆ, ಪೂರ್ವಸಿದ್ಧತೆಗೆ ಅನುಕೂಲ.

***

ಅಪರಾಹ್ನ 4.30
ಮನೆಗೆ ಹೋಗುವ ಮುನ್ನ ಕಚೇರಿಯಲ್ಲಿ ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಸೇವ್ ಆಗಿರುವ, ಬೆಳಗ್ಗೆ ಕಾನ್ಫರೆನ್ಸ್ ಕರೆಯ ಬಳಿಕ ಎಲ್ಲರೂ ತಿದ್ದಿ ಪೂರ್ಣಗೊಂಡ ಫೈಲನ್ನು ಬಾಸ್ ಮೊಬೈಲ್‌ಗೆ ಅಥವಾ ಸಹೋದ್ಯೋಗಿಯ ಸಾಧನಕ್ಕೆ ಫೈಲ್ ಕಳುಹಿಸಬೇಕೇ? ನಿಮ್ಮಲ್ಲಿರುವ ಆ್ಯಪ್ ಅವರಿಗೂ ಇಷ್ಟವಾಯಿತು ಅಂತ ಹೇಳಿದರೇ? ಬ್ಲೂಟೂತ್ ಆನ್ ಮಾಡಿ, ಫೈಲುಗಳನ್ನು ಹಂಚಿಕೊಳ್ಳಲು ಆ್ಯಪ್ ಇದೆ.

ಸ್ಮಾರ್ಟ್‌ಫೋನ್‌ಗಳ ಮಧ್ಯೆ ಫೈಲ್ ಹಂಚಲು SHAREit
ಸ್ಮಾರ್ಟ್‌ಫೋನ್‌ಗಳ ಮಧ್ಯೆ ಆ್ಯಪ್ ಅಥವಾ ಬೇರೆ ಯಾವುದೇ ಫೈಲ್‌ಗಳನ್ನು ಶೇರ್ ಮಾಡಲು ಅತ್ಯಂತ ಉಪಯುಕ್ತ ಆ್ಯಪ್ ಇದು. ಬ್ಲೂಟೂತ್ ಆಧಾರದಲ್ಲಿ ಇದು ಕೆಲಸ ಮಾಡುತ್ತದೆ.

ಸ್ಮಾರ್ಟ್‌ಫೋನ್ ರಕ್ಷಣೆಗೆ CLEAN MASTER
ಟೈಪ್ ಮಾಡುತ್ತಿರುವಾಗಲೇ ನಿಮ್ಮ ಮೊಬೈಲ್ ಫೋನ್ ಸ್ಲೋ ಆಗಿದೆ ಅನ್ನಿಸುತ್ತಿದೆಯೇ? ಕ್ಲೀನ್ ಮಾಸ್ಟರ್ ಮೂಲಕ ಜಂಕ್ ಫೈಲ್‌ಗಳನ್ನು ಸುಲಭವಾಗಿ ನಿವಾರಿಸಿ, RAM ಹೆಚ್ಚಿಸಬಹುದು. ಆ್ಯಪ್, ಫೈಲ್‌ಗಳನ್ನು ಮೆಮೊರಿ ಕಾರ್ಡ್‌ಗೆ ವರ್ಗಾಯಿಸಬಹುದು, ಆ್ಯಂಟಿವೈರಸ್ ಆಗಿಯೂ ಇದನ್ನು ಬಳಸಬಹುದು; ಇದರಲ್ಲೇ ಟಾರ್ಚ್ (ಕತ್ತಲು ಕವಿದಾಗ ಅಗತ್ಯಬಿದ್ದರೆ ಫೋನ್‌ನ ಬ್ಯಾಟರಿ ಉಪಯೋಗಿಸಿ ದೀಪ ಹಚ್ಚುವ) ವ್ಯವಸ್ಥೆಯೂ ಇದೆ.

***

ಸಂಜೆ 5.30
ಮರಳಿ ಮನೆಗೆ ಹೊರಟಿದ್ದೀರಿ. ಟ್ಯಾಕ್ಸಿಯಲ್ಲಿ ಒಂದಿಷ್ಟು ಸಮಯವಿದೆ. ಮನಸ್ಸಿನ ಒತ್ತಡ ಸ್ವಲ್ಪ ನಿವಾರಿಸಿಕೊಳ್ಳಬೇಕಲ್ಲವೇ? ಮೊಬೈಲಲ್ಲಿ ಒಂದಿಷ್ಟು ಗೇಮ್ಸ್ ಆಡಿ.

