ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ. ಅಂಕಣ, 12 ನವೆಂಬರ್ 2018
ಗೂಗಲ್ ಎಂಬುದು ಆ್ಯಪ್‌ಗಳು ಹಾಗೂ ವಿಭಿನ್ನ ಇಂಟರ್ನೆಟ್ ಪ್ರೋಗ್ರಾಂಗಳ ಮೂಲಕ ಅಗಾಧ ಸಾಧ್ಯತೆಗಳನ್ನು ನಮಗೆ ಒದಗಿಸುತ್ತಿರುವ ಇಂಟರ್ನೆಟ್ ದಿಗ್ಗಜ. ಅದು ನಮ್ಮ ಬದುಕಿನಲ್ಲಿ ಹಾಸುಹೊಕ್ಕಾಗಿರುವುದಕ್ಕೆ ಪ್ರಧಾನ ಕಾರಣ ಆಂಡ್ರಾಯ್ಡ್ ಮೊಬೈಲ್ ಫೋನ್‌ಗಳು. ನಾವು ಹೋದಲ್ಲಿ, ನಮಗೆ ಬೇಕು ಬೇಕಾದ ಸೇವೆಗಳನ್ನು ಒದಗಿಸುವ ಬಹುತೇಕ ಎಲ್ಲ ರೀತಿಯ ಆ್ಯಪ್‌ಗಳೂ ಗೂಗಲ್‌ನಲ್ಲಿದೆ. ಇದರಲ್ಲಿ, ದೂರದಲ್ಲಿರುವವರೊಂದಿಗೆ ವೀಡಿಯೊ ಕರೆಗೆ ನೆರವಾಗುವ ಆ್ಯಪ್‌ಗಳಲ್ಲಿ ಇತ್ತೀಚೆಗೆ ಹೆಚ್ಚು ಸದ್ದು ಮಾಡುತ್ತಿರುವ ಗೂಗಲ್ ಡ್ಯುಯೋ (Google Duo) ಕೂಡ ಒಂದು.
ವೀಡಿಯೊ ಕರೆಗೆ ಸಾಕಷ್ಟು ಇತರ ಆ್ಯಪ್‌ಗಳಿದ್ದು, ವಾಟ್ಸ್ಆ್ಯಪ್‌ನಂತಹಾ ಸಂವಹನ ಆ್ಯಪ್‌ಗಳಲ್ಲಿಯೂ ಕರೆ ಮಾಡಬಹುದು. ಅದೇ ರೀತಿ ಗೂಗಲ್ ಹ್ಯಾಂಗೌಟ್ಸ್ ಹಾಗೂ ಗೂಗಲ್ ಅಲ್ಲೋ ಎಂಬ ಆ್ಯಪ್ ಮೂಲಕವೂ ವೀಡಿಯೊ ಕರೆ/ಚಾಟ್ ನಡೆಸಬಹುದು. ಇವುಗಳಲ್ಲಿ ಪಠ್ಯ ಸಂವಹನ ಮತ್ತು ಸಮೂಹ ಕರೆಗಳನ್ನೂ ನಿಭಾಯಿಸಬಹುದು. ಆದರೆ ಗೂಗಲ್ ಡ್ಯುಯೋ ಇವೆಲ್ಲಕ್ಕಿಂತ ಸ್ವಲ್ಪ ಭಿನ್ನ. ಇಲ್ಲಿ ವೀಡಿಯೋ ಸಂವಹನ ಮಾತ್ರ ಮಾಡಬಹುದು. ಹ್ಯಾಂಗೌಟ್ಸ್ ಹಾಗೂ ಅಲ್ಲೋ ಆ್ಯಪ್‌ಗಳಿಗೆ ಜಿಮೇಲ್ ಖಾತೆ ಬೇಕಾಗಿರುತ್ತದೆ. ಆದರೆ ಗೂಗಲ್ ಡ್ಯುಯೋಗೆ ನಿಮ್ಮ ಫೋನ್ ನಂಬರ್ ಸಾಕಾಗುತ್ತದೆ.
ಇದೊಂದು ಉಚಿತ ಆ್ಯಪ್ ಆಗಿದ್ದು, ಆಂಡ್ರಾಯ್ಡ್ ಹಾಗೂ ಆ್ಯಪಲ್ ಐಫೋನ್‌ಗಳಲ್ಲೂ ಬಳಕೆಗೆ ಲಭ್ಯವಿದೆ. ಆದರೆ ಸಮೂಹ ಕರೆಗಳಿಗೆ ಇದರಲ್ಲಿ ಅವಕಾಶವಿಲ್ಲ. ಅಂದರೆ, ಹಲವಾರು ಮಂದಿಯೊಂದಿಗೆ ಏಕಕಾಲದಲ್ಲಿ ವೀಡಿಯೊ ಸಂಭಾಷಣೆ (ಆನ್‌ಲೈನ್ ಸಮಾವೇಶ) ನಡೆಸುವಂತಿಲ್ಲ. ಇದರ ಬಳಕೆ ತೀರಾ ಸರಳವಾಗಿರುವುದರಿಂದ, ಹೆತ್ತವರು ಹಾಗೂ ವಿದೇಶದಲ್ಲಿ ಕೆಲಸದಲ್ಲಿರುವ ಮಕ್ಕಳು, ಆತ್ಮೀಯರೊಂದಿಗೆ, ಮನೆಯಲ್ಲಿದ್ದುಕೊಂಡೇ ವೈದ್ಯರೊಂದಿಗೆ ನೇರ ಸಂಭಾಷಣೆಗೆ ಇದು ಹೆಚ್ಚು ಅನುಕೂಲ. ಇದಲ್ಲದೆ, ನಾವು ನಮ್ಮ ಕರೆಯನ್ನು ಅತ್ತ ಕಡೆ ಇರುವವರು ಸ್ವೀಕರಿಸದಿದ್ದರೆ, ವೀಡಿಯೊ ಸಂದೇಶ ಕಳುಹಿಸುವ ಆಯ್ಕೆಯೂ ಇದೆ.
