OnePlus 6 ಹೇಗಿದೆ?: ಪ್ರೀಮಿಯಂ ಲುಕ್, ಸ್ನ್ಯಾಪ್‌ಡ್ರ್ಯಾಗನ್ ಲೇಟೆಸ್ಟ್ ಪ್ರೊಸೆಸರ್

ಇತ್ತೀಚೆಗಷ್ಟೇ ಚೀನಾ ಮೂಲದ ಒನ್ ಪ್ಲಸ್ ಸ್ಮಾರ್ಟ್ ಫೋನ್ ಭಾರತದಲ್ಲಿ ಪ್ರೀಮಿಯಂ ಫೋನ್‌ಗಳ ವಿಭಾಗದಲ್ಲಿ ನಂ.1 ಪಟ್ಟಕ್ಕೇರಿದೆ. ಇದಕ್ಕೆ ಕಾರಣ, ಕಡಿಮೆ ಸಂಖ್ಯೆಯ ಮಾಡೆಲ್‌ಗಳನ್ನು ಮಾರುಕಟ್ಟೆಗೆ ಬಿಟ್ಟಿರುವುದು, ಅತ್ಯಾಧುನಿಕ ತಂತ್ರಜ್ಞಾನ ಅಳವಡಿಸಿರುವುದು ಮತ್ತು ಭಾರತೀಯ ಬಳಕೆದಾರರ ಧ್ವನಿಗೆ ಓಗೊಟ್ಟಿರುವುದು ಎಂದು ಒನ್‌ಪ್ಲಸ್ ಸಂಸ್ಥಾಪಕ ಹಾಗೂ ಸಿಇಒ ಆಗಿರುವ ಪೀಟ್ ಲಾವು ಹೇಳಿದ್ದರು. ಇಂಥ ಕಂಪನಿಯ ಒನ್ ಪ್ಲಸ್ 6 ಮಾಡೆಲನ್ನು ಒಂದು ತಿಂಗಳ ಕಾಲ ಬಳಕೆ ಮಾಡಿದ ಬಳಿಕ ಅದು ಹೇಗಿದೆ? ಎಂಬ ವಿವರ ಇಲ್ಲಿದೆ.

ಇದು ಇತರ ಕಂಪನಿಗಳಂತೆ ವರ್ಷಕ್ಕೆ ಹತ್ತಾರು ಮಾಡೆಲ್‌ಗಳನ್ನು ಪರಿಚಯಿಸುವುದಿಲ್ಲ. ಎರಡು ಮಾಡೆಲ್‌ಗಳು ವಿಭಿನ್ನ RAM ಹಾಗೂ ಇಂಟರ್ನಲ್ ಮೆಮೊರಿಯೊಂದಿಗೆ ಲಭ್ಯವಾಗುತ್ತವಷ್ಟೇ. ಈಗಿನ ಪ್ರಕಾರ ಒನ್‌ಪ್ಲಸ್ 6ನ 6ಜಿಬಿ RAM ಹಾಗೂ 64 ಜಿಬಿ ಸ್ಟೋರೇಜ್ ಆವೃತ್ತಿಯ ಬೆಲೆ 34,999 ಹಾಗೂ 8 ಜಿಬಿ RAM/128 ಜಿಬಿ ಸ್ಟೋರೇಜ್ ಮಾಡೆಲ್ ಬೆಲೆ 5 ಸಾವಿರ ರೂ. ಹೆಚ್ಚು. ಹೊಸ ಮಾಡೆಲ್‌ನಲ್ಲಿ ತಂತ್ರಜ್ಞಾನವೂ ಸುಧಾರಿಸಿರುವುದರಿಂದ, ಹಳೆಯ ಮಾಡೆಲ್‌ಗಳು ಮಾರುಕಟ್ಟೆಯಲ್ಲಿ ಸಿಗುವುದು ಕೂಡ ಕಷ್ಟವೇ. ಈ ರೀತಿಯ ಮಾರುಕಟ್ಟೆ ತಂತ್ರವನ್ನು ಕಾಯ್ದುಕೊಂಡಿರುವ ಒನ್‌ಪ್ಲಸ್, ತನ್ನ ಆಕರ್ಷಕ ವಿನ್ಯಾಸದಿಂದಾಗಿ ಗಮನ ಸೆಳೆಯುತ್ತದೆ.

