“ಒಕೆ ಗೂಗಲ್, ಬೆಂಗಳೂರಿನಿಂದ ಮಂಗಳೂರಿಗೆ ಹೋಗಲು ಮ್ಯಾಪ್ ತೋರಿಸು”
“ಹೇ ಗೂಗಲ್, ನಾಳೆ 3.30ಕ್ಕೆ ಕಚೇರಿಯ ಮೀಟಿಂಗ್‌ಗೆ ನೆನಪಿಸು”
ಹೀಗೆ ಹೇಳಿದರೆ ಸಾಕು. ನಿಮ್ಮ ಮೊಬೈಲ್ ನಿಮ್ಮ ಆಜ್ಞಾನುವರ್ತಿ ಸಹಾಯಕನಂತೆ ಕೆಲಸ ಮಾಡುತ್ತದೆ. ಇದು ನಮ್ಮ ಫೋನ್‌ನಲ್ಲಿರುವ ಗೂಗಲ್ ಅಸಿಸ್ಟೆಂಟ್ ಎಂಬ ಅದ್ಭುತ. ಸಾಮಾನ್ಯ ಭಾಷೆಯಲ್ಲಿ ಹೇಳುವುದಾದರೆ ನಮಗೊಬ್ಬ ಪಿಎ (ಪರ್ಸನಲ್ ಅಸಿಸ್ಟೆಂಟ್) ಇದ್ದಂತೆ.
ಕೆಲವರಿಗೆ ಈ ಬಗ್ಗೆ ತಿಳಿದಿದೆ, ಬಳಸುತ್ತಾ ಸದುಪಯೋಗಪಡಿಸಿಕೊಳ್ಳುತ್ತಿದ್ದಾರೆ. ಆದರೆ ಹಲವರಲ್ಲಿ ಈ ಬಗ್ಗೆ ಹೇಳಿದಾಗ ಅಚ್ಚರಿಪಟ್ಟಿದ್ದಾರೆ, ಹೀಗೂ ಉಂಟೇ ಅಂತನೂ ಕೇಳಿದ್ದಾರೆ. ತಿಳಿಯದವರಿಗಾಗಿ ಈ ಅಸಾಮಾನ್ಯ ಸಾಮರ್ಥ್ಯದ ಮತ್ತು ಬಳಕೆಗೆ ಸುಲಭವಾಗಿರುವ ಗೂಗಲ್ ಅಸಿಸ್ಟೆಂಟ್ ಕುರಿತು ಮಾಹಿತಿ ಇಲ್ಲಿದೆ.
ನಾವೆಲ್ಲಿ ಹೋಗುತ್ತೇವೆ, ಏನು ಮಾಡುತ್ತೇವೆ, ಫೋನ್‌ನಲ್ಲಿ ಯಾವುದನ್ನು ನೋಡುತ್ತೇವೆ, ಯಾರಿಗೆ ಕರೆ, ಮೆಸೇಜ್, ಇಮೇಲ್ ಮಾಡುತ್ತೇವೆ ಎಂಬುದೆಲ್ಲವನ್ನೂ ಗೂಗಲ್ ಆಂಡ್ರಾಯ್ಡ್ ಮೊಬೈಲ್‌ನಲ್ಲಿ ಟ್ರ್ಯಾಕ್ ಮಾಡುತ್ತಿರುತ್ತದೆ. ಇದಕ್ಕೆ ಈಗಿನ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್, ಜಿಪಿಎಸ್ ಮುಂತಾದ ತಂತ್ರಜ್ಞಾನಗಳ ನೆರವು ಇರುತ್ತದೆ. ಆ್ಯಪಲ್ ಫೋನ್‌ಗಳಲ್ಲಿ ‘ಸಿರಿ’, ವಿಂಡೋಸ್‌ನ ‘ಕೋರ್ಟನಾ’ ತಂತ್ರಾಂಶದಂತೆಯೇ, ಈ ಗೂಗಲ್ ಅಸಿಸ್ಟೆಂಟ್, ನಮ್ಮ ಫೋನ್‌ನಲ್ಲಿ ಏನೇನಿದೆ, ಯಾವ ಆ್ಯಪ್‌ಗೆ ಯಾವ ಮಾಹಿತಿ ನೀಡಲಾಗಿದೆ ಎಂದೆಲ್ಲಾ ತಿಳಿದುಕೊಂಡಿರುತ್ತದೆ. ಹೀಗಾಗಿ ನೀವು