ಇದಕ್ಕೆ ಇಂಟರ್ನೆಟ್ ಸಂಪರ್ಕವಂತೂ ಬೇಕೇ ಬೇಕು. ಉತ್ತಮ ಗುಣಮಟ್ಟದ ವೀಡಿಯೊ ಇದರ ವಿಶೇಷತೆಗಳಲ್ಲೊಂದು. ದುರ್ಬಲ ಇಂಟರ್ನೆಟ್ ಸಂಪರ್ಕದಲ್ಲೂ ಕೆಲಸ ಮಾಡುತ್ತದೆ. ಅದೇ ರೀತಿ ವೈಫೈ ಹಾಗೂ ಮೊಬೈಲ್ ಡೇಟಾ ನಡುವೆ ಬದಲಾವಣೆ ಮಾಡಿಕೊಳ್ಳುವಾಗಲೂ ಯಾವುದೇ ಅಡಚಣೆಗಳಾಗುವುದಿಲ್ಲ.
ಹೇಗೆ ಬಳಸುವುದು: ಆ್ಯಪಲ್ ಆ್ಯಪ್ ಸ್ಟೋರ್ ಅಥವಾ ಆಂಡ್ರಾಯ್ಡ್ ಗೂಗಲ್ ಪ್ಲೇ ಸ್ಟೋರ್‌ನಿಂದ ಗೂಗಲ್ ಡ್ಯುಯೋ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡು ಇನ್‌ಸ್ಟಾಲ್ ಮಾಡಿಕೊಳ್ಳಿ. ಅದನ್ನು ತೆರೆಯಿರಿ. ನಿಮ್ಮ ಫೋನ್ ನಂಬರ್ ದಾಖಲಿಸಿ, ದೃಢೀಕರಣಕ್ಕಾಗಿ ಎಸ್ಸೆಮ್ಮೆಸ್ ಸಂದೇಶದ ಮೂಲಕ ಒಂದು ಕೋಡ್ ಕಳುಹಿಸುತ್ತದೆ. ಅದನ್ನು ಎಂಟರ್ ಮಾಡಿ. ಬಳಿಕ ನಿಮ್ಮ ಸಂಪರ್ಕಗಳಿಗೆ, ಕರೆ ಮಾಡಲು ಮತ್ತು ಸ್ವೀಕರಿಸಲು ಅನುಮತಿ ಕೇಳುತ್ತದೆ. ನಂತರ ನಿಮ್ಮ ಫೋನ್‌ನ ಮುಂಭಾಗದ ಕ್ಯಾಮೆರಾ ತೆರೆದುಕೊಳ್ಳುತ್ತದೆ. ಈಗಾಗಲೇ ಡ್ಯುಯೋ ಅಳವಡಿಸಿಕೊಂಡಿರುವ ನಿಮ್ಮ ಕಾಂಟ್ಯಾಕ್ಟ್ಸ್ ಪಟ್ಟಿಯಲ್ಲಿರುವವರ ಹೆಸರುಗಳು ಮೊದಲು ಕಾಣಿಸಿಕೊಂಡರೆ, ಡ್ಯುಯೋ ಹೊಂದಿಲ್ಲದವರನ್ನು ಡ್ಯುಯೋ ಅಳವಡಿಸಲು ಆಹ್ವಾನ ನೀಡುವ ಆಯ್ಕೆಯೂ ಗೋಚರಿಸುತ್ತದೆ.
ಡ್ಯುಯೋ ಆ್ಯಪ್ ತೆರೆದಾಗ ಬಲ ಮೇಲ್ಭಾಗದಲ್ಲಿ ಮೂರು ಚುಕ್ಕಿಗಳನ್ನು ಕ್ಲಿಕ್ ಮಾಡುವ ಮೂಲಕ ಸೆಟ್ಟಿಂಗ್ಸ್ ಮೆನು ತೆರೆಯಬಹುದು. ಇಲ್ಲಿ ಕರೆ ಬಂದಾಗ ವೈಬ್ರೇಟ್ ಆಗುವುದನ್ನು ಆಫ್ ಆಗುವಂತೆ ಹೊಂದಿಸಬಹುದು. ಡ್ಯುಯೋದಲ್ಲಿ ನಾಕ್ ನಾಕ್ (Knock Knock) ಎಂಬೊಂದು ವೈಶಿಷ್ಟ್ಯವಿದೆ. ಅದೆಂದರೆ, ನಾವು ಯಾರಿಗಾದರೂ ಕರೆ ಮಾಡುವಾಗ ಅವರು ಕರೆ ಸ್ವೀಕರಿಸುವ ಮುನ್ನವೇ ನಾವು ಕಾಣಿಸುತ್ತೇವೆ. ಅವರು ನಾವು ಎಲ್ಲಿಂದ, ಯಾವ ರೂಪದಲ್ಲಿ ಕರೆ ಮಾಡುತ್ತಿದ್ದೇವೆಂಬುದನ್ನು ಮುಂಚಿತವಾಗಿ ತಿಳಿದುಕೊಳ್ಳಬಹುದಾಗಿದೆ. ಇದು ನಿಮಗಿಷ್ಟವಿಲ್ಲ ಎಂದಾದರೆ, ಸೆಟ್ಟಿಂಗ್ಸ್ ಮೆನುವಿನಲ್ಲಿ ಈ ವೈಶಿಷ್ಟ್ಯವನ್ನು ಆಫ್ ಮಾಡಬಹುದಾಗಿದೆ.