ವಿನ್ಯಾಸ ಹೇಗಿದೆ?
ಮೊದಲ ನೋಟಕ್ಕೇ ಗಮನ ಸೆಳೆಯುವ ವಿನ್ಯಾಸ. ಗಾಜಿನ ಹಿಂಭಾಗದ ಕವಚ (ಪ್ಯಾನೆಲ್) ಇರುವ ಮಿರರ್ ಬ್ಲ್ಯಾಕ್ ಮಾಡೆಲ್ (ರಿವ್ಯೂಗೆ ನನಗೆ ದೊರೆತದ್ದು) ತೆಳುವಾಗಿಯೂ ಗಮನ ಸೆಳೆಯುತ್ತದೆ. ಕೈಯಿಂದ ಜಾರುವ ಅಪಾಯವಿರುವುದರಿಂದ ಎಚ್ಚರಿಕೆಯಿಂದ ಬಳಸಬೇಕಾಗುತ್ತದೆ ಇಲ್ಲವೇ ಅದಕ್ಕೊಂದು ಕವರ್ ಹಾಕಿಕೊಳ್ಳುವುದು ಒಳಿತು. ನೋಡಿದಾಕ್ಷಣ ಅದು ಗಾಜು ಎಂಬುದು ಅರಿವಿಗೆ ಬರುವುದಿಲ್ಲ. ನೋಡಿದವರೆಲ್ಲ ಇದನ್ನೊಂದು ಹೇಗಿದೆ ಅಂತ ಮುಟ್ಟಿ ನೋಡುವ ಇಚ್ಛೆ ವ್ಯಕ್ತಪಡಿಸಿದ್ದರು. ಅಷ್ಟು ಆಕರ್ಷಕವಾಗಿದೆ. ಇದರಲ್ಲಿ ಕಾರ್ನಿಂಗ್ ಗೊರಿಲ್ಲಾ ಗ್ಲಾಸ್ 5 ನ್ನು ಮುಂಭಾಗ ಹಾಗೂ ಹಿಂಭಾಗದಲ್ಲಿಯೂ ಬಳಸಿಕೊಂಡಿದೆ. ನಿಮ್ಮ ಸ್ಕ್ರೀನ್‌ಗೆ ಸ್ಕ್ರೀನ್ ಗಾರ್ಡ್ ಹಾಕಿಕೊಂಡರೆ (ಅಳವಡಿಸಿಯೇ ಇರುತ್ತದೆ) ಅದರ ಅಂದಕ್ಕೆ ಒಂದಿಷ್ಟು ಧಕ್ಕೆ ಎನ್ನಬಹುದು. ಯಾಕೆಂದರೆ, ಗೀರು ಬೀಳದಂತೆ ಟ್ಯಾಂಪರ್ಡ್ ಗ್ಲಾಸ್ ಹಾಕಿಕೊಳ್ಳುವ ಅಗತ್ಯ, ಈ ಗೊರಿಲ್ಲಾ ಗ್ಲಾಸ್ ಸ್ಕ್ರೀನ್‌ಗಳಿಗೆ ಇರುವುದಿಲ್ಲ.