ಆಟ ಆಡಲು Candy Crush
ಸಮಯ ಕೊಲ್ಲಲು Candy Crush Soda Saga, ಟೆಂಪಲ್ ರನ್ ಮುಂತಾದ ಸಾವಿರಾರು ಗೇಮ್‌ಗಳು ಕಿರು ತಂತ್ರಾಂಶಗಳ ರೂಪದಲ್ಲಿ ಲಭ್ಯ ಇವೆ. ಇದಲ್ಲದೆ, ಚೆಸ್, ಕ್ವಿಜ್ ಮುಂತಾಗಿ ಮೆದುಳನ್ನು ಚುರುಕುಗೊಳಿಸಬಲ್ಲ ಸಾಕಷ್ಟು ಇತರ ಆ್ಯಪ್‌ಗಳೂ ಇವೆ.

***

ಸಂಜೆ 6.00
ಮನೆಗೆ ಬಂದಿದ್ದೀರಿ. ಫ್ರೆಶ್ ಆದ ಬಳಿಕ ಕುಳಿತರೆ, ಕರೆಂಟ್ ಹೋಗಿದೆ. ಟಿವಿ ನೋಡಬಹುದಿತ್ತು ಅಂದುಕೊಂಡಿರಾ? ಸ್ಮಾರ್ಟ್‌ಫೋನಲ್ಲೇ ಟಿವಿ ನೋಡಬಹುದು.

ಟಿವಿ ನೋಡಲು YuppTV
ನಿಮ್ಮನೇಲಿ ಕರೆಂಟಿಲ್ಲದಿದ್ದರೇನು, ಮೊಬೈಲಲ್ಲಿ ಬ್ಯಾಟರಿ ಇದೆಯಲ್ಲ. ಜತೆಗೆ ಒಳ್ಳೆಯ ಇಂಟರ್ನೆಟ್ ಕನೆಕ್ಷನ್ ಇದ್ದರೆ, ಮೊಬೈಲ್‌ನಲ್ಲೇ ಲೈವ್ ಟಿವಿ ನೋಡಲು ಅನುಕೂಲ ಮಾಡಿಕೊಡುವ ಆ್ಯಪ್ YuppTV. ಕನ್ನಡ ಸಹಿತ ಹಲವಾರು ಭಾರತೀಯ ಜನಪ್ರಿಯ ಚಾನೆಲ್‌ಗಳು, ಇಂಗ್ಲಿಷ್ ಚಾನೆಲ್‌ಗಳೂ ಇದರಲ್ಲಿದೆ.

ಕರೆಂಟ್ ಹೋದಾಗ Flashlight
ಅದೇನೋ ಫೈಲ್ ಹುಡುಕಬೇಕಿತ್ತೇ? ಕತ್ತಲಿನಲ್ಲಿ ಹೇಗೆ ಹುಡುಕುವುದೆಂಬ ಚಿಂತೆಯೇ? ವಿದ್ಯುತ್ ಕೈಕೊಟ್ಟಾಗ ನೆರವಿಗೆ ಬರುವುದೇ ಆಸುಸ್‌ನ ಫ್ಲ್ಯಾಶ್ ಲೈಟ್ ಎಂಬ ಆ್ಯಪ್. ಸ್ಕ್ರೀನ್‌ನ ಮೇಲೆ ಬಟನ್ ಒತ್ತಿದರೆ, ಎಲ್‌ಇಡಿ ದೀಪ ಉರಿಯುತ್ತದೆ. ಬ್ಲಿಂಕ್ ಆಗಿಸುವ ಆಯ್ಕೆಯೂ ಲಭ್ಯವಿದೆ.

***

ಸಂಜೆ 7.00
ಮಕ್ಕಳ ಓದಿನ ಮೇಲೂ ಗಮನ ಹರಿಸಬೇಕಲ್ಲ. ಅವರಿಗೆ ಕ್ಲಿಷ್ಟ ಗಣಿತದ ಪಾಠ ಹೇಳಿಕೊಡಬೇಕಾಗಿದೆ. ಸಮಸ್ಯೆ ಬಿಡಿಸುವ ವಿಧಾನಗಳ ಬಗ್ಗೆ ಅವರಲ್ಲಿ ಪರಿಣತಿ ಮೂಡಿಸಬೇಕು, ಅವರ ಮೆದುಳಿಗೆ ಮೇವು ನೀಡಿ, ಬೇಗನೇ ಗಣಿತದ ಸಮಸ್ಯೆ ಬಿಡಿಸುವಂತೆ ರೂಪುಗೊಳಿಸಬೇಕಾಗಿದೆಯಲ್ಲವೇ? ಅದಕ್ಕೂ ನೆರವಿಗೆ ಬರುತ್ತವೆ ಆ್ಯಪ್‌ಗಳು.

