ವಿಜಯ ಕರ್ನಾಟಕ ಸಾಪ್ತಾಹಿಕದಲ್ಲಿ (ಮೇ 12, 2013) ಪ್ರಕಟವಾದ ಅಗ್ರಲೇಖನ
ನೆಂಟರಿಷ್ಟರ ಮನೆಗೆ ಹೋದಾಗಲೋ, ಮದುವೆಯಂತಹಾ ಶುಭ ಸಮಾರಂಭಗಳಿಗೆ ಹೋದಾಗಲೋ, ಮಕ್ಕಳು ತಮ್ಮದೇ ಆದ ಲೋಕವೊಂದರಲ್ಲಿ ಮುಳುಗಿರುತ್ತವೆ. ಕೈಯಲ್ಲೊಂದು ಮೊಬೈಲ್ ಫೋನ್ ಇದ್ದರೆ, ಲೋಕದ ಆಗುಹೋಗುಗಳ ಪರಿವೆಯೇ ಇಲ್ಲ. ಮಕ್ಕಳು ಕೆಟ್ಟು ಹೋಗುತ್ತಿದ್ದಾರೆ ಅಂತ ಸಿಡುಕುತ್ತೇವಾದರೂ ಈ ಮಕ್ಕಳ ಗಮನವನ್ನು ಮೊಬೈಲ್ ಫೋನ್‌ನಿಂದ ಈಚೆ ತಿರುಗಿಸಲು ಸೋತು ಸುಣ್ಣವಾಗುತ್ತೇವೆ. ಹಾಗಂತ ಎಲ್ಲ ಮಕ್ಕಳೂ ಕೆಟ್ಟು ಹೋಗುತ್ತಾರೆ ಅಂತ ಹಪಹಪಿಸಬೇಕಿಲ್ಲ, ಮಕ್ಕಳು ಕೆಟ್ಟು ಹೋಗಿರುವುದಕ್ಕೆ ದಾಖಲೆಗಳೂ ಇಲ್ಲ; ಇಂದಿನ ಮಕ್ಕಳೇ ಮುಂದಿನ ಜನಾಂಗವೇ ಅಲ್ಲವೇ? ಮೊಬೈಲ್ ಫೋನ್ ಎಂಬ ಅಂಗೈಯಲ್ಲಿನ ಅದ್ಭುತವನ್ನು ಬಳಸಿಯೇ ಮಕ್ಕಳು ಬೆಳೆಯುತ್ತಿದ್ದಾರೆ, ಜಗ ಬೆಳಗುತ್ತಿದ್ದಾರೆ…!
ಎರಡು ವಾರಗಳ ಹಿಂದೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿ –ಸದ್ದು ಮಾಡಿದ ಲಂಡನ್‌ನ ಹುಡುಗ ನಿಕ್ ಡಿ’ಅಲೋಯ್ಸಿಯೋ ಏರಿದ ಎತ್ತರವನ್ನು ಅವಲೋಕಿಸಿದರೆ, ಹೊಸದೇನನ್ನಾದರೂ ಮಾಡುವ, ಸಂಶೋಧನಾ ತುಡಿತವುಳ್ಳ ಮಕ್ಕಳು ಮೊಬೈಲ್ ಫೋನ್‌ಗಳಲ್ಲಿ ಆಟವಾಡುತ್ತಲೇ ಯಾವ ಮಟ್ಟಕ್ಕೆ ಏರಬಹುದು ಎಂಬುದಕ್ಕೆ ತಾಜಾ ಉದಾಹರಣೆಯಾಗಿ ನಿಂತಿದ್ದಾನೆ. ಶಾಲಾ ಬಾಲಕನೊಬ್ಬ ಸ್ಮಾರ್ಟ್‌ಫೋನ್‌ಗಳಿಗೆ ಅಗತ್ಯವಾಗಿರುವ App (ಅಪ್ಲಿಕೇಶನ್ ಎಂಬುದರ ಹೃಸ್ವರೂಪ) ಒಂದನ್ನು ತಯಾರಿಸುವುದೇ ಅಚ್ಚರಿಯ ಸುದ್ದಿಯಾದರೆ, ಅದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಗಳಿಸಿ ಇಂದು ಅವನನ್ನು ಶತಕೋಟ್ಯಧಿಪತಿಯನ್ನಾಗಿಸಿದೆ ಎಂದರೆ ಹೇಗಾಗಬೇಡ!
ನಿಕ್ ಡಿ’ಅಲೋಯ್ಸಿಯೋ ಎರಡು ವರ್ಷಗಳ ಹಿಂದೆ ಅಂದರೆ ತನ್ನ 15ನೇ ವರ್ಷದಲ್ಲೇ ಸ್ಮಾರ್ಟ್‌ಫೋನ್‌ಗಳ ಈ ಯುಗಕ್ಕೆ ಭರ್ಜರಿಯಾಗಿಯೇ ಪಾದಾರ್ಪಣೆ ಮಾಡಿದ್ದ. ಆತ ರೂಪಿಸಿದ Summly (http://summly.com/) ಎಂಬ, ಜಗತ್ತಿನ ಮೂಲೆ ಮೂಲೆಗಳಿಂದ ಸುದ್ದಿಗಳನ್ನು ಸಂಗ್ರಹಿಸಿ ಅದರ ಸಮ್ಮರಿ (ಸಾರಾಂಶ)ವನ್ನು 400 ಶಬ್ದಗಳಲ್ಲಿ ನಿಮ್ಮ ಐಫೋನ್‌ನ ಪರದೆಯ ಮುಂದೆ ತಂದಿಡುವ ಅಪ್ಲಿಕೇಶನ್, Apple ಸ್ಟೋರ್‌ನಲ್ಲಿ (iTunes) ಅಂದರೆ ಐಫೋನ್ ಬಳಕೆದಾರರಲ್ಲಿ ಅತ್ಯಂತ ಜನಪ್ರಿಯವಾಗಿತ್ತು. ತೀರಾ ಇತ್ತೀಚೆಗೆ ಇಂಟರ್ನೆಟ್ ದಿಗ್ಗಜ ಸಂಸ್ಥೆಗಳಲ್ಲೊಂದಾದ ‘ಯಾಹೂ’ ಈ ತಂತ್ರಜ್ಞಾನವನ್ನು 30 ಮಿಲಿಯ ಡಾಲರ್ (ಹೌದು, 3 ಕೋಟಿ ಡಾಲರ್, ಅಂದರೆ ಸುಮಾರು 164 ಕೋಟಿ ರೂಪಾಯಿ) ಕೊಟ್ಟು ಖರೀದಿಸಿದೆ!
ಬದಲಾದ ಮಕ್ಕಳ ಮನಸ್ಥಿತಿ
‘ಬೊಗಳಿ ಬೊಗಳಿ ರಾಗ, ಉಗುಳಿ ಉಗುಳಿ ರೋಗ’ ಎಂಬ ಮಾತನ್ನು ಕೇಳಿದ್ದೇವೆ. ಅರ್ಥ – ಒಂದು ನಿರ್ದಿಷ್ಟ ವಿಷಯದ ಮೇಲೆ ಗಮನ ಕೇಂದ್ರೀಕರಿಸಿದರೆ ಅಲ್ಲೊಂದು ಹೊಸ ಹೊಳಪು, ಹೊಸ ಅವಕಾಶ, ಹೊಸ ಮಾರ್ಗ, ಹೊಸ ಸಂಶೋಧನೆ ಹುಟ್ಟುತ್ತದೆ ಮತ್ತು ಈ ಮೂಲಕ ಹೊಸ ಇತಿಹಾಸ ಸೃಷ್ಟಿಯಾಲೂಬಹುದು. ಅಂತೆಯೇ, ಶಾಲೆಯಲ್ಲಿ ಪಾಠ, ಬಯಲಲ್ಲಿ ಆಟ ಆಡುತ್ತಾ ಕಳೆಯಬೇಕಾದ ಮಕ್ಕಳು ಅತಿಯಾಗಿ ತಂತ್ರಜ್ಞಾನದತ್ತ ಸೆಳೆತಕ್ಕೊಳಗಾದರೆ ಈ ರೀತಿ ಸಕಾರಾತ್ಮಕ ಬೆಳವಣಿಗೆಗೂ ಕಾರಣವಾಗಬಹುದು ಎಂಬುದನ್ನು ಈ ಮಕ್ಕಳು ತೋರಿಸಿಕೊಡುತ್ತಿದ್ದಾರೆ.