ಹಿಂಭಾಗದಲ್ಲಿ ಡ್ಯುಯಲ್ ಕ್ಯಾಮೆರಾ ಇದ್ದು, ಮಧ್ಯದಲ್ಲಿದೆ. ಅದರ ಸುತ್ತ ರಿಮ್ ಕೂಡ ಇದೆ. ಅದರ ಕೆಳಗೆ ಫಿಂಗರ್‌ಪ್ರಿಂಟ್ ಸೆನ್ಸರ್ ಇದೆ. ಪವರ್ ಮತ್ತು ವಾಲ್ಯೂಮ್ ಬಟನ್‌ಗಳು ಒಂದೊಂದು ಕಡೆ ಇದ್ದರೆ, ಪವರ್ ಬಟನ್ ಪಕ್ಕದಲ್ಲೇ ಇರುವ ಮತ್ತೊಂದು ಬಟನ್ ಗಮನ ಸೆಳೆಯುತ್ತದೆ. ಅದು ವಾಲ್ಯೂಮ್ ಲಾಕ್ ಮಾಡುವುದಕ್ಕಾಗಿ. ಡ್ಯುಯಲ್ ಸಿಮ್ ಟ್ರೇ ಇದ್ದರೆ, ಕೆಳ ಭಾಗದಲ್ಲಿ ಮೋನೋ ಸ್ಪೀಕರ್, ಯುಎಸ್‌ಬಿ ಟೈಪ್ ಸಿ (2.0) ಪೋರ್ಟ್ (ಚಾರ್ಜರ್ ಹಾಗೂ ಡೇಟಾ ಕೇಬಲ್ ಸಂಪರ್ಕಕ್ಕೆ) ಮತ್ತು 3.5 ಮಿಮೀ ಹೆಡ್‌ಫೋನ್ ಸಾಕೆಟ್ ಇದೆ. ಕರ್ವ್ ಆಗಿರುವ ಹಿಂಭಾಗದ ಗಾಜು, ಫೋನನ್ನು ಕೈಯಲ್ಲಿ ಹಿಡಿದುಕೊಳ್ಳಲು ಅನುಕೂಲ ಮಾಡುತ್ತದೆ. 177 ಗ್ರಾಂ ತೂಕ ಇದೆ. ವೆದರ್-ಪ್ರೂಫ್ ಅಂತ ಒನ್‌ಪ್ಲಸ್ ಕರೆದುಕೊಂಡಿರುವುದರಿಂದ ಜಲನಿರೋಧಕತೆಯೂ ಸ್ವಲ್ಪ ಮಟ್ಟಿಗೆ ಇದರಲ್ಲಿದೆ.

ಸ್ಪೆಸಿಫಿಕೇಶನ್, ಸಾಫ್ಟ್‌ವೇರ್
ಕ್ವಾಲ್‌ಕಾಂನ ಅತ್ಯಾಧುನಿಕ ಸ್ನ್ಯಾಪ್‌ಡ್ರ್ಯಾಗನ್ 845 SOC ಪ್ರೊಸೆಸರ್ ಇರುವ, ಅಡ್ರಿನೋ 639 ಗ್ರಾಫಿಕ್ಸ್ ವ್ಯವಸ್ಥೆಯೊಂದಿಗೆ ವೇಗವಾದ ಕಾರ್ಯಾಚರಣೆ ಶ್ರುತಪಟ್ಟಿದೆ. ಕರ್ಣರೇಖೆಯಲ್ಲಿ ಸ್ಕ್ರೀನ್‌ನ ಉದ್ದವು 6.28 ಇಂಚು ಇರುವುದರಿಂದ ನೋಡಲು ಕೂಡ ದೊಡ್ಡದಾಗಿ ಕಾಣಿಸುತ್ತದೆ. 1080×2280 ರೆಸೊಲ್ಯುಶನ್ ಮೂಲಕ ಚಿತ್ರಗಳು ತುಂಬಾ ಚೆನ್ನಾಗಿ ಗೋಚರಿಸಿವೆ.