ಮಕ್ಕಳಿಗೆ ಗಣಿತ ಹೇಳಿಕೊಡಲು Maths Workout
ಕಲಿಯಲು ಆಸಕ್ತಿಯುಳ್ಳವರಿಗೆ ಗಣಿತದ ಅತಿ ಕ್ಲಿಷ್ಟ ಸಮಸ್ಯೆಗಳನ್ನು ಪರಿಹರಿಸಲು, ಅಭ್ಯಾಸ ಮಾಡಿಸಲು ನೆರವಾಗುವ ಆ್ಯಪ್. Abacus ಎಂಬ ಆ್ಯಪ್ ಕೂಡ ಮಕ್ಕಳಲ್ಲಿ ಲೆಕ್ಕ ಬಿಡಿಸುವ ಕೌಶಲ್ಯ ಹೆಚ್ಚಿಸಲು ಅತ್ಯುಪಯುಕ್ತ.

***

ಸಂಜೆ 7.30

ಬೆಳಗ್ಗೆ ಮನೆ ಸಾಮಾನು ತರಬೇಕೆಂದು ಪಟ್ಟಿ ಮಾಡಿದ್ದರೂ, ಅವಸರದಿಂದಾಗಿ ಕೆಲವೊಂದು ಗೊಂದಲಗಳಿದ್ದವು. ಮನೆಯವರೆಲ್ಲ ಕುಳಿತು ಏನು ಬೇಕು ಅಂತ ತೀರ್ಮಾನಿಸಿ, ಕುಳಿತಲ್ಲಿಂದಲೇ ಸಾಮಾನು ತರಿಸಿಕೊಳ್ಳುವ ಆ್ಯಪ್ ಇರುವಾಗ, ಇಷ್ಟಕ್ಕೆಲ್ಲಾ ತಲೆಬಿಸಿ ಮಾಡಿಕೊಳ್ಳುವುದೇಕೆ?

ತರಕಾರಿ, ದಿನಸಿ, ಹಣ್ಣುಹಂಪಲು ತರಿಸಿಕೊಳ್ಳಲು Bigbasket
ಇದೊಂದು ಆ್ಯಪ್ ಇದ್ದರೆ, ಬಿಗ್‌ಬಾಸ್ಕೆಟ್ ಕಂಪನಿಯ ಆನ್‌ಲೈನ್ ಮಳಿಗೆಯಿಂದ ಮನೆಗೆ ಬೇಕಾದ ಯಾವುದೇ ದಿನಸಿ, ತರಕಾರಿ, ಹಣ್ಣು ಹಂಪಲು, ಸಾಬೂನು ಇತ್ಯಾದಿ ಸಾಮಗ್ರಿಗಳನ್ನು ಕುಳಿತಲ್ಲೇ ಖರೀದಿ ಮಾಡಬಹುದು. ಅಂಗಡಿಗೆ ಹೋಗಿ ಕಾಯುವ, ಅದನ್ನು ಹೊತ್ತು ತರುವ ತಾಪತ್ರಯವಿರುವುದಿಲ್ಲ. ನಗರದಲ್ಲಂತೂ ಉಚಿತವಾಗಿ ಮನೆಗೇ ವಿತರಣೆ ಮಾಡುವ ವ್ಯವಸ್ಥೆಯಿದೆ.

ಗೃಹೋಪಯೋಗಿ ವಸ್ತು ಶಾಪಿಂಗ್ ಮಾಡಲು
ಎಲೆಕ್ಟ್ರಾನಿಕ್ ವಸ್ತುಗಳು, ಗೃಹೋಪಯೋಗಿ ವಸ್ತುಗಳು ಮುಂತಾದವನ್ನು ಕುಳಿತಲ್ಲೇ ಅಳೆದು ತೂಗಿ ನೋಡಿ ಖರೀದಿಸಬಹುದು. ಶಾಪಿಂಗ್ ಪ್ರಿಯರಿಗೆ, ಆಯಾ ಮಾಲ್‌ಗಳಿಗೆ ಅಥವಾ ಮಳಿಗೆಗಳಿಗೆ ಹೋಗಲು ಪುರುಸೊತ್ತಿಲ್ಲ. ಆಕರ್ಷಕ ಕೊಡುಗೆಗಳೊಂದಿಗೆ ಪಡೆಯಲು ಸಾಕಷ್ಟು ಆ್ಯಪ್‌ಗಳಿವೆ. ಭಾರತದಲ್ಲಿ ಹೆಚ್ಚು ಜನಪ್ರಿಯವಾದವು ಫ್ಲಿಪ್‌ಕಾರ್ಟ್, ಅಮೆಜಾನ್, ಸ್ನ್ಯಾಪ್‌ಡೀಲ್ ಮುಂತಾದವು.