ದೊಡ್ಡವನಾದ್ಮೇಲೆ ಏನಾಗ್ತೀಯಾ ಅಂತ ಮಕ್ಕಳಲ್ಲಿ ಕೇಳಿದರೆ, ತಾವು ಹೆಚ್ಚಾಗಿ ಕಂಡ, ತಮಗೆ ಆಕರ್ಷಣೀಯವಾಗಿ ತೋರಿದ, ಇಷ್ಟಪಟ್ಟ ಕೆಲವೊಂದು ಪಾತ್ರಗಳು ಆ ಮುಗ್ಧ ಮಕ್ಕಳ ಕಣ್ಮುಂದೆ ಸುಳಿದು ಹೋಗಿರುವ ಕಾರಣ, ಪೊಲೀಸ್ ಆಗ್ತೀನಿ, ಬಸ್ ಡ್ರೈವರ್ ಆಗ್ತೀನಿ, ಕ್ರಿಕೆಟರ್ ಆಗ್ತೀನಿ, ಹೀರೋ ಆಗ್ತೀನಿ ಅಂತೆಲ್ಲಾ ಉತ್ತರ ಕೊಡಬಹುದು. ಜಾಗತೀಕರಣದೊಂದಿಗೆ ನಗರೀಕರಣವೂ ಜೋರಾಗಿಯೇ ಆಗಲಾರಂಭಿಸಿದ ಬಳಿಕ ಮಕ್ಕಳಲ್ಲಿ ಕೂಡ, “ನಾನು ದೊಡ್ಡೋನಾದ್ಮೇಲೆ ರೀಸರ್ಚ್ ಮಾಡ್ತೀನಿ, ನೀರಿನಲ್ಲೇ ಓಡೋ ಕಾರು ತಯಾರಿಸ್ತೀನಿ, ದುಷ್ಟ ಶಕ್ತಿಗಳನ್ನೆಲ್ಲಾ ನಾಶಪಡಿಸಬಲ್ಲ ಗನ್ ತಯಾರಿಸ್ತೀನಿ, ಅಂಗೈಯಲ್ಲೇ ಹೋಂ ವರ್ಕ್ ಮುಗಿಸಬಲ್ಲ ಸಾಫ್ಟ್‌ವೇರ್ ರೂಪಿಸ್ತೀನಿ” ಎಂಬಂತಹಾ ಭಾವನೆಗಳು ಬೆಳೆದಿವೆ. ತತ್ಪರಿಣಾಮವಾಗಿಯೇ ಹೊಸ ಹೊಸ ಅಪ್ಲಿಕೇಶನ್‌ಗಳು, ಹೊಸ ತಂತ್ರಾಂಶಗಳು, ಹೊಸ ಅನುಕೂಲಗಳು ಸೃಷ್ಟಿಯಾಗುತ್ತಿವೆ.
ವಿದೇಶದಿಂದ ಭಾರತದಲ್ಲಿಯೂ ಹೊಸ ಆಶಾಕಿರಣ
19ರ ಹರೆಯದಲ್ಲೇ ಫೇಸ್‌ಬುಕ್ ನಿರ್ಮಿಸಿದ ಮಾರ್ಕ್ ಜುಕರ್‌ಬರ್ಗ್, 21ರ ಹರೆಯದಲ್ಲಿ ಮಿಲಿಯನ್ ಡಾಲರ್ ಹೋಂ ಪೇಜ್ ಎಂಬ ವಿನೂತನ ಪುಟ ನಿರ್ಮಿಸಿದ ಇಂಗ್ಲೆಂಡ್‌ನ ಅಲೆಕ್ಸ್ ಟ್ಯೂ, 12ರ ಬಾಲ್ಯದಲ್ಲೇ ಸಾಕರ್‌ನೆಟ್ ಎಂಬ ವೆಬ್‌ಸೈಟ್ ತೆರೆದಿದ್ದ ಟಾಂ ಹ್ಯಾಡ್‌ಫೀಲ್ಡ್, 14ರ ಹದಿಹರೆಯದಲ್ಲಿ ಮ್ಯಾಕ್ ಬಂಡಲ್ ಬಾಕ್ಸ್ ಎಂಬ ಸಾಫ್ಟ್‌ವೇರ್ ಗುಚ್ಛ ತಯಾರಿಸಿದ ಕ್ರಿಸ್ಟಿಯಾನ್ ಓವೆನ್ಸ್, 18ರ ವಯಸ್ಸಿನಲ್ಲಿ ಕಂಪ್ಯೂಟರುಗಳ ನಡುವೆ ಹಾಡುಗಳನ್ನು ಹಂಚಿಕೊಳ್ಳಬಲ್ಲ ‘ನ್ಯಾಪ್‌ಸ್ಟರ್’ ಎಂಬ ತಂತ್ರಾಂಶ ತಯಾರಿಸಿದ ಶಾನ್ ಫ್ಯಾನಿಂಗ್ ಮುಂತಾದ ಟೀನೇಜ್ ಸೆನ್ಸೇಶನ್‌ಗಳು ವಿದೇಶಗಳಲ್ಲಿ ಮಿಂಚಿ ಹೆಸರು ಮಾಡಿರುವುದನ್ನು ನಾವು ಕೇಳಿದ್ದೇವೆ. ಭಾರತದಲ್ಲಿಯೂ ಇಂಥದ್ದೊಂದು ಟ್ರೆಂಡ್ App ಫೆಸ್ಟ್‌ಗಳು ಹಾಗೂ App ಲ್ಯಾಬ್‌ಗಳ ಮೂಲಕ ಆರಂಭವಾಗಿರುವುದು ಶುಭ ಲಕ್ಷಣ.
ಅದೆಷ್ಟೋ ಪ್ರತಿಭೆಗಳು ನಮ್ಮ ಸುತ್ತಮುತ್ತಲೂ ಇವೆ. 90ರ ದಶಕದ ಅಂತ್ಯಭಾಗದಲ್ಲಿ ಸಾಫ್ಟ್‌ವೇರ್ ಕ್ರಾಂತಿಯೊಂದು ಸ್ಫೋಟಗೊಂಡಾಗ ನಮ್ಮ ಪ್ರತಿಭೆಗಳೆಲ್ಲವೂ ಪಲಾಯನಗೈದಿದ್ದು ವಿದೇಶಕ್ಕೆ ಎಂಬುದು ದಿಟವಾದರೂ, ದೇಶದಲ್ಲಿದ್ದುಕೊಂಡೂ ಈ ತಂತ್ರಜ್ಞಾನ ಯುಗಸ್ಫೋಟಕ್ಕೆ ಕೊಡುಗೆ ಸಲ್ಲಿಸಿದವರೂ ಸಾಕಷ್ಟು ಮಂದಿಯಿದ್ದಾರೆ. ಅವರಲ್ಲಿ ಎಳೆಯ ಮಕ್ಕಳಂತೂ ಈಗ ಹೆಚ್ಚು ಹೆಚ್ಚು ಆಕರ್ಷಿತರಾಗುತ್ತಿದ್ದಾರೆ, ಕಂಪ್ಯೂಟರ್ ಪ್ರೋಗ್ರಾಮಿಂಗ್ ಕಲಿತು ಡೆಸ್ಕ್‌ಟಾಪ್‌ಗೆ ಹಾಗೂ ಮೊಬೈಲ್‌ಗಳಿಗೆ ಅಪ್ಲಿಕೇಶನ್‌ಗಳನ್ನು ರಚಿಸುವಷ್ಟರ ಮಟ್ಟಿಗೆ ಹೊಸ ಐಡಿಯಾಗಳನ್ನು ಮಾಹಿತಿ ಸಾಗರಕ್ಕೆ ಹರಿಯಬಿಡುತ್ತಿದ್ದಾರೆ ಎಂಬುದು ಸಂತಸದ ಸಂಗತಿಯೇ.
ಐಟಿ ಲೋಕದ ದಿಗ್ಗಜ ಸಂಸ್ಥೆಯಾಗಿರುವ ಮೈಕ್ರೋಸಾಫ್ಟ್ ಫೆಬ್ರವರಿ ಅಂತ್ಯಭಾಗದಲ್ಲಿ ಬೆಂಗಳೂರಿನಲ್ಲಿ ನಡೆಸಿದ “ಮೈಕ್ರೋಸಾಫ್ಟ್ ಇಂಡಿಯಾ ವಿಂಡೋಸ್-8 Appಫೆಸ್ಟ್ 2013″ನಲ್ಲಿ ಬೆಂಗಳೂರಿನ ಇಬ್ಬರು ಹೈಸ್ಕೂಲ್ ವಿದ್ಯಾರ್ಥಿಗಳು ಎಲ್ಲ ಗಮನ ಸೆಳೆದಿದ್ದರು. ರಾಯಲ್ ಕಾನ್‌ಕಾರ್ಡ್ ಸ್ಕೂಲ್‌ನ 9ನೇ ತರಗತಿ ವಿದ್ಯಾರ್ಥಿ ಕ್ರಿಸ್ ರೋಹಿತ್ ಬ್ರೆಂಡನ್ ಹಾಗೂ ಕೋರಮಂಗಲ ನ್ಯಾಷನಲ್ ಪಬ್ಲಿಕ್ ಸ್ಕೂಲ್‌ನ 10ನೇ ತರಗತಿ ವಿದ್ಯಾರ್ಥಿ ರಾಹುಲ್ ಡೊಮಿನಿಕ್ ಅವರು ರೂಪಿಸಿದ ಅಪ್ಲಿಕೇಶನ್‌ಗಳು ಎಲ್ಲರ ಕರತಾಡನಕ್ಕೆ ಪಾತ್ರವಾಗಿದ್ದವು.