6 GB/64GB ಹಾಗೂ 8GB/128GB ಮಾಡೆಲ್‌ಗಳಲ್ಲಿ ಲಭ್ಯವಿರುವ ಈ ಫೋನ್‌ನಲ್ಲಿ ಎರಡು ನ್ಯಾನೋ ಸಿಮ್ ಸ್ಲಾಟ್‌ಗಳಿವೆ. ಆದರೆ ಸ್ಟೋರೇಜ್ ವಿಸ್ತರಣೆಗೆ ಎಸ್‌ಡಿ ಕಾರ್ಡ್ ಸ್ಲಾಟ್ ಇಲ್ಲ. VoLTE ಡ್ಯುಯಲ್ ಸ್ಟ್ಯಾಂಡ್‌ಬೈ ವ್ಯವಸ್ಥೆ ಇದ್ದು, ಬ್ಲೂಟೂತ್, NFC, GPS, ಗೈರೋಸ್ಕೋಪ್ ಮುಂತಾದ ಸೆನ್ಸರ್‌ಗಳಿವೆ. 3300 mAH ಬ್ಯಾಟರಿ ಸಾಮರ್ಥ್ಯವಿದ್ದು, ಇದರ ಚಾರ್ಜರ್ ಮಾತ್ರ ಉಳಿದವುಗಳಿಗೆ ಹೋಲಿಸಿದರೆ ದೊಡ್ಡದಾಗಿದೆ.

ಆಕ್ಸಿಜನ್ ಆಪರೇಟಿಂಗ್ ಸಿಸ್ಟಂ (ಒಎಸ್) ಅನ್ನು ಆಂಡ್ರಾಯ್ಡ್ ಒರಿಯೋ 8.1 ಕಾರ್ಯಾಚರಣಾ ವ್ಯವಸ್ಥೆಯಿಂದ ರೂಪಿಸಲಾಗಿದ್ದು, ಉತ್ತಮ ವೈಶಿಷ್ಟ್ಯಗಳಿವೆ. ಆದರೆ, ಬಹುತೇಕ ಆಂಡ್ರಾಯ್ಡ್ ಒನ್ (ಪ್ಯೂರ್ ಆಂಡ್ರಾಯ್ಡ್) ಅನ್ನೇ ಬಹುತೇಕ ಹೋಲುತ್ತದೆ. ಅನಗತ್ಯ ಹೆಚ್ಚುವರಿ ಆ್ಯಪ್‌ಗಳು ಅಳವಡಿಕೆಯಾಗಿ ಬಂದಿಲ್ಲ. ಸೆಟ್ಟಿಂಗ್ಸ್‌ನಲ್ಲಿ ಅದ್ಭುತವಾದ ವೈಶಿಷ್ಟ್ಯಗಳಿವೆ. ಓದುವ ಮೋಡ್, ಸಿಸ್ಟಂ ಫಾಂಟ್ ಬದಲಾವಣೆ ಆಯ್ಕೆ, LED ನೋಟಿಫಿಕೇಶನ್‌ಗಳ ಬಣ್ಣ ಕಾನ್ಫಿಗರ್ ಮಾಡುವ ಆಯ್ಕೆ… ಇವೆಲ್ಲ ಇವೆ.

ಮತ್ತೊಂದು ಹೇಳಲೇಬೇಕಾದ ವೈಶಿಷ್ಟ್ಯವೆಂದರೆ, ನೀವು ಯಾವುದೇ ಆ್ಯಪ್‌ನಲ್ಲಿರುವಾಗ, ಹೋಮ್ ಸ್ಕ್ರೀನ್‌ಗೆ ತಕ್ಷಣ ಹೋಗಬೇಕಿದ್ದರೆ, ಕೆಳ-ಮಧ್ಯಭಾಗದಿಂದ ಸ್ವಲ್ಪವೇ ಮೇಲಕ್ಕೆ ಸ್ವೈಪ್ ಮಾಡಿದರಾಯಿತು.