ಅನಗತ್ಯ ಸಾಮಾನು ವಿಲೇವಾರಿಗೆ OLX
ಹೊಸದು ತರಿಸಿಕೊಳ್ಳುವುದಕ್ಕಾಗಿ ಹಳೆಯ ವಾಷಿಂಗ್ ಮೆಷಿನ್, ಫ್ರಿಜ್, ಸೋಫಾ, ಮೊಬೈಲ್ ಇತ್ಯಾದಿಯನ್ನು ಮಾರಬೇಕೆಂದಿದ್ದೀರಾ? OLX, Quickr, ebay ಮುಂತಾದ ಆ್ಯಪ್ ಅಳವಡಿಸಿಕೊಳ್ಳಿ. ಮನೆಯಲ್ಲಿ ಅನಗತ್ಯವಾದ ಯಾವುದೇ ವಸ್ತುವನ್ನೂ ಫೋಟೋ ತೆಗೆದು, ಅಪ್‌ಲೋಡ್ ಮಾಡಿ ಮಾರಾಟ ಮಾಡಬಹುದು. ಬಳಸಿದ ವಸ್ತುಗಳನ್ನು ಖರೀದಿಸಲೂಬಹುದು. ಇದು ಆನ್‌ಲೈನ್ ಕ್ಲಾಸಿಫೈಡ್ (ವರ್ಗೀಕೃತ) ಜಾಹೀರಾತು ತಾಣ.

ಆನ್‌ಲೈನ್‌ನಲ್ಲಿ ದರ ಹೋಲಿಸಿ ನೋಡಲು MySmartPrice
ಆನ್‌ಲೈನ್‌ನಲ್ಲಿ ಯಾವುದನ್ನಾದರೂ ಶಾಪಿಂಗ್ ಮಾಡುವ ಮೊದಲು, ಬೇರೆ ಬೇರೆ ಇ-ಕಾಮರ್ಸ್ ತಾಣಗಳಲ್ಲಿ ನಿರ್ದಿಷ್ಟ ವಸ್ತುವಿನ ದರ ಎಷ್ಟಿದೆ, ಎಲ್ಲಿ ಕಡಿಮೆಗೆ ದೊರೆಯುತ್ತದೆ ಎಂದು ತಿಳಿದುಕೊಂಡು, ಹಣ ಉಳಿತಾಯಕ್ಕೆ ನೆರವಾಗುತ್ತದೆ ಮೈ ಸ್ಮಾರ್ಟ್ ಪ್ರೈಸ್ ಎಂಬ ಈ ಆ್ಯಪ್.

ರಾತ್ರಿ 8.30
ಯಾವುದೋ ಕಾರಣಕ್ಕೆ ಮುಂದಿನ ತಿಂಗಳು ಬಾಡಿಗೆ ಮನೆ ಬದಲಿಸಬೇಕೂಂತ ತೀರ್ಮಾನಿಸಿರುತ್ತೀರಿ. ಬೀದಿ ಬೀದಿ ಅಲೆದು ಹುಡುಕುವುದೋ, ಏಜೆಂಟರ ಬಳಿಗೆ ತೆರಳುವುದಕ್ಕೋ ಸಮಯವಿಲ್ಲ. ಕುಳಿತಲ್ಲೇ ಸ್ವಲ್ಪ ಸಮಯ ವ್ಯಯಿಸಿದರೆ, ನಿಮಗೆ ಬೇಕಾದ ರೀತಿಯ ಬಾಡಿಗೆ ಮನೆಯೋ, ಖರೀದಿಗಾಗಿ ಸ್ವಂತ ಮನೆಯೋ ಹುಡುಕಬಹುದು.

ಬಾಡಿಗೆಗೆ ಮನೆ ಹುಡುಕಲು MagicBricks
ನಮಗೆ ಬೇಕಾದ ಸ್ಥಳದಲ್ಲಿ, ಬೇಕಾದ ಪರಿಸರದಲ್ಲಿ ಬಾಡಿಗೆ ಮನೆ ಹುಡುಕಲು ಅಥವಾ ಆಸ್ತಿ ಖರೀದಿಸಲು ಉಪಯುಕ್ತವಾಗಿದೆ ಈ ಆ್ಯಪ್. ದೇಶದ ಪ್ರಮುಖ ನಗರಗಳಲ್ಲಿರುವ ಮಾಹಿತಿ ಇದರಲ್ಲಿದೆ. ಆಸ್ತಿ ಮಾರಾಟ, ಖರೀದಿಗೂ ಈ ಆ್ಯಪ್ ವೇದಿಕೆಯಾಗುತ್ತದೆ.