ಇಂಥಹಾ ಬೆಳಕಿಗೆ ಬಾರದ ಸಾಕಷ್ಟು ಯುವ ಪ್ರತಿಭೆಗಳು ನಮ್ಮ ವಿದ್ಯಾರ್ಥಿ ಲೋಕದಲ್ಲಿವೆ. ಇವರು ಮೊಬೈಲ್‌ಗಳಿಗೆ ಅಪ್ಲಿಕೇಶನ್‌ಗಳನ್ನು ತಯಾರಿಸುತ್ತಲೇ ಸಾಕಷ್ಟು ಹಣವನ್ನೂ ಗಳಿಸುತ್ತಾರೆ. ಆರಂಭದಲ್ಲಿ ಕೆಲವು ಅಪ್ಲಿಕೇಶನ್‌ಗಳನ್ನು ತಯಾರಿಸಿ ಉಚಿತವಾಗಿ ಆಯಾ ಸಾಧನಗಳ ‘App ತಾಣ’ಗಳಿಗೆ ಬಿಡುತ್ತಾರೆ. ಹೆಸರು ಬಂದ ಬಳಿಕ, ಕೆಲವು ಕಂಪನಿಗಳೇ ಅವರನ್ನು ಸಂಪರ್ಕಿಸಿ, ನಮಗೂ App ಮಾಡಿಕೊಡಿ, ಇಂತಿಂಥಾ ವ್ಯವಸ್ಥೆ ಇರಬೇಕು ಅಂತೆಲ್ಲಾ ಬೇಡಿಕೆ ಮುಂದಿಟ್ಟ ಬಳಿಕ, ಅದಕ್ಕೆ ರಾಯಲ್ಟಿ ಕೊಡುತ್ತಾರೆ. ಹೀಗೆ ಒಂದೊಂದು ಅಪ್ಲಿಕೇಶನ್ ಮೂಲಕ 5000 ರೂ.ನಿಂದ ಲಕ್ಷಾಂತರ ರೂ.ವರೆಗೂ ಸಂಪಾದನೆ ಮಾಡಬಹುದು.
ಆಪಿಯಾಗಿರುವ ಮನಸ್ಥಿತಿ
ಈ App ಅಭಿವೃದ್ಧಿಪಡಿಸುವ ಮನೋಸ್ಥಿತಿಯಂತೂ ಭವಿಷ್ಯದಲ್ಲಿ ಸ್ಮಾರ್ಟ್‌ಫೋನ್‌ಗಳ ಮಹತ್ವವನ್ನೂ ಸಾರಿ ಹೇಳುತ್ತಿವೆ ಎಂಬುದರಲ್ಲಿ ಎರಡು ಮಾತಿಲ್ಲ. ಒಂದು ಮುಷ್ಟಿಯಲ್ಲಿ ಜಗತ್ತನ್ನೇ ನೋಡಬಲ್ಲ ಈ ಕಾಲದಲ್ಲಿ ಯುವ ಮನಸ್ಸುಗಳಲ್ಲಿನ ಈ ಮನೋಭಾವವು ಹೊಸ ಹೊಸ ಸಂಶೋಧನೆಗಳಿಗೆ ನಾಂದಿ ಹಾಡಬಹುದು. ಹಿಂದೆ ಏನೇನೋ ಕಲ್ಪನೆಗಳನ್ನು ಮಾಡಿಕೊಳ್ಳುತ್ತಾ, ತಮಾಷೆ ಮಾಡಿಕೊಳ್ಳುತ್ತಿದ್ದ ಅಂಶಗಳು ಇಂದು ನನಸಾಗಿ ಸಾಕಾರಗೊಳ್ಳುತ್ತಿವೆ. ಒಂದು ಸಣ್ಣ ಉದಾಹರಣೆ – ಗೂಗಲ್ ಗ್ಲಾಸ್. ಈ ಕನ್ನಡಕವನ್ನು ಧರಿಸಿ, ಬಾಯಿಯಲ್ಲಿ ಆದೇಶ ನೀಡಿದ ತಕ್ಷಣ ಎದುರಿಗಿದ್ದುದನ್ನು ಚಿತ್ರೀಕರಿಸುತ್ತದೆ, ಸಂದೇಶ ಕಳುಹಿಸುತ್ತದೆ, ಇತರ ಮಾಹಿತಿ ನೀಡುತ್ತದೆ ಮತ್ತು ಚಿತ್ರ, ವೀಡಿಯೋಗಳನ್ನು ಇಂಟರ್ನೆಟ್‌ನಲ್ಲಿಯೂ ಹಂಚಿಬಿಡುತ್ತದೆ! ನೋಡಲು ಕನ್ನಡಕ, ಮಾಡೋದೆಲ್ಲಾ ಇಂಥದ್ದೇ ಕಾಯಕ!
ತಂತ್ರಾಂಶಕ್ಕೂ ಬೇಕಿರುವುದು ಮಾನವನ ಮೆದುಳೇ!
ಮನುಕುಲ-ತಂತ್ರಜ್ಞಾನ ಸಂಘರ್ಷವೇನೂ ಇಂದು ನಿನ್ನೆಯದಲ್ಲ. ಏಕಾಂಗಿಯಾಗಿದ್ದರೆ ಆಡಲು ಬೇರೆ ಯಾರೂ ಇಲ್ಲವೆಂದಾದರೆ ನಿಮಗೆ ಪ್ರತಿಸ್ಪರ್ಧಿಯಾಗಲು, ನಿಮ್ಮ ಜತೆ ಆಡಲು ಕಂಪ್ಯೂಟರ್ ಇದೆ. ಗ್ಯಾರಿ ಕ್ಯಾಸ್ಪರೊವ್ ಮತ್ತು ಕಂಪ್ಯೂಟರ್ ನಡುವಣ ಚೆಸ್ ಸಮರವನ್ನು ನಾವು ಕಂಡಿದ್ದೇವೆ-ಕೇಳಿದ್ದೇವೆ. ಯಂತ್ರಗಳೇ ಪಂಚೇಂದ್ರಿಯಗಳಾಗುವ ಕಾಲವಿದು. ಆದರೆ ಅದನ್ನು ರೂಪಿಸಲು ಮಾನವನ ಮೇಧಾಶಕ್ತಿ ಬೇಕೇಬೇಕು. ಜಗತ್ತು ಯಾಂತ್ರೀಕರಣವಾಗಿದ್ದರೂ, ಡಿಜಿಟಲ್ ಜಗತ್ತಿನಲ್ಲಿಯೂ ಮಾನವನ ಮೆದುಳಿಗೆ ಕೆಲಸ ಕಡಿಮೆಯಾಗಿಲ್ಲ. ಕೆಲವರೇನೋ ಎಲ್ಲವನ್ನೂ ‘ಗೂಗಲ್’ ಎಂಬ ಸರ್ವಜ್ಞನ ತೆಕ್ಕೆಗೆ ಹಾಕಿ, ಮೆದುಳಿಗೆ ಕೆಲಸ ಕೊಡದೆ ಭವಿಷ್ಯದ ಚಿಂತೆಯಿಲ್ಲದೆ ಸ್ಥಿತಪ್ರಜ್ಞರಾಗುತ್ತಾರೆ. ಗೂಗಲ್ ಇದ್ದರೆ ಮಾನವನ ಮೆದುಳಿಗೇನು ಕೆಲಸ ಎಂಬೋ ಕುಹಕದ ನುಡಿಯ ನಡುವೆಯೇ ನಾವು ಸಾಗಿ ಬಂದಿದ್ದೇವೆ. ಆದರೆ, ಮಕ್ಕಳ ಕುತೂಹಲದ ಮೆದುಳು ಹೊಸತಿಗಾಗಿ ತುಡಿಯುತ್ತಲೇ ಇರುತ್ತದೆ. ಇದು ನಿಷ್ಕ್ರಿಯ ಜಗತ್ತಿನ ನಡುವೆ ಭವ್ಯ ಭವಿತವ್ಯಕ್ಕೊಂದು ಆಶಾಕಿರಣ, ಹೊಸ ಸಂಶೋಧನೆಗಳಿಗೆ ಮುನ್ನುಡಿ.
ಅವಕಾಶಗಳ ಹೆಬ್ಬಾಗಿಲು ತೆರೆಯುತ್ತಿದೆ
ಮೈಕ್ರೋಸಾಫ್ಟ್, ಗೂಗಲ್, ಯಾಹೂ, ನಿಂಬಝ್, ಇಂಟೆಲ್ ಮುಂತಾದ ಸಾಫ್ಟ್‌ವೇರ್ ದಿಗ್ಗಜರು ವಿದ್ಯಾರ್ಥಿಗಳನ್ನೇ ಗುರಿಯಾಗಿರಿಸಿಕೊಂಡು, ಅಲ್ಲಲ್ಲಿ App ಫೆಸ್ಟ್ ಅಥವಾ ಡೆವಲಪರ್ಸ್ ಮೀಟ್ ಮುಂತಾದ ಕಾರ್ಯಾಗಾರಗಳನ್ನು ನಡೆಸಿ, ಯುವ ಪೀಳಿಗೆಯಿಂದ ಐಡಿಯಾಗಳನ್ನು ಹೊರಗೆಳೆದು, App ತಯಾರಿಕೆಗೆ ವೇದಿಕೆಯೊದಗಿಸಿ ಸಾಕಷ್ಟು ಪ್ರೋತ್ಸಾಹ ನೀಡುತ್ತಿರುವುದರಿಂದ ಯುವ ಟೆಕೀ ಮನಸ್ಸುಗಳು ಇತ್ತ ಮುಖ ಮಾಡುವುದು ಹೆಚ್ಚಾಗಿಬಿಟ್ಟಿದೆ.
ಅಂತಾರಾಷ್ಟ್ರೀಯ ಡೇಟಾ ಕಾರ್ಪೊರೇಶನ್ (ಐಡಿಸಿ) ವರದಿಯ ಪ್ರಕಾರ, ಈ ವರ್ಷದಲ್ಲಿ ಸ್ಮಾರ್ಟ್‌ಫೋನ್‌ಗಳ ಮಾರಾಟವು ಪಿಸಿಗಳನ್ನು ಮೀರಿಸಲಿವೆ. ಹೀಗಾಗಿ ಸ್ಮಾರ್ಟ್‌ಫೋನ್‌ಗಳಿಗಾಗಿ ಎಲ್ಲ ಕಂಪನಿಗಳೂ ತಮ್ಮನ್ನು ಸಜ್ಜುಗೊಳಿಸಬೇಕಿದ್ದರೆ, Appಗಳು ಬೇಕೇ ಬೇಕು. ಸ್ಮಾರ್ಟ್ ಆಗಿದ್ದವರಿಗೆ ಸ್ಮಾರ್ಟ್ ಅವಕಾಶಗಳ ಹೆಬ್ಬಾಗಿಲು ತೆರೆಯುತ್ತಲೇ ಇದೆ.