ಇನ್ನು ಗೇಮ್ ಮೋಡ್ ಎಂಬುದೊಂದಿದೆ. ಇದು ಹಿನ್ನೆಲೆ ಆ್ಯಪ್‌ಗಳ ಇಂಟರ್ನೆಟ್ ಬಳಕೆಯನ್ನು ನಿಯಂತ್ರಿಸುತ್ತದೆ, ನೋಟಿಫಿಕೇಶನ್‌ಗಳನ್ನು ತಡೆಯುತ್ತದೆ ಮತ್ತು ಕರೆಗಳನ್ನು ಕೂಡ ಲೌಡ್‌ಸ್ಪೀಕರ್‌ನಲ್ಲಿ ಕೇಳುವಂತೆ ಮಾಡುವ ಮೂಲಕ, ಆಟಕ್ಕೆ ತೊಂದರೆಯಾಗದಂತೆ ಅವಕಾಶ ಒದಗಿಸುತ್ತದೆ.

ಇದರಲ್ಲಿರುವ ಫೇಸ್ ರೆಕಗ್ನಿಶನ್ ಎಂಬ ಸ್ಕ್ರೀನ್ ಅನ್‌ಲಾಕ್ ವ್ಯವಸ್ಥೆಯೂ ವೇಗದಲ್ಲಿ ಕೆಲಸ ಮಾಡುತ್ತದೆ. ಎಷ್ಟೆಂದರೆ, ಸ್ಕ್ರೀನ್‌ನತ್ತ ನೋಡಲು ಮಾತ್ರ ಇಚ್ಛಿಸಿದರೂ, ಸ್ಕ್ರೀನ್ ಅನ್‌ಲಾಕ್ ಆಗಿಬಿಡುತ್ತದೆ. ಅಷ್ಟೊಂದು ವೇಗ.

ಕಾರ್ಯನಿರ್ವಹಣೆ, ಬ್ಯಾಟರಿ ಬಾಳಿಕೆ ಹೇಗಿದೆ?
ಅತ್ಯಾಧುನಿಕ ಸ್ನ್ಯಾಪ್‌ಡ್ರ್ಯಾಗನ್ ಆವೃತ್ತಿಯ ಪ್ರೊಸೆಸರ್ ಹಾಗೂ 6 GB RAM ಇರುವುದರಿಂದ, ಗೇಮಿಂಗ್ ಅಂತೂ ಅತ್ಯುತ್ತಮ ಅನುಭವ ನೀಡಿದೆ. ಇನ್ನು ವೀಡಿಯೋ ವೀಕ್ಷಣೆಯಲ್ಲೂ ಒಂದು ಕೈ ಮೇಲು. AMOLED ಸ್ಕ್ರೀನ್‌ನಲ್ಲಿ ಬಣ್ಣಗಳು ಸ್ಪಷ್ಟವಾಗಿರುವುದರೊಂದಿಗೆ ಚಿತ್ರಗಳ ನೋಟವೂ ಅತ್ಯುತ್ತಮ. ಕಲರ್ ಟೆಂಪರೇಚರ್ ಬದಲಿಸುವ ಆಯ್ಕೆಯೂ ಇದ್ದು, ಸ್ವಯಂಚಾಲಿತವಾಗಿ ಆಪ್ಟಿಮೈಸ್ ಆಗುವಂತಹಾ ಸೆಟ್ಟಿಂಗ್ ಮಾಡಿಟ್ಟುಕೊಳ್ಳಬಹುದು. ಗಾತ್ರದಲ್ಲಿ ದೊಡ್ಡದಾಗಿರುವ ಡ್ಯಾಶ್ ಚಾರ್ಜರ್ (ಇದು ವೇಗದ ಚಾರ್ಜಿಂಗ್ ವೈಶಿಷ್ಟ್ಯ ಹೊಂದಿದೆ), ಅರ್ಧ ಗಂಟೆಯಲ್ಲಿ ಶೇ.50ರಷ್ಟು ಚಾರ್ಜ್ ಆಗುತ್ತದೆ.