ಕೇಳಿದ ತಕ್ಷಣ ನಿಮ್ಮ ಸಹಾಯಕನಂತೆ ಉತ್ತರ ನೀಡುತ್ತದೆ, ರಿಮೈಂಡರ್, ಅಲಾರಂ, ಮೀಟಿಂಗ್, ಪ್ರಯಾಣ ಮುಂತಾದವುಗಳನ್ನು ನಿಗದಿಪಡಿಸಿಟ್ಟುಕೊಂಡಿರುತ್ತದೆ, ಸರಿಯಾದ ಸಮಯಕ್ಕೆ ಜ್ಞಾಪಿಸುತ್ತದೆ. ನೀವು ಕೇಳಿದ ಮಾಹಿತಿಯು ಫೋನ್‌ನ ಮೂಲಕ ಸಿಗದಿದ್ದರೆ, ಇಂಟರ್ನೆಟ್ ಜಾಲಾಡಿ ಮಾಹಿತಿಯನ್ನು ನಿಮ್ಮ ಮುಂದಿಡುತ್ತದೆ.
ಇದನ್ನು ಹೇಗೆ ಬಳಸುವುದು
ಮೊದಲನೆಯದಾಗಿ ನಮ್ಮ ಫೋನ್‌ನ ಕಾರ್ಯಾಚರಣಾ ವ್ಯವಸ್ಥೆ ಲೇಟೆಸ್ಟ್ ಆಗಿರಬೇಕು. ಈಗಿನ ಆಂಡ್ರಾಯ್ಡ್ 7 (ನೌಗಾಟ್), 8 (ಒರಿಯೋ) ಹಾಗೂ 9 (ಪೈ) ಒಎಸ್ ಇರುವ ಫೋನ್‌ಗಳಲ್ಲಿ ಇದು ಸುಲಲಿತವಾಗಿ ಕೆಲಸ ಮಾಡುತ್ತದೆ. ಗೂಗಲ್ ಪ್ಲೇ ಸ್ಟೋರ್ ಆ್ಯಪ್ ಮೂಲಕ ಹೋಗಿ, ‘ಮೈ ಆ್ಯಪ್ಸ್ ಆ್ಯಂಡ್ ಗೇಮ್ಸ್’ ಕ್ಲಿಕ್ ಮಾಡಿದಾಗ, ಯಾವುದಾದರೂ ಆ್ಯಪ್‌ಗಳು ಅಪ್‌ಡೇಟ್ ಆಗಲು ಬಾಕಿ ಇದ್ದರೆ ಅಪ್‌ಡೇಟ್ ಮಾಡಿಕೊಳ್ಳಿ. ವಿಶೇಷವಾಗಿ ಗೂಗಲ್, ಪ್ಲೇ ಸರ್ವಿಸಸ್ ಎಂಬೆರಡು ಆ್ಯಪ್‌ಗಳು ಲೇಟೆಸ್ಟ್ ಆಗಿರಬೇಕು. ಹೆಚ್ಚಿನ ಹೊಸ ಫೋನ್‌ಗಳಲ್ಲಿ ಗೂಗಲ್ ಅಸಿಸ್ಟೆಂಟ್ ಮೊದಲೇ ಅಳವಡಿಕೆಯಾಗಿರುತ್ತದೆ. ಇದನ್ನು ಎನೇಬಲ್ ಮಾಡಲು, ಸ್ಕ್ರೀನ್ ಮೇಲಿರುವ ಹೋಂ ಬಟನ್ ಒತ್ತಿ ಹಿಡಿದುಕೊಳ್ಳಿ. ಗೂಗಲ್ ಅಸಿಸ್ಟೆಂಟ್‌ಗೆ ನಿಮ್ಮ ಧ್ವನಿಯನ್ನು ಗುರುತು ಹಿಡಿಯಲು ಎರಡು ಬಾರಿ “ಒಕೆ ಗೂಗಲ್” ಎಂದೂ, ಎರಡು ಬಾರಿ “ಹೇಯ್ ಗೂಗಲ್” ಎಂದೂ ಉಚ್ಚರಿಸಬೇಕಾಗುತ್ತದೆ. ಸ್ಕ್ರೀನ್ ಮೇಲೆ ಗೂಗಲ್ ಅಸಿಸ್ಟೆಂಟ್ ಈ ಕುರಿತು ನಿಮಗೆ ಸೂಚನೆ ನೀಡುತ್ತದೆ. ಕೆಲವು ಫೋನ್‌ಗಳಲ್ಲಿ ಮೂರು ಬಾರಿ “ಒಕೆ ಗೂಗಲ್” ಅಂತ ಹೇಳಬೇಕಾಗಬಹುದು.