ಗರಿಷ್ಠ ಅಪ್ಲಿಕೇಶನ್‌ಗಳಿರುವ Appleನ ಐಟ್ಯೂನ್ಸ್, ಆಂಡ್ರಾಯ್ಡ್‌ನ ಗೂಗಲ್ ಪ್ಲೇ ಸ್ಟೋರ್‌ಗಳಲ್ಲಿ ತಲಾ 8 ಲಕ್ಷಕ್ಕೂ ಅಧಿಕ Appಗಳಿದ್ದರೆ, ವಿಂಡೋಸ್, ನೋಕಿಯಾದ ಓವಿ ಸ್ಟೋರ್, ಬ್ಲ್ಯಾಕ್‌ಬೆರಿ ಸ್ಟೋರ್‌ಗಳಲ್ಲಿಯೂ ಲಕ್ಷಾಂತರ Appಗಳಿವೆ ಎಂದರೆ, App ಕೀ ದುನಿಯಾದ ಅಗಾಧತೆಯ ಅರಿವಾದೀತು.
70 ಕೋಟಿ ಸ್ಮಾರ್ಟ್‌ಫೋನ್‌ಗಳು ಹಾಗೂ 15 ಕೋಟಿ ಟ್ಯಾಬ್ಲೆಟ್‌ಗಳು ಜಾಗತಿಕವಾಗಿ ಈಗಾಗಲೇ ಮಾರುಕಟ್ಟೆಯಲ್ಲಿವೆ ಎಂದಿದೆ ಐಡಿಸಿ ವರದಿ. ಅಂದಾಜಿನ ಪ್ರಕಾರ, ಜಾಗತಿಕ App ಮಾರುಕಟ್ಟೆಯ ವಹಿವಾಟು ಗಾತ್ರ (App ತಯಾರಿಸಿ ಮಾರಾಟ ಮತ್ತು ಕೆಲವು Appಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಬೇಕಿದ್ದರೆ ಹಣ ಪಾವತಿಸಬೇಕಾಗುತ್ತದೆ) ಸುಮಾರು 25-30 ಶತಕೋಟಿ ಡಾಲರ್ ಮತ್ತು ಮುಂದಿನ ಕೆಲವು ವರ್ಷಗಳಲ್ಲಿ ಇದು ಶೇ.20ರಿಂದ 30ರಷ್ಟು ಪ್ರಗತಿಯಾಗಲಿದೆ.
‘App’ ಕೀ ಕಹಾನೀ
ಮೊಬೈಲ್ ಮೂಲಕವೇ ಆನ್‌ಲೈನ್‌ನಲ್ಲಿ ಬೇರೊಂದು ಮೊಬೈಲ್ ಖರೀದಿಸಬಹುದು; ರೈಲು, ಬಸ್ಸು, ವಿಮಾನಗಳ ಟಿಕೆಟ್ ಅಂಗೈಯಲ್ಲೇ ಬುಕ್ ಮಾಡಿಬಿಡಬಹುದು; ಸುದ್ದಿ, ಕ್ರಿಕೆಟ್ ಸ್ಕೋರನ್ನು ತಕ್ಷಣ ತಿಳಿದುಕೊಳ್ಳಬಹುದು; ಮೊಬೈಲಿನಲ್ಲೇ ಟಿವಿ/ಸಿನಿಮಾ ವೀಕ್ಷಿಸಬಹುದು ಇಲ್ಲವೇ ಸಿನಿಮಾ ಥಿಯೇಟರುಗಳಲ್ಲಿ ಸೀಟು ಕಾಯ್ದಿರಿಸಬಹುದು; ಮನೆಗೆ ಊಟ ತರಿಸಿಕೊಳ್ಳಬಹುದು; ದೂರದ ಗೆಳೆಯ-ಗೆಳತಿಯರೊಂದಿಗೆ ಚಾಟಿಂಗ್ ಮಾಡಬಹುದು; ಫೇಸ್‌ಬುಕ್ ಜಾಲಾಡಬಹುದು; ಕಚೇರಿ ಇಮೇಲ್‌ಗಳಿಗೆ ಉತ್ತರಿಸಬಹುದು, ಮೊಬೈಲ್ ಕೈಯಲ್ಲಿದ್ದರೆ ಸಂಗೀತ ಕಲಿಯಬಹುದು, ಗಣಿತದ ಲೆಕ್ಕ ಬಿಡಿಸಬಹುದು, ವಾಸ್ತು ನೋಡಬಹುದು; ಬ್ಲಾಗ್ ಬರೆಯಬಹುದು….
ಹೀಗೆ ಬನ್ನಿ… ಆಧುನಿಕ ವರ್ಚುವಲ್ ಜಗತ್ತಿಗೆ, Appಗಳ ದುನಿಯಾಕ್ಕೆ
Appಗಳ ಸಾಗರ
ಮಾರುಕಟ್ಟೆಯಲ್ಲಿರುವ Apple, ಆಂಡ್ರಾಯ್ಡ್, ವಿಂಡೋಸ್ ಮುಂತಾದ ಕಾರ್ಯಾಚರಣಾ ವ್ಯವಸ್ಥೆಗಳಿರುವ ಮೊಬೈಲ್/ಸ್ಮಾರ್ಟ್‌ಫೋನ್‌ಗಳಿಗೆ ತಮ್ಮದೇ ಆದ ‘ಮಾರುಕಟ್ಟೆ’ ಸ್ಥಳಗಳಿವೆ. Appleಗೆ iTunes, ಆಂಡ್ರಾಯ್ಡ್‌ಗೆ ಗೂಗಲ್‌ನ Play Store, ವಿಂಡೋಸ್‌ಗೆ Windows Phone Store, ಬ್ಲ್ಯಾಕ್‌ಬೆರಿಯ Blackberry World, ನೋಕಿಯಾದ Ovi Store … ಹೀಗೆ ಲಕ್ಷಾಂತರ ಅಪ್ಲಿಕೇಶನ್‌ಗಳು ಲಭ್ಯವಿರುವ ವಿಶಿಷ್ಟವಾದ ತಾಣಗಳಿದ್ದರೆ, ಸ್ಯಾಮ್ಸಂಗ್, ಎಚ್‌ಟಿಸಿ, ಎಲ್‌ಜಿ ಮುಂತಾದ ಮೊಬೈಲ್ ತಯಾರಿಕಾ ಕಂಪನಿಗಳು ಕೂಡ ತಮ್ಮವೇ ಆದ ಅಪ್ಲಿಕೇಶನ್‌ಗಳ ಸಂಗ್ರಹದಾಣವನ್ನು ಹೊಂದಿವೆ. ಅದೆಷ್ಟೋ ಕಂಪನಿಗಳು ತಮ್ಮ ಉತ್ಪನ್ನಗಳ ಪ್ರಚಾರಕ್ಕಾಗಿ, ಮಾರುಕಟ್ಟೆಗಾಗಿ ತಮ್ಮದೇ ಆದ ಅಪ್ಲಿಕೇಶನ್‌ಗಳನ್ನು ತಯಾರಿಸಿ ಈ ತಾಣಗಳಿಗೆ ಬಿಡುಗಡೆ ಮಾಡುತ್ತಿವೆ. ಇಂತಹಾ ಅಪಾರ ಸಾಧ್ಯತೆಗಳಿರುವ ಅಪ್ಲಿಕೇಶನ್‌ನ ಮಹಾ ಸಾಗರಕ್ಕೆ ಪ್ರತಿ ದಿನವೂ ನೂರಾರು ಅಪ್ಲಿಕೇಶನ್‌ಗಳೆಂಬ ಕಿರು ತಂತ್ರಾಂಶಗಳು ಬಂದು ಸೇರುತ್ತಿವೆ.
ಇವೆಲ್ಲವನ್ನೂ ತಯಾರಿಸುವುದು ಸ್ಮಾರ್ಟ್ ಮೆದುಳುಗಳು. ಒಂದೊಂದು ರೀತಿಯ ಅನುಕೂಲಕ್ಕಾಗಿ ಉತ್ಸಾಹಿಗಳು, ಕುತೂಹಲಿಗಳು, ಹವ್ಯಾಸಿಗಳು… ಹೀಗೆ ಎಲ್ಲರೂ App ತಯಾರಿಸಿ ಈ App ಸಾಗರಕ್ಕೆ ತಮ್ಮ ಕೊಡುಗೆಗಳನ್ನು ಹರಿಯಬಿಡುತ್ತಾರೆ. ಹೆಚ್ಚು ಜನಪ್ರಿಯತೆ ಗಳಿಸಿದ Appಗಳಿಗೆ ಹಣ ತೆರಬೇಕಾಗುತ್ತದೆ. ಬಹುತೇಕ ಪ್ರಮುಖ ಕಂಪನಿಗಳು ಉಚಿತವಾಗಿಯೇ Appಗಳನ್ನು ಒದಗಿಸುತ್ತವೆ, ಮತ್ತು ಎಲ್ಲ ಕಾರ್ಯಾಚರಣಾ ವ್ಯವಸ್ಥೆಗಳಲ್ಲಿಯೂ ಕೆಲಸ ಮಾಡಬಲ್ಲ ಬಹೂಪಯೋಗಿ Appಗಳನ್ನು ಸಿದ್ಧಪಡಿಸುವತ್ತ ಎಲ್ಲರ ಗಮನ ನೆಟ್ಟಿದೆ.