***

ರಾತ್ರಿ 9.00

ಮನೆಯಲ್ಲಿರುವ ಹಿರಿಯರಿಗೆ ಆರೋಗ್ಯ ಸಮಸ್ಯೆಯಿದೆ. ನಾಳೆ ವೈದ್ಯರ ಬಳಿಗೆ ಹೋಗಲೇಬೇಕು. ಕಚೇರಿ ಕಾರ್ಯದೊತ್ತಡದಿಂದಾಗಿ ನೀವೇ ಹೋಗಿ ಅಪಾಯಿಂಟ್‌ಮೆಂಟ್ ತೆಗೆದುಕೊಳ್ಳುವಷ್ಟು ಸಮಯ ನಿಮಗಿಲ್ಲ. ಹಾಗಿದ್ದರೆ, ಮೊಬೈಲ್‌ನಲ್ಲೇ ಒಂದಿಷ್ಟು ಸಮಯ ವ್ಯಯಿಸಿ, ಸಮೀಪದ ವೈದ್ಯರ ಅಪಾಯಿಂಟ್‌ಮೆಂಟ್ ಪಡೆದುಕೊಳ್ಳಬಹುದು.

ಒಳ್ಳೆಯ ವೈದ್ಯರನ್ನು ಹುಡುಕಿ ಭೇಟಿ ನಿಗದಿಪಡಿಸಲು Practo – Find Doctors
ಬೆಂಗಳೂರು, ಹೈದರಾಬಾದ್, ದಿಲ್ಲಿ, ಮುಂಬಯಿ, ಕೋಲ್ಕತಾ, ಚೆನ್ನೈ, ಪುಣೆ ಮುಂತಾದ ಪ್ರಮುಖ ನಗರಗಳಲ್ಲಿರುವ ವೈದ್ಯರ ಪಟ್ಟಿ ಇದರಲ್ಲಿದೆ. ಸಮೀಪದ ವೈದ್ಯರನ್ನು ಹುಡುಕಿ, ಅವರ ಅಪಾಯಿಂಟ್‌ಮೆಂಟ್ ತೆಗೆದುಕೊಳ್ಳಲು (ಭೇಟಿ ನಿಗದಿಪಡಿಸಲು) ಇದು ಅನುಕೂಲ ಮಾಡಿಕೊಡುತ್ತದೆ. ಕರ್ನಾಟಕ ಸರಕಾರದ ಮೊಬೈಲ್ ಒನ್ ಎಂಬ ಆ್ಯಪ್‌ಗಳ ಗುಚ್ಛದಲ್ಲಿಯೂ ಇದೆ. ವೈದ್ಯರ ಸಲಹಾ ಶುಲ್ಕವನ್ನು ಇದರಲ್ಲೇ ನೋಡಬಹುದು. ಹೋಗಿ ಬಂದವರು ನಿರ್ದಿಷ್ಟ ಕ್ಲಿನಿಕ್‌ನ ಸೇವೆ ಚೆನ್ನಾಗಿದೆಯೇ ಇಲ್ಲವೇ ಎಂದು ರೇಟಿಂಗ್ ಮಾಡುವ ಆಯ್ಕೆ ಇದೆ.

ಸಣ್ಣಪುಟ್ಟ ಆರೋಗ್ಯ ಸಮಸ್ಯೆಗಳಿಗೆ Ayurvedic Treatment
ಹಿಂದಿ ಚೆನ್ನಾಗಿ ಬಲ್ಲವರಿಗೆ ಉಪಯುಕ್ತವಾಗಿದೆ ದಿನ ಬದುಕಿನ ಅನಾರೋಗ್ಯ ಸಮಸ್ಯೆಗಳಿಗೆ ಸರಳ ಆಯುರ್ವೇದ ಪರಿಹಾರಗಳುಳ್ಳ ಈ ಆ್ಯಪ್. ಇದಲ್ಲದೆ, ನಮಗೆಷ್ಟು ಅವಧಿಯ ನಿದ್ದೆ ಬೇಕು, ದಿನಕ್ಕೆ ಎಷ್ಟು ನೀರು ಕುಡಿಯಬೇಕು ಮುಂತಾಗಿ, ಈಗಿನ ಜೀವನ ಶೈಲಿಗೆ ಅನುಕೂಲವಾಗುವ ಪ್ರಶ್ನೆಗಳೂ, ಅದಕ್ಕೆ ಉತ್ತರಗಳೂ ಇಲ್ಲಿವೆ.