ಕ್ಯಾಮೆರಾಗಳು
ಹಿಂಭಾಗದಲ್ಲಿರುವ ಡ್ಯುಯಲ್ (ಎರಡು) ಹಾಗೂ ಮುಂಭಾಗದ ಕ್ಯಾಮೆರಾಗಳಲ್ಲಿರುವ ಸೋನಿ ಕಂಪನಿಯ ಸೆನ್ಸರ್‌ಗಳು ಅತ್ಯುತ್ತಮ ಫೋಟೋ ತೆಗೆಯಲು ಅನುಕೂಲ ಮಾಡಿಕೊಟ್ಟಿವೆ. ಪ್ರೈಮರಿ ಕ್ಯಾಮೆರಾ 16 ಮೆಗಾಪಿಕ್ಸೆಲ್ ಹಾಗೂ ಸೆಕೆಂಡರಿ ಕ್ಯಾಮೆರಾ 20 ಮೆಗಾಪಿಕ್ಸೆಲ್ ಸಾಮರ್ಥ್ಯ ಹೊಂದಿದ್ದು, ಕಡಿಮೆ ಬೆಳಕಿನಲ್ಲೂ ಉತ್ತಮ ಫೋಟೋ ತೆಗದುಕೊಟ್ಟಿದೆ. ಶಾರ್ಪ್ ಆಗಿರುವ ಫೋಟೋಗಳು ಗಮನ ಸೆಳೆದವು. ತೀರಾ ಹತ್ತಿರದಿಂದ (ಕ್ಲೋಸಪ್) ತೆಗೆಯಬಹುದಾದ (ಉದಾಹರಣೆಗೆ, ಹೂವಿನ) ಫೋಟೋದಲ್ಲಿ ಸ್ಪಷ್ಟತೆ ಇತ್ತು. ಇದರಲ್ಲಿರುವ ಪೋರ್ಟ್ರೇಟ್ ಮೋಡ್‌ನಲ್ಲಿ ಫೋಟೋ ತೆಗೆದರೆ, ಹಿನ್ನೆಲೆಯು ಮಸುಕಾಗಿ, ಸಬ್ಜೆಕ್ಟ್ (ವ್ಯಕ್ತಿ ಅಥವಾ ವಸ್ತು) ಮಾತ್ರವೇ ಸ್ಪಷ್ಟವಾಗಿ ಕಾಣಿಸುತ್ತದೆ. ಇದು ಕ್ಯಾಮೆರಾ ಪ್ರಿಯರಿಗೆ ಇಷ್ಟವಾಗುವ ಸಂಗತಿ. ಬೆಳಕಿಗೆ ಎದುರಾಗಿ ಹಿಡಿದರೂ ಚಿತ್ರಗಳಲ್ಲಿನ ಸ್ಪಷ್ಟತೆ ಗಮನ ಸೆಳೆಯಿತು. ಅದೇ ರೀತಿ ಮಂದ ಬೆಳಕಿನ ಚಿತ್ರಗಳು ಅಂದುಕೊಂಡದ್ದಕ್ಕಿಂತ ಹೆಚ್ಚು ಸ್ಪಷ್ಟವಾಗಿ ಮೂಡಿಬಂದವು. ಬೊಕೇ ಮೋಡ್ ಮೂಲಕ ನಮಗೆ ಬೇಕಾದಂತೆ ತಿರುಚುತ್ತಾ, ಅಲಂಕರಿಸುತ್ತಾ ಫೋಟೋ ತೆಗೆಯಬಹುದಾಗಿದೆ. ಮುಂಭಾಗದ (ಸೆಲ್ಫೀ) ಕ್ಯಾಮೆರಾ ಕೂಡ ಬ್ಯೂಟಿಫಿಕೇಶನ್ ಮೋಡ್ ಮೂಲಕ ಗಮನ ಸೆಳೆಯುತ್ತದೆ. ಜತೆಗೆ, ಕ್ಯಾಮೆರಾಗಳಲ್ಲಿ ವೃತ್ತಿಪರತೆಯಿಂದ ಕೆಲಸ ಮಾಡಲು ಗೊತ್ತಿದ್ದವರಿಗಾಗಿ ಪ್ರೋ-ಮೋಡ್ ಕೂಡ ಇದೆ. 4K ಸ್ಪಷ್ಟತೆಯ ವೀಡಿಯೊಗಳನ್ನೂ ರೆಕಾರ್ಡ್ ಮಾಡಿಕೊಳ್ಳಬಹುದು. ಇದರಲ್ಲಿರುವ ಸೂಪರ್-ಸ್ಲೋ ಮೋಷನ್ ಮೋಡ್ ಮೂಲಕ ನಿಧಾನಗತಿಯ ಚಲನೆಯ ವೀಡಿಯೊಗಳನ್ನು ತೆಗೆದು, ನೋಡಿ ಆನಂದಿಸಬಹುದು.