ಸ್ಮಾರ್ಟ್‌ಫೋನ್‌ಗಳಿಗಾಗಿ ಬೇಕು ಬೇಕಾದ ಅಪ್ಲಿಕೇಶನ್‌ಗಳನ್ನು ತಯಾರಿಸುವ ಒಂದೊಂದು ಪಡೆಯೇ ಇರುತ್ತದೆ. ಹಲವು ಕಂಪನಿಗಳು ಇದಕ್ಕಾಗಿಯೇ ಕೋಟ್ಯಂತರ ರೂಪಾಯಿ ವ್ಯಯಿಸುತ್ತವೆ. ಅದೇ ರೀತಿ, ಜಾಣ ಟೆಕ್ಕಿಗಳು, ಹವ್ಯಾಸಕ್ಕೋ, ಇಷ್ಟಪಟ್ಟೋ, ಸಮಾಜ ಸೇವೆಗಾಗಿಯೋ ಏನೆಲ್ಲಾ ಅಪ್ಲಿಕೇಶನ್‌ಗಳನ್ನು ತಯಾರಿಸುತ್ತಾರೆ.
App ಕೀ ದುನಿಯಾ
ತಂತ್ರಜ್ಞಾನ ಬೆಳೆದಂತೆ ಕಂಪ್ಯೂಟರುಗಳು ಹಳ್ಳಿ ಗಲ್ಲಿಗಳಿಗೂ ಪರಿಚಿತವಾಗಿಬಿಡುತ್ತಿವೆ. ಮಾಹಿತಿ ತಂತ್ರಜ್ಞಾನದ ಅಗಾಧ ಸಾಗರವನ್ನು ನಮ್ಮೆದುರು ತಂದು ನಿಲ್ಲಿಸಬಲ್ಲ ಕಂಪ್ಯೂಟರುಗಳಲ್ಲಿ ವಿಭಿನ್ನ ರೀತಿಯ ಪ್ರೋಗ್ರಾಂ/ ತಂತ್ರಾಂಶಗಳಿರುತ್ತವೆ. ತೀರಾ ಸರಳವಾಗಿ ಹೇಳುವುದಾದರೆ, ಬರೆಯಲು ‘ವರ್ಡ್’, ಲೆಕ್ಕ ಮಾಡಲು/ಪಟ್ಟಿ ತಯಾರಿಸಿಡಲು ‘ಎಕ್ಸೆಲ್’, ಸಂಗೀತ ಆಲಿಸಲು ಮ್ಯೂಸಿಕ್ ಪ್ಲೇಯರ್, ವೀಡಿಯೋ ನೋಡಲು ಅಥವಾ ಎಡಿಟಿಂಗ್ ಮಾಡಲು ಅದಕ್ಕೆ ಸಂಬಂಧಿಸಿದ ವೀಡಿಯೋ ಪ್ಲೇಯರ್/ವೀಡಿಯೋ ಎಡಿಟರ್‌ಗಳು… ಇವೆಲ್ಲಾ ತಂತ್ರಾಂಶಗಳು. ಅಂಗೈಯಲ್ಲಿ ಹಿಡಿಸಬಹುದಾದ, ಮತ್ತು ಈಗೀಗ ಲ್ಯಾಪ್‌ಟಾಪ್ ಗಾತ್ರದವರೆಗೂ ತಲುಪುತ್ತಿರುವ, ಟ್ಯಾಬ್ಲೆಟ್‌ಗಳೆಂದೋ, ಸ್ಮಾರ್ಟ್‌ಫೋನ್‌ಗಳೆಂದೋ ಕರೆಯಲಾಗುವ ಈ ಸಾಧನಗಳಲ್ಲಿ ಅಳವಡಿಸಬಹುದಾದ ಇಂತಹಾ ಕಿರು ತಂತ್ರಾಂಶಗಳನ್ನೇ ಅಪ್ಲಿಕೇಶನ್‌ಗಳು ಅನ್ನುತ್ತಾರೆ; ಪ್ರೀತಿಯಿಂದ ಚಿಕ್ಕದಾಗಿ ಚೊಕ್ಕದಾಗಿ App ಅನ್ನುತ್ತಾರೆ.
ಈ Appಗಳ ಅಗಾಧ ಲೋಕದಲ್ಲಿ ಏನೆಲ್ಲಾ ಸಿಗುತ್ತವೆ ಅಂತ ಒಮ್ಮೆ ಕಣ್ಣು ಹಾಯಿಸಿದರೆ ಗೊಂದಲಕ್ಕೊಳಗಾಗುವುದು ಸಹಜ. ದಿನೋಪಯೋಗಿ Appಗಳಿಂದ ಹಿಡಿದು, ಜನೋಪಯೋಗಿಯಾದ, ಮನೋಪಯೋಗಿಯಾದ, ಮನೋರಂಜಕವಾದ, ಮಾಹಿತಿ ಸಂಚಯಿಸಬಲ್ಲ, ಆರೋಗ್ಯದ ಮೇಲೆ ಹದ್ದಿನ ಕಣ್ಣಿಡಬಲ್ಲ ಕಿರು ತಂತ್ರಾಂಶಗಳಿವೆ; ಹೊತ್ತು ಕಳೆಯಲು ಗೇಮ್‌ಗಳಿವೆ; ಸಕಾಲಕ್ಕೆ ನಿಮ್ಮನ್ನು ಎಚ್ಚರಿಸಬಲ್ಲ, ಟಿಪ್ಪಣಿ ಮಾಡಿಕೊಳ್ಳಬಲ್ಲ, ನಿಮ್ಮದೇ ಭಾಷೆಯಲ್ಲಿ ಟೈಪ್ ಮಾಡಿಸಲು ಅನುಕೂಲ ಮಾಡಿಕೊಡಬಲ್ಲ, ಮತ್ತು ನಿಮ್ಮ ಸ್ಮಾರ್ಟ್‌ಫೋನ್ ಅಥವಾ ಟ್ಯಾಬ್ಲೆಟನ್ನು ವೈರಸ್‌ಗಳಿಂದ ರಕ್ಷಿಸಬಲ್ಲ, ಅದರ ಬ್ಯಾಟರಿ ಬಾಳಿಕೆ ಹೆಚ್ಚಿಸಬಲ್ಲ, ಕಾರ್ಯಕ್ಷಮತೆ ವರ್ಧಿಸಬಲ್ಲ ನೂರಾರು Appಗಳಿವೆ.
ಮೊಬೈಲ್‌ನಲ್ಲಿ ಗೇಮ್ಸ್ ಆಡಲು, ಸ್ಥಳೀಯ ವಾತಾವರಣ ಮಾಹಿತಿ ತಿಳಿಯಲು, ಮೊಬೈಲ್‌ನಲ್ಲೇ ಟಿವಿ ವೀಕ್ಷಿಸಲು, ಇಮೇಲ್ ಬಳಸಲು, ವೆಬ್ ಸೈಟ್ ಒಂದರ ಸುದ್ದಿ-ಲೇಖನಗಳನ್ನು ಒಂದೆಡೆ ಮೊಬೈಲ್‌ಗೆ ತಕ್ಕುದಾದ (ಕಡಿಮೆ ಡೇಟ ಬಳಕೆಯಾಗುವಂತೆ) ರೀತಿಯಲ್ಲಿ ನಮ್ಮ ಮುಂದಿಡಲು, ಮೊಬೈಲ್‌ನ ಕಾರ್ಯಕ್ಷಮತೆ ಹೆಚ್ಚಿಸಲು, ಬರೇ ಇಂಟರ್ನೆಟ್ ಸಂಪರ್ಕದ ಮೂಲಕವೇ ಎಸ್ಎಂಎಸ್ ಕಳುಹಿಸಲು, ವೀಡಿಯೋ ಚಾಟಿಂಗ್ ನಡೆಸಲು, ಮೊಬೈಲ್ ಚಾಟಿಂಗ್ ಮಾಡಲು, ಉಚಿತವಾಗಿ ಕರೆ ಮಾಡಲು (ಅಂದರೆ ಇಂಟರ್ನೆಟ್ ಮೂಲಕ)… ಹೀಗೆ ಎಲ್ಲದಕ್ಕೂ Appಗಳು ಲಭ್ಯ ಇರುತ್ತವೆ. ಸಂಗೀತ ಆಲಿಸಲು ವಿಭಿನ್ನ ರೀತಿಯ ಮ್ಯೂಸಿಕ್ ಪ್ಲೇಯರ್ Appಗಳು ದೊರೆಯುತ್ತವೆ. ಕರೆ ಅಥವಾ ಸಂಗೀತ ರೆಕಾರ್ಡ್ ಮಾಡಿಕೊಳ್ಳಲು ಅದರದ್ದೇ ಆದ ವೈವಿಧ್ಯಮಯ Appಗಳು ದೊರೆಯುತ್ತವೆ. ಆರೋಗ್ಯದ ಬಗ್ಗೆ ಕಾಳಜಿಯುಳ್ಳವರಿಗಾಗಿ, ಈ ದಿನ ತಿಂದ ಆಹಾರದಲ್ಲಿ ಎಷ್ಟು ಕ್ಯಾಲರಿ ಇದೆ, ಇಂತಿಷ್ಟು ದೂರ ನಡೆದಿದ್ದರಿಂದಾಗಿ ಎಷ್ಟು ಕ್ಯಾಲರಿ ವ್ಯಯವಾಯಿತು ಎಂದೆಲ್ಲಾ ತೋರಿಸುತ್ತಾ, ಸ್ಲಿಮ್ ಆ್ಯಂಡ್ ಟ್ರಿಮ್ ಆಗುವಲ್ಲಿ ಕೂಡ ಈ Appಗಳು ನೆರವಾಗಬಲ್ಲವು. ಟೆನ್ಷನ್ ಇದ್ದರೆ, ಸುಖವಾಗಿ ನಿದ್ದೆ ಮಾಡಲು, ಜೋಗುಳ ಹಾಡಬಲ್ಲ, ಮೆಲುವಾದ ಸಂಗೀತದ ಮೂಲಕ ಮನಶ್ಶಾಸ್ತ್ರೀಯವಾಗಿ ನಿಮ್ಮನ್ನು ನಿದ್ದೆಗೆ ಜಾರಿಸಬಲ್ಲ Appಗಳೂ ಈ App ಕೀ ದುನಿಯಾದಲ್ಲಿ ಲಭ್ಯ. ಒಂದೇ ಮಾತಿನಲ್ಲಿ ಹೇಳುವುದಾದರೆ Appಗಳೆಂದರೆ, ಯಾವುದೇ ಕಾರ್ಯವನ್ನು ಸರಳವಾಗಿಸಬಲ್ಲ ಕಿರು ತಂತ್ರಾಂಶಗಳು.