ಪ್ರತ್ಯೇಕವಾಗಿ ಹೆಣ್ಣು ಮಕ್ಕಳ ನೆರವಿಗಾಗಿರುವ ಆ್ಯಪ್‌ಗಳು

My Pregnancy Today
ಗರ್ಭಿಣಿಯರಿಗೆ ತಮ್ಮ ದೇಹದೊಳಗಿರುವ ಮಗುವಿನ ಬೆಳವಣಿಗೆ ಮತ್ತು ಅದೇ ಸಂದರ್ಭ ತಮ್ಮ ದೇಹದಲ್ಲಾಗುತ್ತಿರುವ ಬದಲಾವಣೆಗಳ ಬಗ್ಗೆ ತಿಳಿದುಕೊಂಡು, ಸೂಕ್ತ ಸಲಹೆಗಳನ್ನು ಪಡೆದುಕೊಳ್ಳಲು ಅನುಕೂಲ ಮಾಡಿಕೊಡುವ ಆ್ಯಪ್ ಇದು. ಯಾವಾಗ ಹೆರಿಗೆಯಾಗಬಹುದೆಂದು ಅಂದಾಜು ಲೆಕ್ಕಾಚಾರ ಹಾಕುವ ವ್ಯವಸ್ಥೆಯೂ ಇದರಲ್ಲಿದೆ. ಗರ್ಭಿಣಿಯರು ಸೇವಿಸಬೇಕಾದ ಆಹಾರ, ತೆಗೆದುಕೊಳ್ಳಬೇಕಾದ ವಿಶ್ರಾಂತಿ ಕುರಿತ ಮಾಹಿತಿಯೂ ಇದೆ.
* ವೈದ್ಯರ ಸಲಹೆ ಪಡೆದ ಬಳಿಕವಷ್ಟೇ ಇದರಲ್ಲಿರುವ ಯಾವುದೇ ಸಲಹೆಗಳನ್ನು ಅನುಸರಿಸಬೇಕು.

ಋತುಚಕ್ರ ಕ್ಯಾಲೆಂಡರ್ Period Calendar / Tracker
ಋತುಚಕ್ರವನ್ನು ಟ್ರ್ಯಾಕ್ ಮಾಡಲು, ಅಂಡಾಣು ಫಲಿತವಾಗುವ ಪ್ರಶಸ್ತ ದಿನ ತಿಳಿಯಲು, ಆಯಾ ದಿನ ಗರ್ಭಧಾರಣೆಯ ಸಾಧ್ಯತೆ ಎಷ್ಟಿದೆ ಎಂದೆಲ್ಲಾ ತಿಳಿದುಕೊಳ್ಳಲು ಮಹಿಳೆಯರಿಗೆ ನೆರವಾಗುವ ಆ್ಯಪ್ ಇದು. ಅವರ ಮಾನಸಿಕ ಏರುಪೇರು, ತೂಕ, ಬೇರೆ ಯಾವುದೇ ರೋಗ ಲಕ್ಷಣಗಳು ಇತ್ಯಾದಿಗಳನ್ನು ತಿಳಿಯಲು ಉಪಯುಕ್ತ. ಮತ್ತು ಇದರಲ್ಲಿನ ದತ್ತಾಂಶವನ್ನು ವೈದ್ಯರಿಗೆ ಕಳುಹಿಸಬಹುದಾಗಿದೆ. ಗರ್ಭನಿರೋಧಕ ಮಾತ್ರೆ ಸೇವನೆಯ ರಿಮೈಂಡರ್ ಮತ್ತಿತರ ವೈಶಿಷ್ಟ್ಯಗಳೂ ಇವೆ.

***

ರಾತ್ರಿ 10 ಗಂಟೆ
ಮಲಗುವ ಮುಂಚೆ ಅಥವಾ ಬೇರಾವುದೇ ಬಿಡುವಿನ ಸಮಯದಲ್ಲಿ ಪುಸ್ತಕಗಳು ಸಂಗಾತಿಯಾಗುತ್ತವೆ. ಸ್ಮಾರ್ಟ್‌ಫೋನ್ ಆಗಿರುವುದರಿಂದ ಇ-ಪುಸ್ತಕಗಳನ್ನು ಓದುತ್ತಾ, ಸಮಯವಿದ್ದಾಗ ಮುಂದುವರಿಸಬಹುದು.