ಒಟ್ಟಾರೆ ಹೇಗಿದೆ?
ಇತರ ಟಾಪ್ ಎಂಡ್ ಫೋನ್‌ಗಳಾದ ಐಫೋನ್ ಎಕ್ಸ್, ಸ್ಯಾಮ್ಸಂಗ್ ಗ್ಯಾಲಕ್ಸಿ 9 ಪ್ಲಸ್ ಮುಂತಾದವುಗಳನ್ನು ಖರೀದಿಸಲು ಮುಂದಾಗುವವರು ಬಹುತೇಕ ಅದರಲ್ಲಿರುವ ಗುಣವೈಶಿಷ್ಟ್ಯಗಳನ್ನು ಕಡಿಮೆ ಬೆಲೆಗೆ ಪಡೆದುಕೊಳ್ಳಬಹುದಲ್ಲಾ ಎಂದು ಯೋಚಿಸಿದರೆ, ಅವರಿಗೆ ಒನ್‌ಪ್ಲಸ್ 6 ಸೂಕ್ತ. ಸ್ಟೀರಿಯೋ ಸ್ಪೀಕರ್‌ಗಳ ಬದಲು ಮೋನೋ ಸ್ಪೀಕರ್‌ಗಳಿವೆ ಮತ್ತು 3ಡಿ ಫೇಸ್ ರೆಕಗ್ನಿಶನ್ ವೈಶಿಷ್ಟ್ಯ ಇಲ್ಲವೆಂದುದಷ್ಟೇ ಮುಖ್ಯವಾದ ವ್ಯತ್ಯಾಸ. ಉಳಿದಂತೆ ನೋಡಲು ಆಕರ್ಷಕವಾಗಿದೆ, ಪವರ್‌ಫುಲ್ ಆಗಿದೆ, ಎಲ್ಲ ಆಧುನಿಕ ವೈಶಿಷ್ಟ್ಯಗಳಿವೆ, ಬ್ಯಾಟರಿ ಹಾಗೂ ಕ್ಯಾಮೆರಾ ಸೆನ್ಸರ್‌ಗಳು ಉತ್ತಮ ಚಿತ್ರಗಳನ್ನು ಕೊಡುತ್ತವೆ. ಉಳಿದಂತೆ, ಈ ಬೆಲೆಯ ಇತರ ಫೋನ್‌ಗಳಿಗೆ ಹೋಲಿಸಿದರೆ ಕೂಡ, ಒನ್‌ಪ್ಲಸ್ ಮೇಲುಗೈ ಸಾಧಿಸುತ್ತದೆ. FM ರೇಡಿಯೊ ಇದರಲ್ಲಿ ಇಲ್ಲದಿರುವುದು ಭಾರತೀಯ ಮಾರುಕಟ್ಟೆಗೆ ಬಲುದೊಡ್ಡ ಕೊರತೆಯಾಗಿದೆ.

Latest Android phone OnePlus 6 Review