App ಯಾಕೆ ಬೇಕು…
ಅಪ್ಲಿಕೇಶನ್‌ಗಳು ಮಾಹಿತಿ, ಆರೋಗ್ಯ, ಮನರಂಜನೆ, ಸಮಯ ಮತ್ತು ಹಣದ ಉಳಿತಾಯ ಮುಂತಾದ ಉದ್ದೇಶಗಳನ್ನು ಹೊಂದಿರುತ್ತವೆ. ಉದಾಹರಣೆಗೆ, ಮೊಬೈಲ್ ತಯಾರಿಕೆ ಅಥವಾ ಮಾರಾಟ ಕಂಪನಿಯೊಂದರ App ಇದೆ ಎಂದಿಟ್ಟುಕೊಳ್ಳೋಣ. ಅದನ್ನು ನಮ್ಮ ಸಾಧನದಲ್ಲಿ ಅಳವಡಿಸಿಕೊಂಡರೆ, ಆ ಕಂಪನಿಯ ವಿಭಿನ್ನ ಉತ್ಪನ್ನಗಳು ಯಾವುವು, ಎಷ್ಟು ಬೆಲೆ, ಯಾವೆಲ್ಲಾ ಕೊಡುಗೆಗಳಿರುತ್ತವೆ, ಉತ್ಪನ್ನಗಳಲ್ಲಿರುವ ವೈವಿಧ್ಯತೆಗಳೇನು ಎಂಬಿತ್ಯಾದಿ ಮಾಹಿತಿಯು ಕ್ಷಣದಲ್ಲೇ ತಿಳಿಯಬಹುದು. ಮತ್ತೊಂದು ಉದಾಹರಣೆ: ನಿಮ್ಮ ಮೊಬೈಲ್ ಫೋನ್‌ನ ಬ್ಯಾಟರಿ ಬೇಗನೇ ಚಾರ್ಜ್ ಕಳೆದುಕೊಳ್ಳುತ್ತದೆ ಎಂದಿಟ್ಟುಕೊಳ್ಳೋಣ. ಬ್ಯಾಟರಿ ಸೇವರ್ App ಅಳವಡಿಸಿಕೊಂಡಲ್ಲಿ, ಒಂದೇ ಬಟನ್ ಕ್ಲಿಕ್ ಮಾಡಿದರೆ ಅದು, ಅನಗತ್ಯವಾಗಿ ಚಾಲನೆಯಲ್ಲಿರುವ (ಬ್ಯಾಕ್‌ಗ್ರೌಂಡ್‌ನಲ್ಲಿ ರನ್ ಆಗುತ್ತಿರುವ) ಯಾವುದಾದರೂ ಅಪ್ಲಿಕೇಶನ್‌ಗಳನ್ನು ಪತ್ತೆ ಹಚ್ಚಿ ಕ್ಲೋಸ್ ಮಾಡುತ್ತದೆ, ಇಂಟರ್ನೆಟ್ ಸಂಪರ್ಕ ಅನವಶ್ಯವೆಂದಾದಾಗ ಅದರ ಸಂಪರ್ಕ ಕಟ್ ಮಾಡುತ್ತದೆ, ಸ್ಕ್ರೀನ್‌ನ ಬ್ರೈಟ್‌ನೆಸ್ ಕಡಿಮೆ ಮಾಡುತ್ತದೆ. ಈ ರೀತಿ ಮಾಡಿದರೆ ಬ್ಯಾಟರಿ ಉಳಿತಾಯ ಸಾಧ್ಯ.
ಸಿಂಪಲ್ಲಾಗಿ ಹೇಳೋದಾದರೆ, ಫೇಸ್‌ಬುಕ್‌ಗೆ ಮೊಬೈಲ್/ಟ್ಯಾಬ್ಲೆಟ್ ಸಾಧನದ ಬ್ರೌಸರ್ ಮೂಲಕವೂ ಹೋಗಬಹುದು. ಆದರೆ ‘ಫೇಸ್‌ಬುಕ್ App’ ಬಳಸಿದರೆ, ಸಾಧನದ ಸ್ಕ್ರೀನ್‌ನ ಅಳತೆಗೆ ತಕ್ಕಂತೆ ಫೇಸ್‌ಬುಕ್ ಪುಟಗಳು ಮೂಡುತ್ತವೆ ಮತ್ತು ಅತಿ ಶೀಘ್ರವಾಗಿ ಲೋಡ್ ಆಗಲು ಸಹಾಯವಾಗುತ್ತದೆ.
ಉಚಿತವೂ ಇವೆ, ಪ್ರೀಮಿಯಂ ಆವೃತ್ತಿಗಳೂ ಇವೆ
ಹೆಚ್ಚಿನವು ಉಚಿತ Appಗಳು. ವಿಶ್ವಾದ್ಯಂತ ಇರುವ ಯುವ ಮನಸ್ಸುಗಳು ತಮ್‌ತಮಗೆ ಹೊಳೆದ ಐಡಿಯಾಗಳನ್ನು App ರೂಪಕ್ಕಿಳಿಸಿ ಜಗತ್ತಿನ ಜನರೊಂದಿಗೆ ಹಂಚಿಕೊಳ್ಳುತ್ತಾರೆ. ಅದರಲ್ಲಿ ಸಮಸ್ಯೆಗಳಿವೆ ಅಂತ ಯಾರಾದರೂ ದೂರು ನೀಡಿದರೆ, ಅದನ್ನು ಸರಿಪಡಿಸಿ ‘ಅಪ್‌ಡೇಟ್’ ಮಾಡಿ App ಅನ್ನು ಮಾರುಕಟ್ಟೆಗೆ ಪುನಃ ಇಳಿಸುತ್ತಾರೆ. ಇದೇ ಕಾರಣಕ್ಕೆ ಅಪ್ಲಿಕೇಶನ್‌ಗಳ ವರ್ಚುವಲ್ ಮಾರುಕಟ್ಟೆಗೆ ಹೋದಾಗ… “XYZ Updates available” ಅನ್ನೋ ಸಂದೇಶಗಳು ಆಗಾಗ ಮೊಬೈಲ್ ಪರದೆಯಲ್ಲಿ ಸುಳಿಯುತ್ತವೆ.
ಹೆಚ್ಚು ಅನುಕೂಲ ಮಾಡಿಕೊಡಬಲ್ಲ, ಲಾಭ ದೊರಕಿಸಬಲ್ಲ Appಗಳಿಗೆ ಹಣ ಪಾವತಿ ಮಾಡಬೇಕಾಗುತ್ತದೆ. ಅವುಗಳಲ್ಲಿಯೂ ಕಡಿಮೆ ಅನುಕೂಲಗಳಿರುವ ಉಚಿತ ಆವೃತ್ತಿಯೂ ಲಭ್ಯ. ಆದರೆ ಹೆಚ್ಚಿನ ಉಚಿತ Appಗಳಲ್ಲಿ ನಮಗೆ ಬೇಡವಾದ ಅಥವಾ ಬೇಕಾಗಿರುವ ಜಾಹೀರಾತುಗಳು ಕಾಣಿಸಿಕೊಳ್ಳುತ್ತವೆ. ಹಣ ಪಾವತಿ ಖರೀದಿಸುವ Appಗಳಲ್ಲಿ ಇವು ಇರುವುದಿಲ್ಲ.
Appಗಳಿಗೇಕೆ ಇಷ್ಟೊಂದು ಬೇಡಿಕೆ?