ಪುಸ್ತಕ ಓದಲು Amazon Kindle
ಅಮೆಜಾನ್‌ನ ಕಿಂಡಲ್ ಎಂಬ ಇ-ಬುಕ್ ರೀಡರ್ ಆ್ಯಪ್‌ನಲ್ಲಿ ಸಾವಿರಾರು ಉಚಿತ ಪುಸ್ತಕಗಳು ಇವೆ. ಓದಲು ಕಣ್ಣುಗಳಿಗೆ ಅನುಕೂಲಕರವಾಗುವಂತೆ ಸ್ಕ್ರೀನ್‌ನ ಪ್ರಕಾಶವನ್ನು ಸೆಟ್ ಮಾಡಿಕೊಳ್ಳುವ ಆಯ್ಕೆಯೂ ಇದೆ. ಕೆಲವು ಇ-ಬುಕ್‌ಗಳನ್ನು ಕಡಿಮೆ ದರದಲ್ಲಿ ಖರೀದಿಸಲೂಬಹುದು. ಬೇರೆ ಬೇರೆ ಸಾಧನಗಳಲ್ಲಿ ಓದುತ್ತಿದ್ದರೆ, ಸಿಂಕ್ರನೈಜ್ ಮಾಡುವ ಆಯ್ಕೆಯಿದೆ. ಇದಲ್ಲದೆ ಮೂನ್ ಪ್ಲಸ್ ರೀಡರ್, ಮಕ್ಕಳಿಗಾದರೆ ಎಸಿಕೆ ಕಾಮಿಕ್ಸ್ ಅಲ್ಲದೆ ಸಾಕಷ್ಟು ಇತರ ಇ-ಪುಸ್ತಕ ಮಳಿಗೆಗಳೂ ಆ್ಯಪ್ ರೂಪದಲ್ಲಿ ಲಭ್ಯ ಇವೆ.

ಸಮಯವಿದ್ದಾಗ ಇವೂ ಇವೆ…
ಡೇಟಿಂಗ್‌ಗಾಗಿ OkCupid Dating
ಟಿಂಡರ್, ಒಕೆಕ್ಯುಪಿಡ್ ಮುಂತಾದ ಸಾಕಷ್ಟು ಭಾರತೀಯ ಡೇಟಿಂಗ್ ಆ್ಯಪ್‌ಗಳು ಅವಿವಾಹಿತರಿಗೆ, ಯುವ ಸಮುದಾಯಕ್ಕೆ ಸಂಗಾತಿಯನ್ನು ಹುಡುಕಲು ನೆರವಾಗುತ್ತದೆ. ಇದರ ಮೂಲಕ ಒಂಟಿಯಾಗಿದ್ದವರು ಜಂಟಿಯಾಗಲು ಮನಸ್ಸು ಮಾಡಬಹುದು.

ಕೃಷಿಕರ ಮಾಹಿತಿಗೆ Agriportal
ಕೃಷಿಗೆ ಉಪಯುಕ್ತ ಮಾಹಿತಿ, ಹವಾಮಾನ ಮಾಹಿತಿ, ಮಾರುಕಟ್ಟೆ ಸ್ಥಿತಿಗತಿ ತಿಳಿಸಿಕೊಡುವ ಆ್ಯಪ್ ಅಗ್ರಿ ಪೋರ್ಟಲ್.

ಲೈಂಗಿಕತೆ ಉತ್ತೇಜಿಸಲು The Kama Sutra
ವಾತ್ಸ್ಯಾಯನ ಕಾಮಸೂತ್ರದ ಪಾಠಗಳನ್ನು ಹೇಳಿಕೊಡುವ ಹಲವು ಆ್ಯಪ್‌ಗಳು ಲಭ್ಯ ಇವೆ. The Kama Sutra ಎಂಬ ಆಡಿಯೋ ಬುಕ್ ಇದ್ದರೆ, Kamasutra Play ಎಂಬ ಆ್ಯಪ್‌ನಲ್ಲಿ ವಿಭಿನ್ನ ಭಂಗಿಗಳಿವೆ.

