ಕಂಪ್ಯೂಟರ್‌ನಿಂದ Instagram ಗೆ ಫೋಟೋ ಅಪ್‌ಲೋಡ್ ಮಾಡುವುದು ಹೀಗೆ!

0
118

Instragram from Computerಫೇಸ್‌ಬುಕ್, ಟ್ವಿಟರ್ ಮುಂತಾದವುಗಳ ಬಳಿಕ ಈಗ ಸದ್ದು ಮಾಡುತ್ತಿರುವ ಆನ್‌ಲೈನ್ ಸೋಷಿಯಲ್ ಮೀಡಿಯಾ ತಾಣವೆಂದರೆ ಇನ್‌ಸ್ಟಾಗ್ರಾಂ. ಇದು ಕೂಡ ವಾಟ್ಸ್ಆ್ಯಪ್‌ನಂತೆಯೇ ಫೇಸ್‌ಬುಕ್ ಒಡೆತನದಲ್ಲಿರುವ ತಾಣ. ಹೀಗಾಗಿ ಫೇಸ್‌ಬುಕ್ ಖಾತೆ ಹೊಂದಿದ್ದವರು ಇನ್‌ಸ್ಟಾಗ್ರಾಂನಲ್ಲಿ ಕೂಡ ನೇರವಾಗಿ ಖಾತೆ ತೆರೆಯುವುದು ಸುಲಭ. ಇದರಲ್ಲಿ ಹೆಚ್ಚಾಗಿ ಚಿತ್ರಗಳು, ವೀಡಿಯೊಗಳಲ್ಲದೆ, ನಮ್ಮ ಸ್ಟೋರಿಗಳನ್ನು ಹಂಚಿಕೊಳ್ಳಬಹುದು. ಇಲ್ಲಿ ಖಾತೆ ತೆರೆದರೆ, ಫೇಸ್‌ಬುಕ್ ತಾಣದಲ್ಲಿರುವ ಯಾವುದೇ ಸ್ನೇಹಿತರು ಇನ್‌ಸ್ಟಾಗ್ರಾಂ ಸೇರಿದಾಗ ನಿಮಗೂ ನೋಟಿಫಿಕೇಶನ್ ಬರುತ್ತಾ ಇರುತ್ತದೆ. ಈ ಕಿರು ತಾಣದಲ್ಲಿ ಚಿತ್ರ ಮತ್ತು ವೀಡಿಯೊಗಳದ್ದೇ ಕಾರುಬಾರು ಹೆಚ್ಚು.

ಇಂಥ ಇನ್‌ಸ್ಟಾಗ್ರಾಂ ತಾಣವನ್ನು ಕಂಪ್ಯೂಟರಿನಲ್ಲಿ ಬಳಸುವುದು ಹೇಗೆ ಎಂಬುದು ಹಲವರ ಪ್ರಶ್ನೆ. ಮೊಬೈಲ್ ಸ್ಮಾರ್ಟ್ ಫೋನ್‌ಗಳಲ್ಲಾದರೆ ಇನ್‌ಸ್ಟಾಗ್ರಾಂ ಬಳಸಲು ಆ್ಯಪ್ ಇದೆ. ಕಂಪ್ಯೂಟರಿನಲ್ಲಿ ಬ್ರೌಸರ್ ಮೂಲಕವೂ ಇನ್‌ಸ್ಟಾಗ್ರಾಂ ಖಾತೆಗೆ ಲಾಗಿನ್ ಆಗಬಹುದಾದರೂ ಇಲ್ಲಿ ಫೋಟೋ ಅಥವಾ ವೀಡಿಯೊಗಳನ್ನು ಹಂಚಿಕೊಳ್ಳುವುದು ಅಸಾಧ್ಯ. ವೆಬ್ ಆವೃತ್ತಿಯಲ್ಲಿ ಇನ್‌ಸ್ಟಾಗ್ರಾಂನಲ್ಲಿ ಸೀಮಿತವಾದ ಕೆಲಸ ಕಾರ್ಯಗಳನ್ನು ಮಾತ್ರ ಮಾಡಬಹುದು. ಕೆಲವರಿಗೆ ಮೊಬೈಲ್‌ಗಿಂತಲೂ ಲ್ಯಾಪ್‌ಟಾಪ್ ಅಥವಾ ಡೆಸ್ಕ್‌ಟಾಪ್ ಮೂಲಕವೇ ಇನ್‌ಸ್ಟಾಗ್ರಾಂ ಜಾಲಾಡುವುದು ಇಷ್ಟದ ವಿಷಯವಾದುದರಿಂದ ಅವರು ಈ ಕುರಿತು ಸಲಹೆ ಕೇಳಿದ್ದಾರೆ. ನಿಮಗೂ ಕಂಪ್ಯೂಟರ್‌ನಲ್ಲಿ ಬ್ರೌಸರ್ ಮೂಲಕವೇ ಇನ್‌ಸ್ಟಾಗ್ರಾಂ ಅನ್ನು ಪೂರ್ಣಪ್ರಮಾಣದಲ್ಲಿ ಬಳಸಬೇಕೆಂದಿದ್ದರೆ ಸುಲಭೋಪಾಯ ಇಲ್ಲಿದೆ.