ಅಂಗೈಯಲ್ಲಿ ಜಗತ್ತನ್ನು ತೋರಿಸುವ ಗುರಿಯೊಂದಿಗೆ ಮಾಹಿತಿ ತಂತ್ರಜ್ಞಾನದ ಕ್ಷೇತ್ರದಲ್ಲಿ ಆಗಿರುವ ಕ್ರಾಂತಿಯು ಉತ್ತುಂಗಕ್ಕೇರುತ್ತಲೇ ಇದೆ. ಎಲ್ಲಿವರೆಗೆ ಎಂದರೆ, ಸ್ಮಾರ್ಟ್‌ಫೋನ್‌ಗಳು, ಟ್ಯಾಬ್ಲೆಟ್‌ಗಳು ಮಾರುಕಟ್ಟೆಗೆ ಕೋಟಿಗಟ್ಟಲೆ ಹರಿದುಬರುತ್ತಿರುವುದರೊಂದಿಗೆ, ಡೆಸ್ಕ್‌ಟಾಪ್ ಅಥವಾ ಲ್ಯಾಪ್‌ಟಾಪ್ ಕಂಪ್ಯೂಟರುಗಳಿಗೆ ಭವಿಷ್ಯವಿಲ್ಲ ಎಂಬಂತಹಾ ಮನೋಭಾವನೆಯೂ ಬೆಳೆಯತೊಡಗಿದೆ. ಹೆಚ್ಚು ಹೆಚ್ಚು ಜನರು ಮೊಬೈಲ್‌ನಲ್ಲೇ ಎಲ್ಲವನ್ನೂ ಜಾಲಾಡಲಾರಂಭಿಸಿದ್ದಾರೆ. ಹೀಗಾಗಿ ಕಂಪನಿಗಳಿಗೆ ಕೂಡ ಮೊಬೈಲ್ ಮಾರುಕಟ್ಟೆಯಲ್ಲಿ ತಮ್ಮ ಇರವನ್ನು ತೋರಿಸಿ ಪಾರಮ್ಯ ಮೆರೆಯುವುದಕ್ಕೆ ಮುಂದಾಗುತ್ತಿವೆ. ಜನರು ಕೂಡ ಇಂಟರ್ನೆಟ್ ಬಳಕೆಗೆ ಪಿಸಿಗಳಿಗಿಂತ ಸ್ಮಾರ್ಟ್‌ಫೋನ್/ಟ್ಯಾಬ್ಲೆಟ್‌ಗಳಿಗೇ ಹೆಚ್ಚು ಒತ್ತು ನೀಡಲಾರಂಭಿಸಿದ್ದಾರೆ.
ಅಪ್ಲಿಕೇಶನ್ ಡೆವಲಪ್ ಮಾಡುವುದು ಹೇಗೆ
ಅಪ್ಲಿಕೇಶನ್ ಅಥವಾ App ಒಂದನ್ನು ರಚಿಸಲು ಅಥವಾ ತಾಂತ್ರಿಕ ಪರಿಭಾಷೆಯಲ್ಲಿ ಹೇಳುವುದಾದರೆ ‘ಡೆವಲಪ್’ ಮಾಡಲು ಹಲವಾರು ಮಾರ್ಗಗಳಿವೆ. ಅಷ್ಟೇನೂ ತಾಂತ್ರಿಕ ಪರಿಣತಿ ಇಲ್ಲದವರೂ, ತಮ್ಮ ಐಡಿಯಾಗಳನ್ನು ಸೇರಿಸಿ App ಮಾಡಬಹುದಾದರೆ, AppMakr (http://www.appmakr.com/), Eachscape (http://www.eachscape.com/), Phonegap (http://phonegap.com/), Appcelerator (http://www.appcelerator.com/), Sencha (http://www.sencha.com/) ಮುಂತಾದ ತಾಣಗಳಿವೆ.
Apple, ಗೂಗಲ್, ಮೈಕ್ರೋಸಾಫ್ಟ್ ಮುಂತಾದ ದಿಗ್ಗಜ ಕಂಪನಿಗಳು ಡೆವಲಪರ್‌ಗಳಿಗಾಗಿ ಪ್ರೋಗ್ರಾಂಗಳನ್ನು ಒದಗಿಸಿಕೊಡುತ್ತವೆ, App ತಯಾರಿಕೆಗಾಗಿ ಅಲ್ಲಲ್ಲಿ ವರ್ಕ್‌ಶಾಪ್‌ಗಳನ್ನು ನಡೆಸುತ್ತವೆ ಮತ್ತು ಟೂಲ್‌ಗಳನ್ನೂ ಒದಗಿಸುತ್ತವೆ. ಇನ್ನು, ಕ್ಯಾಲಿಫೋರ್ನಿಯಾದ ಸ್ಟ್ಯಾನ್‌ಫರ್ಡ್ ಯುನಿವರ್ಸಿಟಿಯು Apple ಕಂಪನಿಯ iTunes ಎಂಬ App ಮಾರುಕಟ್ಟೆಗಾಗಿ App ಡೆವಲಪ್ ಮಾಡುವ ಕುರಿತಾಗಿ ಆನ್‌ಲೈನ್‌ನಲ್ಲಿ ಉಚಿತ ಕೋರ್ಸ್‌ಗಳನ್ನೂ ನಡೆಸುತ್ತಿದೆ.
ಕಂಪ್ಯೂಟರ್ ಪರಿಣತರು ತಮ್ಮ ನವನವೀನ ಐಡಿಯಾಗಳ App ತಯಾರಿಸಿ ಅವುಗಳನ್ನು Elance (https://www.elance.com/) ನಂತಹಾ ವೆಬ್‌ಸೈಟ್‌ಗಳಲ್ಲಿ ಹರಾಜಿಗೆ ಇಡಬಹುದು. They Make Apps (http://theymakeapps.com/) ನಲ್ಲಿ ಹೋದರೆ, ನಮಗೆ ಬೇಕಾದ App ತಯಾರಿಸಿಕೊಡುವವರ ಮತ್ತು ಅದಕ್ಕೆಷ್ಟು ಶುಲ್ಕವಾಗುತ್ತದೆ ಎಂಬ ಪಟ್ಟಿ ಸಮೇತ ವಿವರಗಳು ಸಿಗುತ್ತವೆ.
Appಗಳನ್ನು ತಯಾರಿಸುವುದು ಹೇಗೆಂದು ತಿಳಿದುಕೊಡಬಲ್ಲ ಮೊಬೈಲ್ ಡೆವಲಪಿಂಗ್ ಕೋರ್ಸ್‌ಗಳು ಕೂಡ ಅಲ್ಲಲ್ಲಿ ಆರಂಭವಾಗಿದ್ದು, ಎನ್ಐಐಟಿ, ಬೆಂಗಳೂರಿನ ಜೀನಿಯಸ್ ಪೋರ್ಟ್ ಮತ್ತು ಕೋಡ್ ಫ್ರಕ್ಸ್ (CodeFrux), ಪುಣೆಯ ಭಾರತಿ ವಿದ್ಯಾಪೀಠ ಡೀಮ್ಡ್ ಯುನಿವರ್ಸಿಟಿ ಮುಂತಾದವು ಅಲ್ಪಕಾಲಿಕ ಕೋರ್ಸ್‌ಗಳನ್ನು ನಡೆಸುತ್ತಿವೆ.
App ತಯಾರಿಸುವುದು ತುಂಬಾ ಸುಲಭ
ದಶಕದ ಹಿಂದೆ, ‘ಅಪ್ಲಿಕೇಶನ್’ ಎಂಬುದು ಕೇವಲ ಮೈಕ್ರೋಸಾಫ್ಟ್ ಮುಂತಾದ ದಿಗ್ಗಜ ಸಂಸ್ಥೆಗಳು ಕೆಲವೊಂದು ಕಂಪನಿಗಳಿಗೆ ಅವುಗಳ ಅನುಕೂಲಕ್ಕಾಗಿ ಬೇಕಾದ ಸಾಫ್ಟ್‌ವೇರ್ ಪ್ರೋಗ್ರಾಂಗಳನ್ನು ತಯಾರಿಸಿಕೊಡುವುದಕ್ಕೆ ಸೀಮಿತವಾಗಿತ್ತು. ಆದರೆ ಮೊಬೈಲ್ ಮತ್ತು ಸ್ಮಾರ್ಟ್‌ಫೋನ್‌ಗಳ ಕ್ರಾಂತಿ ಯಾವ ಪರಿ ಬೆಳೆದುಬಿಟ್ಟಿದೆಯೆಂದರೆ, ಈಗ ಹೆಚ್ಚಿನ ಟೆಕ್ಕೀಗಳು App ತಯಾರಿಸುತ್ತಾರೆ, ಮಾರಾಟ ಮಾಡುತ್ತಾರೆ ಮತ್ತು ಉಚಿತವಾಗಿಯೂ ಹಂಚುತ್ತಿದ್ದಾರೆ. ಇದಕ್ಕೆ ಪ್ರಮುಖ ಕಾರಣವೆಂದರೆ, ಈ Appಗಳನ್ನು ತಯಾರಿಸಬೇಕಿದ್ದರೆ ದೊಡ್ಡ ಮಟ್ಟದ ಮೂಲಸೌಕರ್ಯಗಳೇನೂ ಅಗತ್ಯವಿಲ್ಲ. ಮನೆಯಲ್ಲಿ ಕುಳಿತು ಪರ್ಸನಲ್ ಕಂಪ್ಯೂಟರುಗಳಲ್ಲೇ ಇದನ್ನು ತಯಾರಿಸಬಹುದಾಗಿದೆ. ಆಂಡ್ರಾಯ್ಡ್‌ನಂತಹಾ ಉಚಿತ ಪ್ಲ್ಯಾಟ್‌ಫಾರ್ಮ್‌ಗಳೂ ಲಭ್ಯವಿವೆ. ಆನ್‌ಲೈನ್ ಸಂಪರ್ಕವಿರುವ ಅಪ್ಲಿಕೇಶನ್‌ಗಳನ್ನು ತಯಾರಿಸಲು ಸ್ಟೋರೇಜ್ ಬೇಕೆಂದಾದರೆ, ಅತಿ ಕಡಿಮೆ ಮೌಲ್ಯಕ್ಕೆ ಸ್ಟೋರೇಜ್ ಸ್ಪೇಸ್ ಕೂಡ ಲಭ್ಯವಿರುತ್ತದೆ. ಆನ್‌ಲೈನ್‌ನಲ್ಲೇ ಸಹಾಯ, ಬೆಂಬಲ, ಸಲಹೆಗಳೂ ದೊರೆಯುತ್ತವೆ. ಮತ್ತು ಡೆವಲಪರ್ ಆಗಬೇಕಿದ್ದರೆ, ಕೋಡಿಂಗ್ ಅಥವಾ ಪ್ರೋಗ್ರಾಮಿಂಗ್ ಕಲಿಯುವ ಅಗತ್ಯವೂ ಇರಬೇಕಿಲ್ಲ. ಆರೆಂಜ್‌ಸ್ಕೇಪ್ (Orangescape) ನಂತಹಾ ಒಂದು ಸಾಫ್ಟ್‌ವೇರ್ ಇದ್ದರೆ, App ಯಾವ ರೀತಿ ಇರಬೇಕು ಅಂತ ಯೋಚಿಸಿ, ಅದು ಏನೆಲ್ಲಾ ಮಾಡಬೇಕು ಅನ್ನೋ ಫ್ಲೋ-ಚಾರ್ಟ್ ತಯಾರಿಸಿಬಿಟ್ಟರೆ ಈ ಸಾಫ್ಟ್‌ವೇರ್‌ಗೆ ಊಡಿಸಿದರಾಯಿತು. ತನ್ನಿಂತಾನೇ ಕೋಡ್‌ಗಳನ್ನು ಬರೆದುಕೊಂಡು ಅದು ಅಪ್ಲಿಕೇಶನನ್ನು ತಯಾರಿಸಿಬಿಡುತ್ತದೆ.