***
ರಾತ್ರಿ 11.00
ಮಲಗುವ ಸಮಯ. ದಿನದ ಜಂಜಡಗಳನ್ನೆಲ್ಲಾ ಮರೆತು ರಾತ್ರಿ ಸುಖವಾದ ನಿದ್ದೆ ಬಂದರೆ, ಮರುದಿನ ಕೆಲಸ ಮಾಡಲು ಹುರುಪು ಇರುತ್ತದೆ. ಆದರೆ, ಇತ್ತೀಚೆಗೆ ಮನೋದ್ವೇಗದಿಂದ ನಿದ್ದೆ ಸರಿಯಾಗಿ ಬಾರದೆ ಮನಸ್ಸಿನ ಲಯ ತಪ್ಪಿದೆಯೇ? ಉದ್ವಿಗ್ನಗೊಂಡ ಮನಸ್ಸನ್ನು ಒಂದಿಷ್ಟು ಶಮನ ಮಾಡಿಕೊಳ್ಳಬೇಕೇ? ಸಾಕಷ್ಟು ಆ್ಯಪ್‌ಗಳಿವೆ.

ಮನಸ್ಸು ರಿಲ್ಯಾಕ್ಸ್ ಆಗಲು/ ಉತ್ತಮ ನಿದ್ದೆಗೆ Nature Sounds Relax and Sleep
ಈ ಆ್ಯಪ್ ಅಳವಡಿಸಿಕೊಂಡು, ಆನ್ ಮಾಡಿಟ್ಟರೆ ಸಾಕು… ಸಮುದ್ರದ ಅಲೆ, ಹಕ್ಕಿಗಳ ಚಿಲಿಪಿಲಿ, ಮಳೆ, ರಾತ್ರಿಯ ಜೀರುಂಡೆ, ಕಾಡಿನ ವಾತಾವರಣ, ನೀರಿನ ಹರಿಯುವಿಕೆ ಮತ್ತಿತರ ಪ್ರಕೃತಿ ಸಹಜವಾದ ಧ್ವನಿಯು ನಿಮ್ಮ ಕಿವಿಗೆ ಮೆಲುವಾಗಿ ಸೋಕಿ ಮನಸ್ಸನ್ನು ಶಮನಗೊಳಿಸುತ್ತದೆ.

Music Therapy for Sound Sleep
ಸಹಜವಾಗಿ ನಿದ್ರೆಗೆ ಜಾರಲು ಈ ಆ್ಯಪ್ ಬಳಸಿದರಾಯಿತು. ನೈಸರ್ಗಿಕ ಧ್ವನಿಯ ಜತೆಗೆ ಕಿವಿಗೆ ಇಂಪಾದ ಸಂಗೀತದ ಧ್ವನಿಯ ಮಟ್ಟ ಕೂಡ ಮೆದುಳನ್ನು ನಿಧಾನವಾಗಿ ನಿದ್ದೆಗೆ ಜಾರಿಸುವಂತಿದೆ. ಇಲ್ಲಿ ಶಬ್ದದ ಕಡಿಮೆ ವೇಗದ ಆಲ್ಫಾ ಅಲೆಗಳನ್ನು ಬಳಸಲಾಗಿದೆ. ಸಮಯ ಹೊಂದಿಸಿ ಮಲಗಿದರಾಯಿತು. ಬೆಳಗ್ಗೆ ಎದ್ದು ದಿನಚರಿ ಪುನಃ ಆರಂಭಿಸಲು ಅಲಾರಂ ಆ್ಯಪ್ ಹೇಗೂ ಇದೆ.

***

ಅನುಸರಿಸಲೇಬೇಕಾದ ಸೂಚನೆ: ಇಲ್ಲಿ ಸೂಚಿಸಿದ ಆ್ಯಪ್‌ಗಳು ಮಾಹಿತಿಗಾಗಿ ಮಾತ್ರ. ಸಂಬಂಧಿಸಿದ ಆ್ಯಪ್ ಅನ್ನು ಆಯಾ ಕೀವರ್ಡ್ ಮೂಲಕ ಸರ್ಚ್ ಮಾಡಿ, ಅದರ ಕೆಳಗೆ ಬಳಸಿದವರು ಬರೆದ ಪ್ರತಿಕ್ರಿಯೆಗಳನ್ನು ಹಾಗೂ ಅವರು ನೀಡಿದ ರೇಟಿಂಗ್‌ಗಳನ್ನು ನೋಡಿ ಇನ್‌ಸ್ಟಾಲ್ ಮಾಡಿಕೊಳ್ಳುವುದು ಕ್ಷೇಮ.

2014 ಡಿಸೆಂಬರ್ 28: ವಿಜಯ ಕರ್ನಾಟಕದ ಸಾಪ್ತಾಹಿಕ ಲವಲವಿಕೆಯಲ್ಲಿ ಅಗ್ರ ಲೇಖನ
* ಅವಿನಾಶ್ ಬೈಪಾಡಿತ್ತಾಯ