ಮುಖ್ಯವಾಗಿ ಬೇಕಾಗಿರುವುದು ಗೂಗಲ್ ಕ್ರೋಮ್ ಎಂಬ ಬ್ರೌಸರ್. ಅದರ ಲೇಟೆಸ್ಟ್ ಆವೃತ್ತಿಯನ್ನು ಕಂಪ್ಯೂಟರಿಗೆ ಇನ್‌ಸ್ಟಾಲ್ ಮಾಡಿಕೊಳ್ಳಿ. ನಂತರ, ಬ್ರೌಸರ್‌ನ ಮೆನುವಿಗೆ ಹೋಗಲು ಬಲ ಮೇಲ್ಭಾಗದಲ್ಲಿರುವ ಲಂಬಸಾಲಿನ ಮೂರು ಚುಕ್ಕಿಗಳನ್ನು ಕ್ಲಿಕ್ ಮಾಡಿ. ‘ಮೋರ್ ಟೂಲ್ಸ್’ ಅಂತ ಕ್ಲಿಕ್ ಮಾಡಿದಾಗ, ಮತ್ತೊಂದು ವಿಂಡೋ ಪಾಪ್-ಔಟ್ ಆಗುತ್ತದೆ. ಅಲ್ಲಿ ‘ಡೆವಲಪರ್ ಟೂಲ್ಸ್’ ಎಂಬುದನ್ನು ಕ್ಲಿಕ್ ಮಾಡಿ. ಇಲ್ಲವಾದರೆ, ಬ್ರೌಸರ್ ತೆರೆದಿರುವಾಗ ಶಾರ್ಟ್‌ಕಟ್ ವಿಧಾನವೆಂದರೆ, ಶಿಫ್ಟ್, ಕಂಟ್ರೋಲ್ ಹಾಗೂ ‘ಸಿ’ ಕೀಗಳನ್ನು ಏಕಕಾಲದಲ್ಲಿ ಒತ್ತುವುದು. ಕೆಲವು ಕಂಪ್ಯೂಟರುಗಳಲ್ಲಿ ಮತ್ತೊಂದು ಶಾರ್ಟ್‌ಕಟ್ ವಿಧಾನವೆಂದರೆ, ನಂಬರ್ ಲಾಕ್ ಕೀ ಒತ್ತುವುದು. ಕೆಲವು ಕಂಪ್ಯೂಟರುಗಳಲ್ಲಿ, ಬೇರೆಯೇ ವಿಂಡೋ ಒಂದು ತೆರೆದುಕೊಳ್ಳುತ್ತದೆ. ಅದು ಪಕ್ಕನೇ ಗಮನಕ್ಕೆ ಬರುವುದಿಲ್ಲ. ಅದು ಡೆವಲಪರ್‌ಗಳಿಗಾಗಿರುವ ವಿಂಡೋ ಎಂಬುದು ನೆನಪಿರಲಿ. ಅದರಲ್ಲಿ ಕೋಡ್‌ಗಳ ರೀತಿ ಅಕ್ಷರಗಳು ಕಾಣಿಸುತ್ತವೆ.

ಈಗ ಈ ವಿಂಡೋದಲ್ಲಿ ‘ಎಲಿಮೆಂಟ್ಸ್’ ಎಂಬ ಟ್ಯಾಬ್‌ನ ಎಡಭಾಗದಲ್ಲಿ, ಪುಟ್ಟದಾದ ಮೊಬೈಲ್ ಫೋನ್ ಐಕಾನ್ ಕಾಣಿಸುತ್ತದೆ. ಅದನ್ನು ಕ್ಲಿಕ್ ಮಾಡಿ. ಇದಾದ ಬಳಿಕ ಇನ್‌ಸ್ಟಾಗ್ರಾಂ ಪುಟವನ್ನು ರೀಫ್ರೆಶ್ ಮಾಡಿ (ಇದಕ್ಕೆ ಎಫ್-5 ಅಥವಾ ಕಂಟ್ರೋಲ್+ಎಫ್5 ಕೀಗಳನ್ನು ಬಳಸಬಹುದು).

ಈಗ ಇನ್‌ಸ್ಟಾಗ್ರಾಂ ಪುಟದ ಎಡಮೇಲ್ಭಾಗದಲ್ಲಿ ಕೆಲವೊಂದು ಮೊಬೈಲ್ ಫೋನ್ ಮಾಡೆಲ್‌ಗಳನ್ನು ಆಯ್ಕೆ ಮಾಡಿಕೊಳ್ಳುವ ಡ್ರಾಪ್‍ಡೌನ್ ವಿಂಡೋ ಕಾಣಿಸುತ್ತದೆ. ಅದರಲ್ಲಿ ಯಾವುದಾದರೊಂದನ್ನು ಆಯ್ಕೆ ಮಾಡಿಕೊಳ್ಳಿ. ಈ ಪುಟದಲ್ಲೀಗ ನೀವು ನಿಮ್ಮ ಕಂಪ್ಯೂಟರಿನಲ್ಲಿರುವ ಫೋಟೋಗಳನ್ನೂ ಇನ್‌ಸ್ಟಾಗ್ರಾಂಗೆ ಅಪ್‌ಲೋಡ್ ಮಾಡಬಹುದು. ಪ್ರತ್ಯೇಕ ವಿಂಡೋ ಕ್ಲೋಸ್ ಮಾಡಿದಾಗ, ಪುಟವು ಮತ್ತೆ ಹಿಂದಿನ ಸ್ಥಿತಿಗೆ ಮರಳುತ್ತದೆ. ಮಾಡಿ ನೋಡಿ.

ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ., ಆಗಸ್ಟ್ 27, 2018 ಅಂಕಣ

LEAVE A REPLY

Please enter your comment!
Please enter your name here