———
ತತ್ಕಾಲದ ಹಿರಿಮೆಗಷ್ಟೇ App
ಅನುಭವವೇ ಹೇಳುವಂತೆ, ವಿಜ್ಞಾನ ಶಾಶ್ವತ, ತಂತ್ರಜ್ಞಾನ ಕ್ಷಣಿಕ. ತಂತ್ರಜ್ಞಾನದ ಸಾಧಕಗಳೆಷ್ಟೋ, ಬಾಧಕಗಳೂ ಅಷ್ಟೇ ಇವೆ.
ನಾವು ಮೊಬೈಲ್/ಸ್ಮಾರ್ಟ್‌ಫೋನ್ ಇಲ್ಲದೆಯೂ ಬದುಕಬಲ್ಲೆವು, ಆದರೆ ನಮ್ಮ ಮುಂದಿನ ಪೀಳಿಗೆ ಹಾಗಿರಲಾರದು. ಈ ಜೀವನವನ್ನು ನಾವು ಸಹಜವಾಗಿ ಅನುಭವಿಸಿದಂತೆ ನಮ್ಮ ಮಕ್ಕಳು ಅನುಭವಿಸಲಾರರು. ಯಾಕೆಂದರೆ, ಈ Appಗಳು ಅನುಕೂಲಕ್ಕೆ ಶಾರ್ಟ್‌ಕಟ್ ಅಷ್ಟೇ. ದಿಢೀರ್ ಸಂತೋಷ ನೀಡಬಹುದು. ಗೇಮ್ ಅಪ್ಲಿಕೇಶನ್‌ಗಳ ಸಾಗರದಲ್ಲಿ ಮಕ್ಕಳು ಮುಳುಗಿಬಿಡುತ್ತಿದ್ದಾರೆ ಎಂಬುದು ಎಲ್ಲರೂ ಗಮನಿಸಿದ ಆತಂಕಕಾರಿ ಬೆಳವಣಿಗೆ.
Appಗಳ ಬಳಕೆ ಹೆಚ್ಚಿದಂತೆ ನಮ್ಮ ಮೆದುಳಿನ ಬಳಕೆ ಕಡಿಮೆಯಾಗಬಹುದು. ಸರಳ ಉದಾಹರಣೆ- ನಾವು ಯಾವುದಾದರೊಂದು ಸುದ್ದಿ ವೆಬ್‌ಸೈಟ್ ನೋಡಲು ಅಡ್ರೆಸ್ ಬಾರ್‌ನಲ್ಲಿ ಯುಆರ್‌ಎಲ್ ಟೈಪ್ ಮಾಡುತ್ತೇವೆ. ಆದರೆ, App ಬಳಸಿದರೆ, ಒಂದು ಕ್ಲಿಕ್‌ನಿಂದ ವೆಬ್‌ಸೈಟ್ ತೆರೆದುಕೊಳ್ಳುತ್ತದೆ. ಯುಆರ್‌ಎಲ್ ನೆನಪಿನಲ್ಲಿಟ್ಟುಕೊಳ್ಳುವ ಅಗತ್ಯವಿಲ್ಲ. ಬ್ಯಾಟರಿ ಸೇವ್ ಮಾಡಲು ಏನು ಮಾಡಬೇಕೆಂಬ ತಾಂತ್ರಿಕ ಕಸರತ್ತುಗಳನ್ನು ನಾವು ಮರೆತುಬಿಡಬಹುದು ಈ Appನಿಂದಾಗಿ! ಇಲ್ಲಿ ಮೆದುಳಿಗೆ ಮೇವು ಕಡಿಮೆಯಾಯಿತು. ಅಂದರೆ ಇದು ತಲೆನೋವಿಗೆ ಮಾತ್ರೆ ತೆಗೆದುಕೊಂಡಂತೆ. ತಲೆನೋವಿನ ಮೂಲ ಹುಡುಕಲು ಹೋಗುವುದಿಲ್ಲ ನಾವು. ಶಮನವಾದರಾಯಿತು ಎಂಬ ಮನೋಭಾವ. ಆ ತಲೆನೋವು ಬೇರೆಯೇ ಅನಾರೋಗ್ಯದ ಮುನ್ಸೂಚನೆಯಾಗಿರಬಹುದಾಗಿದ್ದರೂ ಅದರ ಬಗ್ಗೆ ನಾವು ತಲೆಕೆಡಿಸಿಕೊಳ್ಳುವುದಿಲ್ಲ. ಅದೇ ಸ್ಥಿತಿ ಇಲ್ಲಿಯೂ.
Appಗಳ ಆವಿಷ್ಕಾರದಿಂದ, ಉಪಯೋಗದಿಂದ ದೀರ್ಘಕಾಲಿಕ ಪರಿಣಾಮವಿಲ್ಲ. ಇದೇನಿದ್ದರೂ ಆ ಕ್ಷಣದ ಅಗತ್ಯ ಪೂರೈಕೆಗೆ ಮೀಸಲು. ಯಾಕೆಂದರೆ, ಅವಸರದ ಯುಗದಲ್ಲಿ ಇಂದಿನ ತಂತ್ರಜ್ಞಾನ ನಾಳೆಗೆ ಹಳಸಲು ಆಗಬಹುದು. Appಗಳು ದಿನದಿಂದ ದಿನಕ್ಕೆ ಅಪ್‌ಡೇಟ್ ಆಗುತ್ತಾ, ಹೊಸ ಹೊಸ ಸೌಲಭ್ಯ ಬರುತ್ತಿರುತ್ತವೆ, ಇಂಥದ್ದೇ App ಅಂತ ನೆನಪಿಟ್ಟುಕೊಳ್ಳುವಂತಿಲ್ಲ. ಇದು ತಂತ್ರಜ್ಞಾನದ ದೌರ್ಬಲ್ಯವೂ ಹೌದು.
ಮುಂದಿನ ಪೀಳಿಗೆಗೆ App ಇಲ್ಲದೆ ಜೀವನವೇ ಅಸಾಧ್ಯ ಎಂಬ ಹಂತ ತಲುಪುವ ಅಪಾಯ ಇಲ್ಲದಿಲ್ಲ. ಕಬ್ಬಿಣದ ಕಡಲೆಯಾಗಿರುವ ವಿಜ್ಞಾನವನ್ನು ತಂತ್ರಜ್ಞಾನವು ಸರಳೀಕರಣಗೊಳಿಸಿ ಜನಸಾಮಾನ್ಯನಿಗೆ ತಲುಪಿಸಿದೆಯಾದರೂ ಮೆದುಳಿಗೆ ಕೆಲಸ ಕಡಿಮೆಯಾದಾಗ, ಜೀವನ ಮತ್ತಷ್ಟು ಯಾಂತ್ರಿಕವಾಗುವ ಅಪಾಯವೂ ಇದೆ.
ಈಗ Appಗಳ ಲೋಕವೇ ಇರುವ ಗೂಗಲ್‌ನ ಆಂಡ್ರಾಯ್ಡ್ ಸ್ಟೋರ್ Appple ಸ್ಟೋರ್ (ಐಟ್ಯೂನ್ಸ್) ನಲ್ಲಿ ತಲಾ 7 ಲಕ್ಷದಷ್ಟು Appಗಳೂ ಹಾಗೂ ವಿಂಡೋಸ್ ಸ್ಟೋರ್‌ನಲ್ಲಿ ಸುಮಾರು 1.45 ಲಕ್ಷ Appಗಳೂ ಇವೆ. ಈ Appಗಳ ಅಗಾಧ ಸಾಗರದಲ್ಲಿ ಕಾಳೆಷ್ಟು, ಜೊಳ್ಳೆಷ್ಟು ಎಂಬುದನ್ನು ಹುಡುಕುವುದಷ್ಟೇ ಮೆದುಳಿಗೆ ಮೇವು.