ನಿಮ್ಮ ಧ್ವನಿ ಗುರುತಿಸಿಯೇ, ಮುಂದೆ ನೀವು ‘ಒಕೆ ಗೂಗಲ್’ ಅಂತ ಹೇಳಿದಾಕ್ಷಣ ಸ್ಕ್ರೀನ್ ಅನ್‌ಲಾಕ್ ಆಗುವಂತೆ ಸೆಟ್ ಮಾಡಿಕೊಳ್ಳುವ ಆಯ್ಕೆಯೂ ಇರುತ್ತದೆ. ಗೂಗಲ್ ಅಸಿಸ್ಟೆಂಟ್ ನಿಮ್ಮ ಕ್ಯಾಮೆರಾ, ಕ್ಯಾಲೆಂಡರ್, ಕಾಂಟ್ಯಾಕ್ಟ್ಸ್, ಇಮೇಲ್… ಹೀಗೆ ಹೆಚ್ಚಿನ ಆ್ಯಪ್‌ಗಳ ಆ್ಯಕ್ಸೆಸ್‌ಗೆ ಅನುಮತಿ ಕೇಳಿ, ಅದರಿಂದ ಮಾಹಿತಿ ಕಲೆಹಾಕುತ್ತದೆ. ಸದ್ಯಕ್ಕೆ ಇದು ಇಂಗ್ಲಿಷಿನಲ್ಲಿ ಮಾತ್ರ ಲಭ್ಯವಿದ್ದು, ಶೀಘ್ರದಲ್ಲೇ ಕನ್ನಡ ಸಹಿತ ಹಲವಾರು ಭಾಷೆಗಳನ್ನು ಬೆಂಬಲಿಸಲಿದೆ. ಸ್ಕ್ರೀನ್ ಆಫ್ ಆಗಿರುವಾಗಲೇ, ಒಕೆ ಗೂಗಲ್, “ಕಾಲ್ ಅಮ್ಮ” ಅಂತ ಹೇಳಿದರೆ, ಅಮ್ಮ ಎಂದು ಸೇವ್ ಮಾಡಿಟ್ಟುಕೊಂಡಿರುವ ಸಂಖ್ಯೆಗೆ ಕರೆ ಹೋಗುತ್ತದೆ. ಇದೇ ರೀತಿ ಸಾಕಷ್ಟು ಕಮಾಂಡ್‌ಗಳನ್ನು ಬಳಸಿ ನಮಗೆ ಬೇಕಾದ ಕೆಲಸ ಮಾಡಿಸಿಕೊಳ್ಳಬಹುದು ಈ ಸಹಾಯಕನಿಂದ!
ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ.; ವಿಜಯ ಕರ್ನಾಟಕ ಅಂಕಣ, 03 ಡಿಸೆಂಬರ್ 2018
